ខេត្តបន្ទាយមានជ័យ ៖ អភិបាលរងខេត្តបានដាក់វិធានការពង្រឹងការត្រួតពិនិត្យស្ថានីយប្រេងក្នុងខេត្តមិនអោយមានការបន្លំគុណភាព និងបរិមាណតម្លៃកំណត់អោយបានច្បាស់លាស់លើកឡើងកិច្ចប្រជុំគណៈបញ្ជាការឯកភាពខេត្តបន្ទាយមានជ័យ នៅព្រឹកថ្ងៃទី២២ ខែមករា ឆ្នាំ២០១៩ នៅសាលប្រជុំសាលាខេត្តបន្ទាយមានជ័យ ។
លោក សាន វិជ្ជាសារ៉ាវុធ ប្រធានសាខាកាំកុងត្រូលខេត្តបន្ទាយមានជ័យបានរាយការថា នៅអំឡុងដើមខែមករា ឆ្នាំ២០១៩នេះ មន្ត្រីសាខាកាំកុងត្រូលខេត្តបន្ទាយមានជ័យរួមជាមួយមន្ត្រីកាំកុងត្រូលនាយកដ្ឋានមន្ទីរពិសោធន៍ចល័ត និងមន្ត្រីពាណិជ្ជកម្មខេត្តបានសហការគ្នា ចុះពិនិត្យស្ថានីយប្រេង ក្នុងខេត្តបន្ទាយមានជ័យ តាមចំណុចទិសដៅកំណត់ដែលជាមុខសញ្ញាកន្លងមកដែលចុះពិនិត្យស្ថានីយប្រេងខ្លះបន្លំគុណភាណ និងបរិមាណ ឬចំណុះមិនគ្រប់ត្រូវបានកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យ ក្នុងចំណោម១៣ស្ថានីយប្រេងមាន៤ទៅ៥កន្លែងត្រូវបានចាត់ការតាមច្បាប់ ។
លោក ប៉ុក ឡៃជី ប្រធានមន្ទីរពាណិជ្ជកម្មខេត្តបន្ទាយមានជ័យបានបញ្ជាក់ថា ដោយតាមការណែនាំពីក្រសួងពាណិជ្ជកម្មតម្លៃប្រេងសាំងធម្មតា១លីត្រតម្លៃ៣.៣០០រៀល និងប្រេងម៉ាស៊ូត១លីត្រតម្លៃ៣,៣០០រៀល និងប្រេងស៊ូពែរ១លីត្រតម្លៃចន្លោះ៣.៥០០រៀលទៅ៣,៧០០រៀល ។
លោក អ៊ុ រាត្រី អភិបាលរងខេត្តបន្ទាយមានជ័យមានប្រសាសន៍ថា រយៈពេលកន្លងមកឃើញថា មន្ត្រីជំនាញបានចុះពិនិត្យស្ថានីយប្រេងក្នុងខេត្តបន្ទាយមានជ័យយ៉ាងសកម្ម ហើយរកឃើញមានស្ថានីយប្រេងមួយចំនួនបានក្លែងបន្លំគុណភាពប្រេង និងបរិមាណ ឬចំណុះលីត្រមិនគ្រប់ ហើយមានតម្លៃខុសគ្នា ត្រូវបានមន្ត្រីជំនាញចាត់តាមច្បាប់ហើយ ។
លោកបានណែនាំដល់មន្ត្រីជំនាញពាក់ព័ន្ធត្រូវមានវិធានការចុះពិនិត្យជាប្រចាំតាមការកំណត់ទៅលើស្ថានីយប្រេងក្នុងខេត្ត ដើម្បីទប់ស្កាត់មិនអោយកើតមានស្ថានីយប្រេងខ្លះល្មើស និងច្បាប់កំណត់ ៕
ចែករំលែកព័តមាននេះ