ខេត្តសៀមរាប ៖ ប្តីបានប្រើអំពើហិង្សាទៅលើប្រពន្ធ និងដុតផ្ទះសម្បែង បណ្តាលឱ្យឆេះខ្ទេចអស់គ្មានសល់ ហើយត្រូវបានប៉ូលិសស្រុកពួកធ្វើការឃាត់ខ្លួន ដែលហេតុការណ៍នេះបានកើតឡើងកាលពីថ្ងៃទី១៩ ខែមករា ឆ្នាំ២០១៩ នៅចំណុចផ្ទះជនរងគ្រោះ ស្ថិតក្នុងភូមិតាស្នែ ឃុំដូនកែវ ស្រុកពួក ខេត្តសៀមរាប។
តាមប្រសាសន៍របស់លោកវរសេនីយ៍ឯក ពេទ ពុំសែន អធិការនគរបាលស្រុកពួកបានប្រាប់ភ្នាក់ងារកោះសន្តិភាពនៅវេលាម៉ោង១រសៀលថ្ងៃទី២១ ខែមករា ឆ្នាំ២០១៩ ឱ្យដឹងថា មុនពេលកើតហេតុ មានពលរដ្ឋរាយការណ៍មកសមត្ថកិច្ចមូលដ្ឋានថា មានករណីហិង្សាក្នុងគ្រួសាររហូតឈានដល់ដុតផ្ទះសម្បែងបណ្តាលឱ្យឆេះខ្ទេចអស់គ្មានសល់ទៀតផង ។
ពេលនោះលោកក៏បានបញ្ជាឱ្យកម្លាំងរបស់អធិការស្រុក ចេញទៅជួយអន្តរាគមន៍ភ្លាមៗផងដែរ ប៉ុន្តែជាអកុសល ដោយសារផ្ទះនោះធ្វើអំពីឈើប្រក់សង្ក័សី ទើបជួយមិនទាន់ ណាមួយនៅឆ្ងាយពីស្រុកផង។
លោកបានបន្តថា ផ្ទះដែលឆេះនោះមានទំហំ៥ម៉ែត្រគុណនឹង៧ម៉ែត្រ ធ្វើអំពីឈើ ជញ្ជាំងស្លឹកប្រក់ស័ង្កសី រួមទាំងទ្រព្យសម្បត្តិ និងសម្ភារៈប្រើប្រាស់ដែលរងការខូចខាតមួយចំនួនរួមមាន ប្រាក់ចំនួន២០០ដុល្លារ ស្រូវ៣ការ៉ុង អង្ករ១ការ៉ុង សរុបអស់ទឹកប្រាក់អស់ប្រមាណជាង៥លានរៀល។
លោកបានបញ្ជាក់ទៀតថា ជនបង្កជាប្តីឈ្មោះ ស៊ិន នុយ អាយុ៣៥ឆ្នាំ មុខរបរធ្វើស្រែ មានប្រពន្ធឈ្មោះ កែវ ឡុក អាយុ២៩ឆ្នាំ មុខរបរធ្វើស្រែ មានកូន២នាក់ (ក្នុងនោះកូនប្រុសអាយុ១២ឆ្នាំ និងកូនស្រីអាយុ២
ឆ្នាំ) ។ អ្នកទាំងអស់គ្នារស់នៅភូមិឃុំកើតហេតុខាងលើ ។
តាមការបំភ្លឺរបស់ស្ត្រីជាប្រពន្ធបានរៀបរាប់ប្រាប់សមត្ថកិច្ចថា រយៈពេលប្រហែល១០ឆ្នាំមក ហើយ ដែលរូបគាត់បានគ្នាជាប្តីប្រពន្ធ មិនបានចុះសំបុត្រអាពាហ៍ពិពាហ៍នោះទេ បច្ចុប្បន្ន មានកូនប្រុសស្រីចំនួន២នាក់ រស់នៅជុំគ្នា ប៉ុន្តែគាត់និងប្តីមិនសូវចុះសម្រុងនឹងគ្នានោះទេ ។
តាំងពីពួកគាត់ចាប់ដៃគ្នាមក ពេលប្តីរបស់ត្រឡប់មកពីផឹកស្រវឹងវិញម្តងៗតែងតែរករឿងគាត់មិនចេះចប់ រហូតហ៊ានលើកដៃវាយគាត់ និងកូន ហើយវាយបំផ្លាញទ្រព្យសម្បត្តិនៅក្នុងផ្ទះទៀតផង ប៉ុន្តែគាត់ក៏មិនបានប្តឹងផ្តល់អ្វីឡើយ។
ស្ត្រីជាប្រពន្ធបានរៀបរាប់បន្តថា មុនថ្ងៃកើតហេតុ គាត់កំពុងអង្គុយលេងនៅផ្ទះអ្នកជិតខាងជាប់របងជាមួយគ្នា ពេលនោះឃើញប្តីរបស់គាត់មកពីផឹកស្រវឹងដើរសំដៅទៅផ្ទះ ហើយចូលទៅស្រែកជេររករឿងគាត់ ស្រាប់តែឈ្លោះប្រកែកគ្នា រួចបានប្រវាយប្រតប់គ្នាដួលទៅលើដីទាំង២នាក់ រួចគាត់ក៏រត់ចេញទៅផ្ទះអ្នកជិតខាង។
បន្ទាប់មកប្តីរបស់គាត់ដើរបណ្តើរ និយាយថា «អញទៅរកដុតផ្ទះចោល» ហើយគាត់ក៏មិនបានតាមមើលនោះទេ ព្រោះគិតថា ប្រហែលជាប្តីរបស់គាត់មិនហ៊ានទេ ។ ស្រាប់តែមួយសន្ទុះក្រោយមក អ្នកជិតខាងបានមកប្រាប់គាត់ថា «ប្តីឯងដុតផ្ទះឆេះអស់ហើយ រួចគេចខ្លួនបាត់»ពេលនោះគាត់ក៏រត់ទៅមើលស្រាប់តែឃើញផ្ទះនៅសល់តែគ្រោងឆ្អឹងប៉ុណ្ណោះ។
ក្រោយពេលកើតហេតុ ជនសង្ស័យជាប្តីបានរត់គេចខ្លួនបាត់ បន្ទាប់ពីគេចខ្លួនបានរយៈពេល១ថ្ងៃ ជនសង្ស័យក៏វិលមកផ្ទះវិញ ឃើញភ្លាមៗប្រពន្ធក៏បានប្តឹងមកសមត្ថកិច្ចឱ្យចុះទៅឃាត់ខ្លួនភ្លាមៗ និងកសាងសំណុំរឿងដើម្បីបញ្ជូនជនសង្ស័យជាប្តីទៅតុលាការ ។
បច្ចុប្បន្ន ជនសង្ស័យជាប្តី ត្រូវបានលោកស្រី គឹម សុគុន្ធា ចៅក្រមស៊ើបសួរ នៃសាលាដំបូងខេត្តសៀម
រាប សម្រេចឱ្យសមត្ថកិច្ចយកទៅដាក់ពន្ធនាគារខេត្តសៀមរាបកាលពីរសៀលថ្ងៃទី២០ ខែមករា ឆ្នាំ២០១៩ ៕
ចែករំលែកព័តមាននេះ