ខេត្តសៀមរាប ៖ កម្លាំងការិយាល័យស៊ើបអង្កេតនិងអនុវត្តនីតិវិធី សហការជាមួយកម្លាំងការិយាល័យនគរបាលការពារ និងអន្តរាគមន៍ កម្លាំងអធិការដ្ឋាននគរបាលក្រុងសៀមរាប និងប៉ុស្តិ៍នគរបាលរដ្ឋបាលសង្កាត់ស្វាយដង្គំ ដឹកនាំសម្របសម្រួលនីតិវិធីដោយលោករៀម ច័ន្ទមន្នី និងលោកថេង…
ខេត្តសៀមរាប ៖ កម្លាំងការិយាល័យស៊ើបអង្កេតនិងអនុវត្តនីតិវិធី សហការជាមួយកម្លាំងការិយាល័យនគរបាលការពារ និងអន្តរាគមន៍ កម្លាំងអធិការដ្ឋាននគរបាលក្រុងសៀមរាប និងប៉ុស្តិ៍នគរបាលរដ្ឋបាលសង្កាត់ស្វាយដង្គំ ដឹកនាំសម្របសម្រួលនីតិវិធីដោយលោករៀម ច័ន្ទមន្នី និងលោកថេង សំណាង ព្រះរាជអាជ្ញារងអមសាលាដំបូងខេត្តសៀមរាប បានបង្ក្រាបល្បែងស៊ីសងខុសច្បាប់តាមអុីនធើរណេត នៅទីតាំង២ផ្សេងគ្នា ។
សមត្ថកិច្ចបានឃាត់ខ្លួនជនជាតិចិនប្រុស-ស្រី២១នាក់ (ស្រី៦នាក់) និងវត្ថុតាងមួយចំនួន រួចបញ្ជូនទៅការិយាល័យស៊ើបអង្កេត និងអនុវត្តនីតិវិធីនៃស្នងការដ្ឋាននគរបាលខេត្ត ។ ក្នុងចំណោមនោះ បុរស២នាក់អត់ជាប់ពាក់ព័ន្ធត្រូវព្រះរាជអាជ្ញារង លោករៀម ច័ន្ទម្នី ឱ្យវិលត្រឡប់ទៅកន្លែងស្នាក់នៅវិញ ។ ប្រតិបត្តិការនោះ នាវេលាម៉ោង២ និង៣០នាទី រសៀលថ្ងៃទី១៨ មករា ចុងសប្តាហ៍មុន នៅផ្ទះជួល២ទីតាំងផ្សេងគ្នា ក្នុងភូមិភ្ញារជ័យ និងភូមិតាភុល សង្កាត់ស្វាយដង្គំ ក្រុងសៀមរាប ។
លោកឧត្តមសេនីយ៍ត្រីជា គឹមសាន ស្នងការរងទទួលផែនការងារអន្តោប្រវេសន៍ និងលោកវរសេនីយ៍ឯកតូច សុគន្ធ នាយការិយាល័យស៊ើបអង្កេត និងអនុវត្តនីតិវិធីនៃស្នងការដ្ឋាននគរបាលខេត្តបានប្រាប់តាមទូរស័ព្ទនាវេលាម៉ោង១២ និង១៥នាទីរសៀល ថ្ងៃទី២១ មករា ថា មានការចូលរួមសហការល្អពីកម្លាំងសមត្ថកិច្ចក្នុងការបង្ក្រាបករណីបើកល្បែងស៊ីសងខុសច្បាប់តាមអុីនធើរណេត លើទីតាំង២ផ្សេងគ្នានេះ។
ចំពោះជនសង្ស័យប្រុស-ស្រីជនជាតិចិនទាំង១៩នាក់ និងវត្ថុតាងមួយចំនួន សមត្ថកិច្ចជំនាញបានសួរនាំ និងរៀបចំកសាងសំណុំរឿងបញ្ជូនទៅតុលាការខេត្តនៅវេលាម៉ោង២រសៀលថ្ងៃទី២១ មករា ដើម្បីចាត់ការបន្តតាមតាមមាត្រា៥នៃច្បាប់ស្តីពីការលេងល្បែងស៊ីសងខុសច្បាប់នៃព្រះរាជាណាចក្រកម្ពុជា ។ សមត្ថកិច្ចកម្ពុជាសហការជាមួយប៉ូលិសចិន ធ្លាប់បានបង្ក្រាបក្រុមលួចបើកបនល្បែងអនឡាញ ដោយចាប់ខ្លួនជនសង្ស័យ១៦០នាក់ កាលពីចុងខែកញ្ញាកន្លងទៅ ក្នុងនោះមានមេខ្លោង២នាក់ ។ នេះបើយោងតាមទីភ្នាក់ងារ CCTV របស់ចិន ។
នាប៉ុន្មានឆ្នាំចុងក្រោយនេះ បន្ទាប់ពីមានការបង្ក្រាបយ៉ាងខ្លាំងទៅលើបនល្បែងជាប្រព័ន្ធនៅទូទាំងប្រទេសចិនមក បនល្បែងជាច្រើនបានប្តូរទីតាំងទៅកាន់ប្រទេសផ្សេងទៀតនៅទ្វីបអាស៊ី ដើម្បីបន្តប្រព្រឹត្តសកម្មភាពខុសច្បាប់របស់ពួកគេ ។
ឆ្លើយតបនឹងការប្ដូរទីតាំងនេះ អាជ្ញាធរផ្នែកសន្តិសុខសាធារណៈចិន បានខិតខំបន្ថែមលើការបង្ក្រាបឆ្លងប្រទេស ចំពោះសកម្មភាពបនល្បែងទាំងឡាយដែលមានលក្ខណៈអន្តរជាតិ ។ ចាប់តាំងពីឆ្នាំ២០១៨មក អាជ្ញាធរចិនបានបង្ក្រាបបទល្មើសល្បែងអនឡាញជាង៨១០០ករណី ហើយបង្កកប្រាក់ល្បែងចំនួន៣១៨០លានដុល្លារអាមេរិក ក្នុងនោះក៏មាននៅកម្ពុជាផងដែរ ៕
ចែករំលែកព័តមាននេះ