រាជធានីភ្នំពេញ ៖ កម្មករធ្វើបង្គោលភ្លើងម្នាក់ បន្ទាប់ពីផឹកស្រាស្រវឹងរួចចូលដេកក្នុងបន្ទប់ជួលជាមួយក្មួយប្រុស ស្រាប់តែព្រឹកឡើងស្លាប់បាត់បង់ជីវិតដែលហេតុការណ៍នេះ បង្កឲ្យភ្ញាក់ផ្អើលឡើង កាលពីវេលាម៉ោង៦និង៣០នាទីព្រឹក ថ្ងៃទី២១ ខែមករា ឆ្នាំ២០១៩ នៅចំណុចបន្ទប់ជួលភូមិស្វាយប៉ាក សង្កាត់ស្វាយប៉ាក ខណ្ឌឬស្សីកែវ ។
បុរសដេកស្លាប់ខាងលើនេះមានឈ្មោះ នៅ ភឿន អាយុ៣៤ឆ្នាំ មុខរបរកម្មករធ្វើបង្គោលភ្លើងស្នាក់នៅកន្លែងកើតហេតុ មានស្រុកកំណើតភូមិបុរីរម្យ ឃុំវាលពង់ ស្រុកឧដុង្គ ខេត្តកំពង់ស្ពឺ ។ ចំណែកក្មួយប្រុសដែលដេកជាមួយឈ្មោះ នេត្រ ផានិត អាយុ២១ឆ្នាំ ស្នាក់នៅជាមួយគ្នា ។
តាមប្រភពព័ត៌មានពីកន្លែងកើតហេតុឲ្យដឹងថា នៅមុនពេលកើតហេតុជនរងគ្រោះបានផឹកស្រា នៅមុខបន្ទប់នៅខាងក្រៅផឹកជាមួយមិត្តភក្តិជនរងគ្រោះ បន្ទាប់មកនៅម៉ោងប្រហែល៨និង១៥នាទីយប់ ថ្ងៃទី២០ ខែមករា ឆ្នាំ២០១៩ បានចូលក្នុងបន្ទប់ហូបបាយដោយចងមុងដេកហើយបានប្រាប់ក្មួយថា គាត់ស្រវឹងហើយ។ លុះម៉ោងប្រហែល៦និង៣០នាទីព្រឹក ថ្ងៃទី២១ ខែមករា ឆ្នាំ២០១៩ក្មួយបានស្រែកហៅដល់ម៉ោងធ្វើការ និងបានទៅដាស់ ស្រាប់តែរឹងស្លាប់បាត់ទៅហើយ ។
ក្រោយមកក៏បានរាយការណ៍ប្រាប់សមត្ថកិច្ចមូលដ្ឋាន និងទាក់ទងសមត្ថកិច្ចជំនាញឲ្យចុះមកកន្លែងកើតហេតុ ដើម្បីពិនិត្យបន្ទាប់ពីពិនិត្យរួចរាល់ហើយបានបញ្ជាក់ថា ជនរងគ្រោះស្លាប់ដោយគាំបេះដូង (ខ្យល់គ) ហើយបានប្រគល់សពទៅឲ្យក្រុមគ្រួសារដឹកយកទៅធ្វើបុណ្យតាមប្រពៃណី ៕
ចែករំលែកព័តមាននេះ