រាជធានីភ្នំពេញ ៖ កម្ពុជាទទួលបានសិទ្ធិធ្វើជាម្ចាស់ផ្ទះនៃការប្រកួតកីឡាតេក្វាន់ដូក្របខណ្ឌយុវជនអាស៊ានលើកទី១១ ដែលការប្រកួតនឹងប្រព្រឹត្តធ្វើនៅពហុកីឡដ្ឋានជាតិពីថ្ងៃទី៧ដល់ថ្ងៃទី៩ មេសា ខាងមុខ ។ លោកហែម សំណាង អគ្គលេខាធិការខេមរសហព័ន្ធកីឡាតេក្វាន់ដូកម្ពុជាបានឱ្យដឹងថា គិតមកត្រឹមថ្ងៃនេះក្រៅពីកម្ពុជាជាម្ចាស់ផ្ទះមានប្រទេសចំនួន៦ហើយ ដែលបានឆ្លើយតបជាផ្លូវការ សរុបកីឡាករ កីឡាការិនីទាំងអស់មាន២៧៧នាក់ ក្នុងនោះកម្ពុជាមាន៥៩នាក់ ហ្វ៊ីលីពីនមាន៤៦នាក់ សិង្ហបុរីមាន២២នាក់ ម៉ាឡេស៊ីមាន១២នាក់ វៀតណាមមាន១២០នាក់ ឡាវមាន១២នាក់ និងប្រទេសថៃមាន៦នាក់។ ចំណែកឯវិញ្ញាសាដែលដាក់ឱ្យប្រកួតមានផ្នែកប្រយុទ្ធយុវជនអាយុក្រោម១៧ឆ្នាំ បុរស-នារី ផ្នែកប្រយុទ្ធយុវជនអាយុក្រោម១៧ឆ្នាំ បុរស-នារី វិញ្ញាសាសម្តែងយុវជនអាយុ១៧-១៩ឆ្នាំ និងវិញ្ញាសាសម្តែងមនុស្សចាស់អាយុ៣១ឆ្នាំឡើង ។ រីឯមេដាយដែលត្រៀមសម្រាប់ផ្តល់ឱ្យមានមេដាយមាស៧០ មេដាយប្រាក់៧០ និងសំរឹទ្ធិ១៤០ សរុបទាំងអស់២៨០មេដាយ ។
លោកហែម សំណាង បានបន្តថា បច្ចុប្បន្នយើងក៏មានជួបការលំបាកខ្លះៗដែរចំពោះរឿងថវិកាព្រោះយើងនៅពុំទាន់មានគ្រប់គ្រាន់នៅឡើយទេ ប៉ុន្តែយើងបានការជួយឧបត្ថម្ភមួយចំនួនពីលោកថោង ខុន រដ្ឋមន្ត្រីក្រសួងទេសចរណ៍ និងមួយចំនួនទៀតពីគណៈកម្មាធិការជាតិអូឡាំពិកកម្ពុជា ហើយទោះបីជាយ៉ាងណាបញ្ហានេះមិនបានរំខានដល់ការប្រកួតទេ ។ ដោយឡែកខាងសហព័ន្ធកីឡាតេក្វាន់ដូអាស៊ានវិញ គេក៏បានជួយជំរុញមានការចូលរួមប្រកួតឱ្យបានច្រើនពីបណ្តាប្រទេសផ្សេងៗ ។ ម្យ៉ាងទៀតក្នុងចំណោមប្រទេសជាសមាជិកទាំងអស់ ប្រទេសវៀតណានមិនត្រឹមតែបញ្ជូនកីឡាករ កីឡាការិនីរបស់ខ្លួនមកចូលរួមប្រកួតច្រើនជាងគេប៉ុណ្ណោះទេ ថែមទាំងបានចាត់បញ្ជូនអ្នកជំនាញ៥នាក់ មកជួយរៀបចំខាងបច្ចេកទេស ជួយផ្តល់ម៉ាស៊ីនផ្តល់ពិន្ទុ និងអាវពាក់ប្រកួតដែលមានប្រព័ន្ធអេឡិចត្រូនិកទៀតផង ។ ចំណែកប្រទេសដែលអវត្តមាន គឺមានទីម័រខាងកើត ព្រុយណេ មីយ៉ាន់ម៉ា និងឥណ្ឌូណេស៊ី ប៉ុន្តែឥណ្ឌូណេស៊ីគេបានចាត់បញ្ជូនអាជ្ញាកណ្តាល និងចៅក្រមរបស់គេមកជួយក្នុងការប្រកួតនេះដែរ ។ ចំពោះអាជ្ញាកណ្តាល និងចៅក្រមកាត់ក្តីគឺមានចម្រុះ ។
លោកហែម សំណាង បានបន្តទៀតថា តាមពិតឥណ្ឌូណេស៊ីក៏ត្រូវមកចូលរួមក្នុងការប្រកួតនេះដែរ ប៉ុន្តែដោយសារតែគេជាប់រវល់ធ្វើមហាសន្និបាតប្រចាំឆ្នាំនៅក្នុងសហព័ន្ធកីឡាតេក្វាន់ដូរបស់គេ ហើយការរៀបចំរចនាសម្ព័ន្ធគណៈកម្មការប្រតិបត្តិមិនទាន់រួចរាល់ ទើបមានការអាក់ខានបែបនេះ ។ លោកប្រាប់ទៀតថា ទោះបីជាយ៉ាងណា ការប្រកួតនេះមានការរអាក់រអួលបន្តិច ដោយសារតែបណ្តាប្រទេសនីមួយៗទើបតែរៀបចំធ្វើមហាសន្និបាតហើយ ៕
ចែករំលែកព័តមាននេះ