រាជធានីភ្នំពេញ ៖ ក្រោយពីភាពយន្តឯកសារដែលមានចំណងជើងថា «ការរស់ឡើងវិញនៃក្បាច់គុនល្បុក្កតោខ្មែរ» ត្រូវបាននាំយកទៅចាក់បញ្ចាំងនៅប្រទេសកាណាដា និងសហរដ្ឋអាមេរិក ទទួលបានការចាប់អារម្មណ៍ខ្លាំងពីប្រជាពលរដ្ឋនៅទីនោះ ទើបមានការសំណូមពរ និងអញ្ជើញកញ្ញាសម ថារ័ត្ន…
រាជធានីភ្នំពេញ ៖ ក្រោយពីភាពយន្តឯកសារដែលមានចំណងជើងថា «ការរស់ឡើងវិញនៃក្បាច់គុនល្បុក្កតោខ្មែរ» ត្រូវបាននាំយកទៅចាក់បញ្ចាំងនៅប្រទេសកាណាដា និងសហរដ្ឋអាមេរិក ទទួលបានការចាប់អារម្មណ៍ខ្លាំងពីប្រជាពលរដ្ឋនៅទីនោះ ទើបមានការសំណូមពរ និងអញ្ជើញកញ្ញាសម ថារ័ត្ន កីឡាការិនីល្បុក្កតោដែលជាតួអង្គមួយរូបនៅក្នុងភាពយន្តឯកសារនោះទៅសម្តែងផ្ទាល់ម្តងទៀត នៅទឹកដីសហរដ្ឋអាមេរិក នាអំឡុងខែមេសា ឆ្នាំ២០១៩ ខាងមុខនេះ។ នេះបើយោងតាមកញ្ញា សម ថារ័ត្ន បញ្ជាក់ឲ្យដឹងតាមរយៈគេហទំព័រក្នុងស្រុកមួយ។
កញ្ញាសម ថារ័ត្ន បន្តថា ទោះបីមានការអញ្ជើញរូបនាងឱ្យទៅសម្តែងនៅសហរដ្ឋអាមេរិក ដើម្បីបង្ហាញពីក្បាច់គុនល្បុក្កតោខ្មែរដោយផ្ទាល់ក្តី ប៉ុន្តែកង្វះខាតថវិកាគាំទ្រក្នុងការធ្វើដំណើរ ហូបចុក និងស្នាក់នៅ គឺជាបញ្ហាធំដែលនាងមិនហ៊ានឆ្លើយថា អាចនឹងមានលទ្ធភាពទៅសម្តែងក្បាច់គុនល្បុក្កតោនៅទីនោះម្តងទៀត ឬអត់នៅឡើយនោះទេ ។ ជាមួយគ្នានេះ ដែរ រាជិនីល្បុក្កតោរូបនេះ បានអំពាវនាវដល់ប្រជាពលរដ្ឋកម្ពុជាគ្រប់ស្រទាប់វណ្ណៈ សូមចូលរួមគាំទ្រល្បុក្កតោខ្មែរ ដោយមានការបរិច្ចាគថវិកាបន្តិចបន្ដួចជួយរូបនាងឱ្យបានទៅសហរដ្ឋអាមេរិកម្តងទៀតដើម្បីផ្សព្វផ្សាយពីក្បាច់គុនល្បុក្កតោខ្មែរ។
គួររំលឹកថា កញ្ញា សម ថារ័ត្ន គឺជាកីឡាការិនីខ្មែរដំបូងគេដែលបានទៅដល់ផ្ទះស្តេចប្រដាល់ហ្វ៊ីលីពីន Manny Pacquiao នៅទឹកដីសហរដ្ឋអាមេរិក ។ នាងគឺជាយុវនារីសកម្មមួយរូបនៅក្នុងចលនាផ្សព្វផ្សាយក្បាច់គុនល្បុក្កតោខ្មែរទៅកាន់ឆាកអន្តរជាតិ ដោយនាងធ្លាប់នាំយកក្បាច់គុននេះ ឡើងប្រកួតលើសង្វៀន ក្នុងទ្រុងក្នុងកម្មវិធីប្រដាល់ប្រចាំស្ថាប័នONE Championship ដែលជាកម្មវិធីប្រដាល់កម្រិតពិភពលោកផងដែរ៕
ចែករំលែកព័តមាននេះ