ខេត្តកំពង់ធំ ៖ គ្រោះថ្នាក់ចរាចរណ៍រវាងរថយន្តប្រភេទយីឌុប២គ្រឿងបានបុកគ្នា បណ្តាលឱ្យបុរសម្នាក់ស្លាប់ ហេតុការណ៍នេះបានកើតឡើងកាលពីវេលាម៉ោង១១និង២៣នាទីយប់ថ្ងៃទី២១ ខែមករា ឆ្នាំ២០១៩ ស្ថិតនៅលើកំណាត់ផ្លូវជាតិលេខ៦ ចន្លោះគីឡូម៉ែត្រលេខ១៣៦-១៣៧ ក្នុងភូមិត្រើយម្យាប ឃុំប្រាសាទ ស្រុកសន្ទុក ខេត្តកំពង់ធំ ។
រថយន្តមួយគ្រឿងជិះគ្នា២នាក់មានដឹកស្រូវម៉ាកហ៊ីយ៉ាន់ដាយ ក្បាលពណ៌ស ទ្រុងពណ៌បៃតង ពាក់ស្លាកលេខ ៣A-២៣០១ បើកបរដោយឈ្មោះ ស្នា ភេទប្រុស អាយុ២៩ឆ្នាំ នៅភូមិថ្នល់បែក ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ បានរត់គេចខ្លួនបាត់ និងអ្នករួមដំណើរម្នាក់ឈ្មោះ ប៊ិន វុទ្ធី ភេទប្រុស អាយុ៣០ឆ្នាំ នៅភូមិរលួស សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ (ជាម្ចាស់រថយន្ត បានស្លាប់នៅកន្លែងកើតហេតុ) ។
ចំណែករថយន្តមួយគ្រឿងទៀតមានដឹកដំឡូងមី ម៉ាកហ៊ីយ៉ាន់ដាយ ក្បាលពណ៌ទឹកប្រាក់ ទ្រុងពណ៌ខ្មៅ គ្មានពាក់ស្លាកលេខ អ្នកបើកបរមិនស្គាល់អត្តសញ្ញាណ បានរត់គេចខ្លួនបាត់ ។
សមត្ថកិច្ចបានឱ្យដឹងថា មុនពេលកើតហេតុ រថយន្តមួយគ្រឿងមានដឹកស្រូវជិះគ្នា២នាក់ បានបើកបរក្នុងល្បឿនលឿន លុះមកដល់ចំណុចកើតហេតុបានបុកគ្នាជាមួយរថយន្តដឹកដំឡូងមីក្នុងទិសដៅស្របគ្នា បណ្តាលឱ្យបុរសម្នាក់ជាអ្នករួមដំណើរជិះក្នុងរថយន្តដឹកស្រូវបានស្លាប់ ហើយអ្នកបើកបរបានរត់គេចខ្លួនបាត់ ចំណែកអ្នកបើកបររថយន្តមានដឹកដំឡូងមីបានរត់គេចខ្លួនបាត់ ។
ក្រោយកើតហេតុ សមត្ថកិច្ចបានយករថយន្តទាំង២គ្រឿងទៅរក្សាទុកនៅអធិការដ្ឋាននគរបាលស្រុកសន្ទុក ចំណែកសពត្រូវបានប្រគល់ជូនក្រុមគ្រួសារដើម្បីរៀបចំធ្វើបុណ្យតាមប្រពៃណី ៕
ចែករំលែកព័តមាននេះ