រាជធានីភ្នំពេញ ៖ ក្រោយបង្ហាញពីការប្រឹងប្រែងឡើងអស់ពីសមត្ថភាព កាលពីថ្ងៃអាទិត្យមុននៅលើសង្វៀនទូរទស្សន៍អាស៊ីអាគ្នេយ៍ កីឡាករល្បីឈ្មោះទេស ជីវ៉ា បានត្រឹមស្មើពិន្ទុកីឡាករវ័យក្មេងថៃ Chen Luop ប៉ុណ្ណោះ ។ លទ្ធផលស្មើពិន្ទុនេះត្រូវបានគេមើលឃើញថាគឺជាលទ្ធផលដែលក្រុមគណៈកម្មការផ្ដល់ឱ្យដើម្បីយោងកីឡាករកម្ពុជានោះផងដោយសារតែក្នុងថ្ងៃនោះ កីឡាករថៃគេនប្រៀបជាងជាពិសេសនៅអំឡុងទឹកទី៤ និងទី៥។
យោងតាមសកម្មភាពប្រកួតអ្នកទស្សនាភាគច្រើនសុទ្ធតែមើលឃើញថា កីឡាករកម្ពុជា ទេស ជីវ៉ា ពិបាកក្នុងការទប់ទល់ជាមួយកីឡាករថៃ Chen Luop ។ ការប្រកួតរបស់អ្នកទាំងពីរក្នុង២ទឹកបើកឆាកដំបូង គេឃើញទេស ជីវ៉ា ទំនងជាមានប្រៀបជាង ប៉ុន្តែឈានដល់៣ទឹកចុងក្រោយ កីឡាករថៃវាយសម្រុកធ្វើឱ្យគេបាក់មុខតែម្ដង ។ ទោះជាមានការបកស្រាយថា កីឡាករទាំងពីរមានពិន្ទុប្រកៀកប្រកិតគ្នា ក៏អ្នកទស្សនាសុទ្ធតែមើលឃើញថា កីឡាករថៃមានប្រៀបល្អជាងរហូតដល់៣ទឹកក្នុងចំណោម៥ទឹក។
ទោះបីយ៉ាងណា លទ្ធផលចុងក្រោយគេឱ្យកីឡាករទាំង២ស្មើគ្នា ខណៈដែលលទ្ធផលនេះ ភាគីម្ខាងៗពេញចិត្ត ប៉ុន្តែកីឡាករទេស ជីវ៉ា ក៏ទទួលស្គាល់ថាខ្លួនចាញ់ប្រៀបដែរ។
កីឡាករកម្ពុជាបញ្ជាក់ថា ខ្លួនពិតជាមានការចាញ់ប្រៀបកីឡាករថៃនៅក្នុងការប្រកួតនោះបន្តិចមែន ប៉ុន្តែលោកថា លទ្ធផលចាញ់ប្រៀបមិនចាញ់ក្នុងសន្ទស្សន៍ភាគច្រើននោះទេ ដោយលោកបញ្ជាក់ថា ខ្លួនក៏វាយសម្រុកចូលថៃបានច្រើនដែរ ។ លោកថា ខ្លួនភ័យខ្លាចលទ្ធផលចេញមកចាញ់ពិន្ទុកីឡាករថៃខ្លាំងណាស់ ជាពិសេសនៅពេលកីឡាករថៃវាយសម្រុកបានល្អ នៅ២ទឹកចុងក្រោយ ដែលលោកទទួលស្គាល់ថាចាញ់ប្រៀប ។ លោកថា ហេតុផលដែលលោកវាយស៊ីកីឡាករថៃមិនបាននៅក្នុងថ្ងៃនោះ គឺដោយសារតែថៃគេរឹងផ្នែកខាងលើបានល្អ ហើយលោកព្យាយាមវាយសម្រុកដើម្បីផ្ដួលខាងក្រោមគឺវាយមិនចូល ។ កីឡាករថៃដ្បិតថាវ័យក្មេង ហើយមានប្រវត្តិឡើងរេញមិនច្រើន ប៉ុន្តែសមត្ថភាពរបស់គេគឺល្អពិបាក
ទប់ ។
