រាជធានីភ្នំពេញ ៖ សេចក្តីរាយការណ៍បឋមឱ្យដឹងថា កាបូបដ៏ច្រើនដែលត្រូវចោរឆក់ពីអ្នកដំណើរតាមផ្លូវ ជាពិសេសឆក់ពីជនបរទេសនោះ ត្រូវបានកម្លាំងនគរបាលខណ្ឌពោធិ៍សែនជ័យរកឃើញនៅក្នុងបន្ទប់ជួលមួយកន្លែង ខណៈពេលដែលកម្លាំងចូលទៅចាប់ខ្លួនមនុស្សប្រុស-ស្រី៧នាក់ ជាក្រុមមុខសញ្ញាចោរឆក់យ៉ាងសកម្មបំផុត ដែលតែងធ្វើសកម្មភាពឆក់មុខអាកាសយានដ្ឋានអន្តរជាតិ-ភ្នំពេញ ។
សេចក្តីរាយការណ៍បន្តថា ការចាប់ខ្លួន ធ្វើឡើងកាលពីវេលាម៉ោង៩ និង៣០នាទីព្រឹកថ្ងៃទី២១ មករា នេះ ស្ថិតនៅតាមមហាវិថីសហព័ន្ធរុស្សុីអាកាសយានដ្ឋានអន្តរជាតិភ្នំពេញ ភូមិក្បាលដំរី សង្កាត់កាកាប១ ឃាត់បានជនសង្ស័យម្នាក់ដកហូតម៉ូតូ១គ្រឿង ។ បន្ទាប់មក ក៏បានបន្តទៅចាប់នៅចំណុចបន្ទប់ជួលជិតរោងចក្រC7 ស្ថិតក្នុងភូមិដីថ្មី សង្កាត់គោកឃ្លៀង ខណ្ឌសែនសុខ បានចំនួន៦នាក់ ព្រមទាំងដកហូតបានកាបូប ដែលក្រុមនេះឆក់បានកន្លងមកជាច្រើនទៀត ។
តាមប្រភពឲ្យដឹងថា នៅមុនពេលឈានដល់ការចាប់ខ្លួនក្រុមដៃស្អិតទាំងនេះ កម្លាំងនគរបាលបានចេញល្បាតពួនស្ទាក់បទល្មើសនៅក្នុងមូលដ្ឋាន ។ ខណៈនោះបានប្រទះឃើញជនសង្ស័យ៣នាក់ ជិះម៉ូតូម៉ាកហុងដាឌ្រីមសេ១២៥មួយគ្រឿង និងម៉ាកស៊ុយហ្ស៊ុយគីលែត១គ្រឿង បម្រុងឆក់កាបូបជនជាតិចិនម្នាក់ ។
ប៉ុន្តែមិនទាន់បានឆក់ផង ក៏ត្រូវបានកម្លាំងដេញតាមឃាត់បានម្នាក់និងដកហូតបានម៉ូតូ១គ្រឿង ចំណែកបក្សពួក២នាក់ទៀត ជិះម៉ូតូហុងដាឌ្រីមគេចបាត់ ។
ចែករំលែកព័តមាននេះ