រាជធានីភ្នំពេញ ៖ នារីវ័យក្មេងម្នាក់បានទុកម៉ូតូរបស់ខ្លួនម៉ាកស៊ុយស៊ូគីនិច ពណ៌ផ្កាឈូកលាយស នៅសួនបទុមវតីរួចទៅអង្គុយលេងជាមួយមិត្តភក្តិ ស្រាប់តែលេចមុខជនសង្ស័យម្នាក់បានធ្វើសកម្មភាពកាច់កម៉ូតូមិនបានសម្រេចត្រូវបងប្អូនប្រជាពលរដ្ឋវាយទ្រោមខ្លួន ហេតុការណ៍នេះបានកើតឡើងកាលពីវេលាម៉ោង៧និង៣០នាទីយប់ថ្ងៃទី២១ ខែមករា ឆ្នាំ២០១៩ តាមបណ្តោយផ្លូវព្រះស៊ីសុវត្ថិនៅចំណុចម្តុំផ្សារទំនើបផេនសល ស្ថិតនៅក្នុងសង្កាត់ចតុមុខ ខណ្ឌដូនពេញ ។
តាមប្រភពពត៌មានពីសមត្ថកិច្ចបានអោយដឹងថា មុនពេលកើតហេតុគឺជនរងគ្រោះមានឈ្មោះឌីណា ខាន់កង ភេទស្រី អាយុ18ឆ្នាំ មុខរបរជាសិស្ស ស្នាក់នៅផ្ទះលេខ៦៥៦ សង្កាត់ចាក់អង្រែលើ ខណ្ឌមានជ័យ គាត់បានជិះម៉ូតូមួយគ្រឿងម៉ាកស៊ុយស៊ូគីនិច ពណ៌ផ្កាឈូកលាយស ពាក់ផ្លាកលេខ ភ្នំពេញ 1GL-2386 ជិះម៉ូតូមកពីផ្ទះគោលបំណងទៅអង្គុយលេងជាមួយមិត្តភក្តិនៅឯសួនវត្តបទុមវតី ។
ខណៈជិះមកដល់ចំណុចកើតហេតុខាងលើនេះជនរងគ្រោះក៏បានទុកម៉ូតូចោលនៅមុខសួនច្បារបានមួយភ្លែតក៏ស្រាប់តែលេចមុខជនសង្ស័យម្នាក់មានឈ្មោះ ចាន់ វិច្ឆកា ភេទប្រុស អាយុ២៣ឆ្នាំ មុខរបរមិនពិតប្រាកដ ស្នាក់នៅបន្ទប់ជួលលេខ១ ផ្លូវ៣១០ សង្កាត់បឹងកេង១ ខណ្ឌចំការមន បានធ្វើសកម្មភាពលួចកាច់.កម៉ូតូបម្រុងនឹងជិះរត់ទៅហើយ ប៉ុន្តែសំណាងអាក្រក់អីសោម៉ូតូក៏បាក់ពាក់កណ្តាល ។
ទើបជនរងគ្រោះក្រឡេកឃើញជនសង្ស័យកំពុងតែធ្វើសកម្មភាពក៏ស្រែកថា ចោរៗ ទើបជនសង្ស័យរត់គេចខ្លួនទៅដល់ចំណុចកើតហេតុខាងលើត្រូវបានប្រជាពលរដ្ឋស្វាគមន៍មួយដៃមួយជើងបណ្តាលអោយរងរបួសធ្ងន់ត្រូវបានសមត្ថកិច្ចប៉ុស្តិ៍ចតុមុខដឹកយកទៅប៉ុស្តិ៍ដើម្បីសួរនាំរួចជនរងគ្រោះក៏បានទៅដាក់ពាក្យបណ្តឹងនៅប៉ុស្តិ៍ដើម្បីអោយសមត្ថកិច្ចចាត់ការទៅតាមនីតិវិធី ។
ក្រោយពេលកើតហេតុសមត្ថកិច្ចក៏បានប្រគល់ម៉ូតូទៅអោយជនរងគ្រោះវិញ រីឯជនសង្ស័យវិញត្រូវបានសមត្ថកិច្ចកសាងសំណុំរឿងបញ្ចូនខ្លួនទៅកាន់តុលាការដើម្បីចាត់ការទៅនីតិវិធី ៕
ចែករំលែកព័តមាននេះ