ខេត្តបន្ទាយមានជ័យ ៖ អក្សរបរទេសគេសសេរលើ ឬស្មើអក្សរខ្មែរហាក់កើតមានព្រោងព្រាត និងកន្លែងខ្លះក៏មានអក្សរបរទេសសុទ្ធក៏មានដែរ ក្នុងប្លុកកាស៊ីណូ និងមាត់ច្រកទ្វារអន្តរជាតិប៉ោយប៉ែតធ្វើឲ្យកើតមានការរិះគន់ពីមហាជន។
ផ្ទាំងឡូហ្គោមួយជាប់របងកាស៊ីណូ និងជាប់ដងផ្លូវនៅមាត់ច្រកទ្វារអន្តរជាតិប៉ោយប៉ែតដែលចំណុចនោះពីខាងកើតនិងខាងលិចមានសមត្ថកិច្ច និងមន្ត្រីស្ទើរគ្រប់ស្ថាប័នធ្វើការ បែរជាគ្មានអ្នកមើលឃើញទៅវិញ ខណៈផ្ទាំងឡូហ្គោនោះមានអក្សរ២សាសន៍នៅពីខាងលើអក្សខ្មែរ គឺអក្សរចិន និងអក្សរអង់គ្លេស (Happy Club សប្បាយក្លឹប)។
សម្រាប់ផ្ទាំងឡូហ្គោមួយនេះមហាជនរិះគន់ថាមិនគួរមន្ត្រី និងសមត្ថកិច្ចមើលមិនឃើញនោះទេ ព្រោះនៅនិងរបងជាប់ដងផ្លូវមាត់ច្រកទ្វារអន្តរជាតិដែលគ្រប់គ្នាឆ្លងកាត់ទៅមកព្រឹកល្ងាច។
ដោយឡែកទីតាំងផ្សេងៗទៀត កន្លែងខ្លះសរសេរជាអក្សរបរទេសសុទ្ធ និងកន្លែងខ្លះទៀតសរសេរអក្សរបរទេសស្មើ ឬដាក់ទន្ទឹមគ្នា ដែលករណីនេះកើតមានយូរហើយ ហាក់ពុំមានអ្នកយកភ្នែកមើលឡើយ។
ជុំវិញករណីរិះគន់នេះ លោកសាន ស៊ានហូ អភិបាលក្រុងប៉ោយប៉ែតប្រាប់កោះសន្តិភាពតាមទូរស័ព្ទថា កន្លងមកលោកបានចុះអប់រំណែនាំតាមហាងឬទីតាំងទទួលធ្វើឡូហ្គោ ឬប៉ាណូក្នុងក្រុងប៉ោយប៉ែតរួចហើយ ឲ្យសសេរអក្សខ្មែរដាក់ខាងលើ និងធំជាងអក្សរបរទេស បើមានគេជួលឲ្យធ្វើ។
លោកអភិបាលបន្តថា ករណីចេះតែកើតមាននេះ សង្ស័យគេធ្វើឡូហ្គោ ឬប៉ាណូមកពីក្រៅខេត្ត ។ លោកបញ្ជាក់ថា មានស្ថាប័នមន្ទីរពាក់ព័ន្ធច្រើនណាស់ក្នុងខេត្តក្រុងដែលគួរតែជួយពិនិត្យមើលលើបញ្ហានេះ ព្រោះលោកម្នាក់ឯងមិនអាចក្តាប់ជុំនោះទេ៕
ចែករំលែកព័តមាននេះ