ទីក្រុងបាងកក ៖ វិស័យនេសាទថៃបានចាប់ផ្តើមអន់ថយ បន្ទាប់ពីសហភាពអឺរ៉ុប (EU) ចេញកាតលឿងដល់ប្រទេសនេះ ព្រោះតែបញ្ហាមួយចំនួន ហើយរដ្ឋាភិបាលបានចាប់ផ្តើមរឹតបន្តឹងដើម្បីរួចផុតពីការព្រមាននេះ ។ នេះបើយោងតាមការចេញផ្សាយពីសារព័ត៌មានបាងកក ប៉ុស្ដិ៍ កាលពីថ្ងៃទី២១ មករា ម្សិលមិញ ។
កាតលឿងនេះមានន័យថា ប្រទេសថៃអាចនឹងត្រូវបានទប់ស្កាត់មិនឲ្យនាំចេញទៅទីផ្សារEU។
លោក Pongthorn Chaiyawat ដែលជាទីប្រឹក្សាមួយរូបឲ្យសមាគមនេសាទប្រចាំ Samit Songkhram បាននិយាយថា ៥០%នៃទូកនេសាទត្រូវបានហាមមិនឲ្យចុះនេសាទ ព្រោះតែកូតារដ្ឋាភិបាល ។
លោកបានព្រមានថា វិធានការរបស់រដ្ឋាភិបាលបានប៉ះពាល់ដល់អាជីវកម្មក្នុងប្រទេសថៃ។ គ្រឿងសមុទ្រភាគច្រើនដែលត្រូវបាននាំចេញទៅកាន់ EU គឺត្រីធូណា និងបង្គារ ហើយប្រាក់ចំណូលបានពីការនាំចេញទាំងនេះស្មើនឹងប្រមាណ៩៤០លានដុល្លារជារៀងរាល់ឆ្នាំ ។
ទីផ្សារធំជាងគេសម្រាប់ប្រទេសថៃ គឺទីផ្សារជប៉ុនដែលទិញគ្រឿងសមុទ្រសរុបប្រមាណ ៣,១៥ប៊ីលានដុល្លារជារៀងរាល់ឆ្នាំពីប្រទេសថៃ ប៉ុន្តែពួកគេបានងាកទៅកាន់ប្រទេសដទៃព្រោះរដ្ឋាភិបាលថៃចាប់ផ្តើមរឹតបន្តឹងវិធានការក្នុងវិស័យនេះ ។
លោកបាននិយាយថា ៖« ការចំណាយសម្រាប់ការនេសាទលើសមុទ្រថៃបានកើនឡើងប្រមាណ៣០%។ អ្នកនេសាទត្រូវចំណាយថវិកាសម្រាប់ម៉ាស៊ីនត្រួតពិនិត្យនាវា (VMS) និងត្រូវបង់ថ្លៃផ្សេងៗទៀតដែលទាក់ទិននឹងការរាយការណ៍ពីទិន្នផល និងសកម្មភាពរបស់ពួកគេ »។
គួរបញ្ជាក់ដែរថា EU បានចេញកាតលឿងឲ្យប្រទេសថៃតាំងពីថ្ងៃទី២១ ខែមេសាឆ្នាំ២០១៥មក ។ តាំងពីពេលនោះមក រដ្ឋាភិបាលយោធារបស់ប្រទេសថៃបានចេញវិធានការរឹតបន្តឹងរហូត EU ដកកាតលឿងចេញវិញនៅថ្ងៃទី ៨ខែមករា ។ វាកើតមានឡើង បន្ទាប់ពីរដ្ឋាភិបាលចេញច្បាប់ថ្មីប្រមាណ១៣៨និងបានដាក់កូតាលើទិន្នផលដែលបង្កឲ្យមានការរឹបអូសប័ណ្ណអនុញ្ញាតនេសាទរបស់ទូកជាច្រើន ។
រដ្ឋាភិបាលបានកំណត់ចំនួនទូកនេសាទក្នុងប្រទេសត្រឹម១០.៥៦៥ដែលបង្កឲ្យមានការហាមឃាត់ទូក១ម៉ឺនទៀតមិនឲ្យធ្វើការនេសាទ ៕
ចែករំលែកព័តមាននេះ