លោក ញាណ សុធី អ្នករៀបចំកម្មវិធីប្រដាល់ប្រចាំទូរទស្សន៍អាស៊ីអាគ្នេយ៍ បានអះអាងថា ការប្រកួតរវាងកីឡាករទាំងពីរ គឺជាជំនួបសងសឹក ទើបការប្រកួតមួយនេះមិនថាកីឡាករកម្ពុជា និងកីឡាករថៃ សុទ្ធតែប្រឹងប្រកួតគ្នា ដោយកីឡាករកម្ពុជាត្រូវការពារកិត្តិយសក្នុងនាមជាកីឡាករមានបទពិសោធន៍យូរ ហើយកីឡាករថៃ ត្រូវការជ័យជម្នះក្នុងនាមជាជើងខ្លាំងម្នាក់ ។ មួយគូនេះ បើមើលមួយភ្លែត កីឡាករថៃ សមនឹងឈ្នះច្រើនជាង ស្របគ្នាដែលគេក៏វាយចេញត្រូវចំគោលដៅបានច្រើន។
ប៉ុន្តែលោកថា កីឡាករកម្ពុជា ដ្បិតថាធ្លាក់ដៃក៏ល្អណាស់ដែរ ទោះបីវាយចេញបានតិច និងមិនសូវវាយសម្រុកតបខ្លាំង ប៉ុន្តែមួយដៃៗ និងមួយជើងៗរបស់គេ ក៏សុទ្ធតែចំគោលដៅ ហើយមានចំណុចទាក់ទាញ អ៊ីចឹងហើយទើបធ្វើឱ្យការប្រកួតទាំងមូលបានត្រឹមស្មើគ្នា ។ លោកប្រកាសថា លទ្ធផលដែលបានស្ដែងឡើងគឺជាការដោះស្រាយបញ្ហាកុំឱ្យមានទំនាស់ថា អ្នកនេះល្អជាងម៉េចក៏ឱ្យចាញ់ ហើយអ្នកនោះមិន
សមចាញ់ដែរ ម៉េចក៏មិនឱ្យឈ្នះជាដើម ។
លោកថា លទ្ធផលស្មើខ្លះក៏ជារឿងល្អសម្រាប់កីឡាករដែលមានសមត្ថភាព២នាក់ ជាពិសេសស្ថិតក្នុងស្ថានភាពដែលបង្គោលក្រហមក៏ល្អ បង្គោលខៀវក៏ល្អ ខណៈដែលលទ្ធផលនេះក៏ជួយដោះស្រាយទំនាស់រវាងអ្នកភ្នាល់និងអ្នកភ្នាល់ កុំឱ្យពុះកញ្ជ្រោលនឹងការបង្ហាញប្រតិកម្ម ។ លោកនិយាយថា ការពិតលទ្ធផលស្នើយើងមិនមែនចេះតែឱ្យទេ ពេលខ្លះវាល្អទាំងសម្រាប់កីឡាករ និងល្អទាំងសម្រាប់គណៈកម្មការ ព្រោះការប្រកួតខ្លះតែឱ្យមិនស្រួលគឺមានរឿងរញ៉េរញ៉ៃតែម្ដង ។
លោកនិយាយបែបនេះមិនមែនសំដៅលើការប្រកួតរវាងកីឡាករ ទេស ជីវ៉ា និងកីឡាករថៃនៅក្នុងថ្ងៃនោះ មិនល្អ ឬមានអ្នកទិញដូរលទ្ធផលពីក្រោយខ្នង ទើបនាំឱ្យក្រុមគណៈកម្មការផ្ដល់ពិន្ទុសម្រេចឱ្យស្មើនោះទេ ដោយគ្រាន់តែលោកឧទាហរណ៍ និងថាហេតុផលនៃការឱ្យស្មើនៅក្នុងថ្ងៃនោះ គឺដោយសារតែឱ្យកីឡាករថៃឈ្នះក៏ស្ដាយ ហើយបើឱ្យកីឡាករកម្ពុជាឈ្នះក៏ស្ដាយប៉ុណ្ណោះ ។
លោកថា ការប្រកួតនៅក្នុងថ្ងៃនោះ ទាំងកីឡាករកម្ពុជា និងថៃ សុទ្ធតែបញ្ចេញសមត្ថភាពបានល្អ អ៊ីចឹងលទ្ធផលមិនឱ្យអ្នកណាមានពិន្ទុនាំមុខគឺជាជម្រើសតែមួយគត់ ដើម្បីឱ្យកីឡាករម្ខាងៗអស់ចិត្ត ។ លោកមានគម្រោងដាក់ឱ្យមួយគូនេះឡើងប្រកួតជាថ្មីម្ដងទៀត តែរង់ចាំឱ្យកីឡាករថៃ និងទេស ជីវ៉ា បានត្រៀមខ្លួនឱ្យគ្រប់គ្រាន់សិន ដើម្បីចង់ដឹងថា បើប៉ះគ្នាម្ដងទៀត តើអ្នកណានឹងឈ្នះ ៕
ចែករំលែកព័តមាននេះ