រាជធានីភ្នំពេញ ៖ ព្រឹត្តិការណ៍រត់ប្រណាំងចម្ងាយឆ្ងាយ Ultra trail បន្ទាប់ពីធ្វើបានចំនួន៤លើក និងទទួលបានជោគជ័យជាបណ្ដើៗនៅតំបន់ទេសចរណ៍ប្រវត្តិសាស្ត្រ ក្នុងទឹកដីអង្គរខេត្តសៀមរាប តាមការឱ្យដឹងពីលោក Edouard…
រាជធានីភ្នំពេញ ៖ ព្រឹត្តិការណ៍រត់ប្រណាំងចម្ងាយឆ្ងាយ Ultra trail បន្ទាប់ពីធ្វើបានចំនួន៤លើក និងទទួលបានជោគជ័យជាបណ្ដើៗនៅតំបន់ទេសចរណ៍ប្រវត្តិសាស្ត្រ ក្នុងទឹកដីអង្គរខេត្តសៀមរាប តាមការឱ្យដឹងពីលោក Edouard Gerge អ្នកស្ថាបនិកព្រឹត្តិការណ៍មួយនេះ មានគម្រោងចង់រៀបចំធ្វើនៅតំបន់ទេសចរណ៍ដែលមានសក្ដានុពល ជាប់មាត់សមុទ្រចំនួន៤ទៀត គឺខេត្តកំពត ខេត្តព្រះសីហនុ ខេត្តកែប និងខេត្តកោះកុង។
លោកវ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មាធិការជាតិអូឡាំពិកកម្ពុជា ធ្លាប់បានមានប្រសាសន៍ឱ្យដឹងថា ព្រឹត្តិការណ៍រត់ប្រណាំងចម្ងាយឆ្ងាយមួយនេះ ត្រូវបានគេរៀបចំធ្វើឡើងតាំងពីឆ្នាំ២០១៥មកម្ល៉េះ ហើយដំបូងឡើយមិនសូវមានអ្នកចូលរួមរត់ច្រើននោះទេ ប៉ុន្តែនៅឆ្នាំបន្តបន្ទាប់មានអ្នកចូលរួមគាំទ្រទាំងក្នុង និងក្រៅប្រទេស ច្រើនឡើងៗ រហូតដល់ឆ្នាំ២០១៨កន្លងទៅនេះ យើងទទួលបានភ្ញៀវទេសចរបរទេសជុំវិញពិភពលោកចុះឈ្មោះរត់ប្រហែលជា៧០០នាក់ប៉ុណ្ណោះ។
ដោយឡែចូលមកដល់ឆ្នាំ២០១៩នេះ ចំនួនអ្នកចូលរួមរត់មានការកើនឡើងយ៉ាងខ្លាំង រហូតដល់ទៅជាង១ពាន់នាក់ មកពី៤២ប្រទេសនៅលើពិភពលោក។ ហើយអ្វីដែលគួរឱ្យកត់សម្គាល់នោះ គឺកម្ពុជាចូលរួមច្រើនជាងលើកណាៗទាំងអស់ឈរនៅចំណាត់ថ្នាក់លេខ២ បន្ទាប់ពីភ្ញៀវបារាំង។
ដោយមើលឃើញពីភាពជោគជ័យពីមួយឆ្នាំទៅមួយឆ្នាំនេះហើយ ទើបគណៈកម្មការរៀបចំការប្រកួត មានគម្រោងពង្រីកការផ្សព្វផ្សាយតំបន់ទេសចរណ៍ប្រវត្តិសាស្ត្រទៅកាន់តំបន់ទេសចរណ៍ មានសក្ដានុពលផ្សេងទៀតនៃព្រះរាជាណាចក្រកម្ពុជា។ ហើយជាមួយនឹងគម្រោងនេះ ដើម្បីឱ្យអ្នកចូលរួមនៅក្នុងព្រឹត្តិការណ៍នេះ បានឃើញពីទស្សនីយភាព ជីវភាព និងការរស់នៅរបស់ប្រជាជនកម្ពុជា ពីតំបន់មួយទៅកាន់តំបន់មួយទៀត។
ទន្ទឹមជាមួយគ្នានេះផងដែរ ក៏ត្រូវការពេលវេលា ដើម្បីសិក្សាទៅកាន់តំបន់ទាំងនោះ ជាពិសេសគឺអ្នកឧបត្ថម្ភ។ ការស្វែងរកដៃគូឧបត្ថម្ភនេះគឺជារឿងសំខាន់ណាស់ដើម្បីឱ្យការប្រកួតដំណើរការទៅបានជាបន្តទៀត។សម្រាប់កម្មវិធីរត់ប្រណាំងចម្ងាយឆ្ងាយ Angkor Ultra trail លើកទី៤ឆ្នាំនេះ ត្រូវបានគេវាយតម្លៃថាមានការកើនឡើងប្រហែល៣៥% ហើយក៏សង្ឃឹមផងដែរថា នៅឆ្នាំក្រោយៗជាបន្តទៀតនិងមានការកើនឡើងជាងឆ្នាំនេះ។
គួរបញ្ជាក់ថា ព្រឹត្តិការណ៍រត់ប្រណាំងចម្ងាយឆ្ងាយនេះ ចែកចេញជា៤វិញ្ញាសា មានរត់ចម្ងាយ១៦គីឡូម៉ែត្រ ៣២គីឡូម៉ែត្រ ៦៤គីឡូម៉ែត្រ និង១២៨គីឡូម៉ែត្រ៕
ចែករំលែកព័តមាននេះ