រាជធានីភ្នំពេញ ៖ ដោយសារមានចិត្តស្រឡាញ់ កីឡាខ្លាំង និងមានការជំរុញលើកទឹកចិត្តពីឪពុកម្ដាយផងនោះ ធ្វើឱ្យតរុណីកីឡាចំបាប់២នាក់បងប្អូនគឺកញ្ញាឡឹម គីមលៀង និងឡឹម គីមឡៃ បង្ហាញកី្តស្រមៃ
របស់ខ្លួនគឺការដណ្ដើមមេដាយ មាសជូនជាតិឱ្យបានពីព្រឹត្តិការណ៍ប្រកួត អន្តរជាតិនានា តាមរយៈការប្រឹងប្រែងហ្វឹកហាត់ ជាប់ជាប្រចាំជាមួយគ្រូបង្វឹកដែលមានជំនាញ ខ្ពស់នៅក្នុងសហព័ន្ធកីឡាចំបាប់កម្ពុជា ។
ជួបជាមួយអ្នកយកព័ត៌មានកោះសន្តិភាព កីឡាការិនីទាំង២នាក់បងប្អូន បានប្រាប់ថានាងស្រឡាញ់កីឡាចំបាប់តាំងពីតូចៗពោលគឺតាំង ពីនាងរស់នៅឯទឹកដីកម្ពុជាក្រោមម្ល៉េះ ។ ជាពិសេសនៅពេលពួកនាងបានមើលទូរទស្សន៍ ឃើញគេប្រកួតចំបាប់កាន់តែធ្វើឱ្យនាងមាន ចិត្តពុះកញ្ជ្រោលចង់ហ្វឹកហាត់កីឡាមួយនេះ កាន់តែខ្លាំង ។
ពួកនាងនិយាយថា ពីដំបូងចង់ហ្វឹកហាត់ទុកគ្រាន់ការពារខ្លួនប៉ុណ្ណោះ លុះចូលហ្វឹកហាត់ស៊ប់ពួកនាងបែរជាចង់ក្លាយជាកីឡាការិនីខ្លាំងពូកែដើម្បីដណ្ដើមយកមេដាយជូនជាតិពីព្រឹត្តិការណ៍ប្រកួតអន្តរជាតិនានា ។ សម្រាប់ការហ្វឹកហាត់រយៈពេលជាង៤ខែមកនេះ នាងទទួលស្គាល់ថា មានការកើនឡើងផ្នែកកម្លាំងពីមួយថ្ងៃទៅមួយថ្ងៃ ទោះបីផ្នែកបច្ចេកទេសនៅខ្សោយក្ដី ក៏ពួកនាងបានតាំងចិត្តពុះពារជម្នះរាល់ការលំបាក ខិតខំហ្វឹកហាត់រហូតសម្រេចគោលដៅនា ពេលខាងមុខ ។ ដោយមានកាយសម្បទារឹងមាំគួបផ្សំនឹងការមានមហិច្ឆតាខ្ពស់ផងធ្វើឱ្យកីឡាការិនី២នាក់បងប្អូននេះកំពុងក្លាយជាក្ដីសង្ឃឹមយ៉ាងមុតមាំរបស់សហព័ន្ធក្នុងដំណើរឆ្ពោះទៅដណ្ដើមយកមេដាយពីការប្រកួតកីឡាស៊ីហ្គេមលើកទី៣២ឆ្នាំ២០២៣ដែលកម្ពុជាទទួលធ្វើជាម្ចាស់ផ្ទះ។
លោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជា បានឱ្យដឹងថា ពេលលោកបានឃើញនាងឡឹម គីមលៀងនិងឡឹម គីមឡៃ លោកនឹកឃើញដល់បងប្អូនស្រីភ្លោះ២នាក់ ជនជាតិរុស្សុី ដែលមានសមត្ថភាពខ្ពស់អាច ដណ្ដើមបានមេដាយមាសអូឡាំពិក និងមេដាយ មាសពិភពលោកជាច្រើនជំនាន់ ។
ដូច្នេះនេះគឺជាក្ដីស្រមៃរបស់លោកដែលមានជាយូរមកហើយ ទោះបីពួកនាងមិនអាចដណ្ដើមបានមេដាយមាសអូឡាំពិក ឬពិភពលោកដូចគេក្ដីបើបានត្រឹមតែមេដាយមាសកីឡាស៊ីហ្គេមក៏លោកសុខចិត្តដែរ ។ លោកបន្តថា សព្វថ្ងៃពួកនាងនៅខ្ចី ត្រូវការពេលវេលាយូរឆ្នាំដើម្បីហ្វឹកហាត់លត់ដំខ្លួនពង្រឹងទាំងកម្លាំងនិងបច្ចេកទេស ។
សម្រាប់ពួកនាងប្រហែលជាគ្មានអ្វីត្រូវពិបាកនោះទេ ព្រោះពួកនាងមានអ្វីដែលយើងចង់បានរួចទៅហើយ ព្រោះគោលការណ៍អ្នកដែលចង់ហាត់កីឡា ក៏ដូចជាចង់អភិវឌ្ឍខ្លួនឱ្យបានខ្លាំងពូកែត្រូវតែមាន៣ចំណុចសំខាន់គឺទី១-ឆន្ទះចង់ហាតពិតប្រាកដមិនខ្លាចការលំបាក ទី២-កាយសម្បទារឹងមាំពីកំណើត និងទី៣-ទទួលបានការគាំទ្រនិងជំរុញលើកទឹកចិត្តពីឪពុកម្ដាយ ។ សព្វថ្ងៃ ពួកនាងត្រូវបានសហព័ន្ធកីឡាចំបាប់កម្ពុជាយកចិត្តទុកដាក់យ៉ាងខ្លាំងដោយបានផ្ដល់ទីកន្លែងស្នាក់នៅ ហូបចុក រៀនសូត្រយ៉ាងត្រឹមត្រូវដើម្បីឱ្យឪពុកម្ដាយនាងដែលផ្ដាំផ្ញើមានការកក់ក្ដៅ ។
គួរបញ្ជាក់ថា កីឡាការិនីពីរនាក់បងប្អូននេះនាងឡឹម គីមលៀង មានអាយុ១៧ឆ្នាំ រៀនថ្នាក់ទី១១ និងឡឹម គីមឡៃ អាយុ១៤ឆ្នាំ រៀនថ្នាក់ទី៦ នៅសាលាបាក់ទូកដូចគ្នា៕
ចែករំលែកព័តមាននេះ