ចេញដីកាឃុំខ្លួនសកម្មជនបក្សប្រឆាំងរូបនេះ…!
- ភ្នំពេញ
រាជធានីភ្នំពេញ ៖ ព្រឹកថ្ងៃទី២០ ខែមករាលោកចៅក្រម ម៉ុង មុនីសោភា បានសម្រេចចេញដីកាឃុំខ្លួនលោក គង់ ម៉ាស់ សកម្មជនគណបក្សប្រឆាំង…
រាជធានីភ្នំពេញ ៖ ព្រឹកថ្ងៃទី២០ ខែមករាលោកចៅក្រម ម៉ុង មុនីសោភា បានសម្រេចចេញដីកាឃុំខ្លួនលោក គង់ ម៉ាស់ សកម្មជនគណបក្សប្រឆាំង…
រាជធានីភ្នំពេញ ៖ ព្រឹកថ្ងៃទី២០ ខែមករាលោកចៅក្រម ម៉ុង មុនីសោភា បានសម្រេចចេញដីកាឃុំខ្លួនលោក គង់ ម៉ាស់ សកម្មជនគណបក្សប្រឆាំង បន្ទាប់ពីលោក អ៊ុំ សុភក្តី ព្រះរាជអាជ្ញារងអមសាលាដំបូងរាជធានីភ្នំពេញ នៅថ្ងៃទី១៩ ខែមករា បានចោទប្រកាន់ចំនួន២បទល្មើសពាក់ព័ន្ធនឹងការប្រមាថសម្តេចតេ
ជោនាយករដ្ឋមន្ត្រី ហ៊ុន សែន និងញុះញង់បង្កចលាចលក្នុងសង្គម ។
លោក លី សុផាន់ណា អ្នកនាំពាក្យអយ្យការអមសាលាដំបូងរាជធានីភ្នំពេញ បញ្ជាក់ថា លោក គង់ ម៉ាស់ ត្រូវបានចោទប្រកាន់ពី«បទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបទប្រមាថ» តាមមាត្រា៤៩៥ និងមាត្រា៥០២ នៃក្រមព្រហ្មទណ្ឌ ។ យោងតាមសមត្ថកិច្ចបានឱ្យដឹងថា ក្រោយពីឃាត់ខ្លួន លោក គង់ ម៉ាស់ ត្រូវបានសមត្ថកិច្ចបញ្ជូនទៅកាន់អគ្គស្នងការដ្ឋាននគរបាលជាតិដើម្បីសាកសួរ ។ តាមការស្រាវជ្រាវវត្ថុតាងក្នុងកុំព្យូទ័រ គឺមានឯកសារសំខាន់ៗជាច្រើនដែលទាក់ទងនឹងផែនការប៉ុនប៉ងផ្តួលរំលំរាជរដ្ឋាភិបាល តាមបញ្ជារបស់បុគ្គល សម រង្សុី ។
គួររំឭកថា កាលពីថ្ងៃទី១៤ ខែមករាកន្លងទៅ លោក កែវ សុធា ព្រះរាជអាជ្ញាអមសាលាដំបូងរាជធានីភ្នំពេញ បានចេញដីកាបញ្ជាឲ្យបុគ្គល គង់ ម៉ាស់ បង្ហាញខ្លួននៅនាយកដ្ឋានសន្ដិសុខផ្ទៃក្នុងនៃក្រសួងមហាផ្ទៃ ឲ្យបានមុនថ្ងៃទី១៤ ខែកុម្ភៈ ឆ្នាំ២០១៩ ដើម្បីសាកសួរលើបណ្ដឹងព្រហ្មទណ្ឌ ពីបទធ្វើសកម្មភាពប្រមាថ
ប្រមុខរាជរដ្ឋាភិបាល និងញុះញង់ដោយប្រើខ្សែអាត់វីដេអូផ្សព្វផ្សាយនាពេលកន្លងមកតាមប្រព័ន្ធហ្វេសប៊ុក ក្នុងគោលបំណងឲ្យសាធារណជន និងប្រជាពលរដ្ឋទូទៅមានការស្អប់ខ្ពើម បង្កជាភាពចលាចល អសន្ដិសុខក្នុងប្រទេស ចំពោះរាជរដ្ឋាភិបាលដែលដឹកនាំដោយសម្ដេចតេជោ ហ៊ុន សែន ។
មេធាវីការពារក្តីឲ្យលោក គង់ ម៉ាស់ គឺលោក សំ សុគង់ ត្រូវបានដកស្រង់សម្តីដោយវិទ្យុក្រៅស្រុកថា ការចោទប្រកាន់កូនក្តីរបស់លោកបែបនេះ គឺជារឿងអយុត្តិធម៌បំផុត ព្រោះកូនក្តីរបស់លោកគ្រាន់តែប្រើប្រាស់សិទ្ធិរបស់ខ្លួនដែលមានចែងក្នុងច្បាប់ប៉ុណ្ណោះ ។ លោកបន្តថា តុលាការផ្អែកលើសាររបស់លោក គង់ ម៉ាស់ ដែលបានសរសេរនៅតាមបណ្ដាញសង្គម រិះគន់ពីតម្លៃកសិផលចុះថោក និងការរំលោភសិទ្ធិមនុស្សជាដើម មកដាក់បន្ទុកលើកូនក្តីលោក ។
តាមប្រភពដដែលបន្តថា នៅមុនពេលបញ្ជូនទៅពន្ធនាគារព្រៃស លោក គង់ ម៉ាស់ បានសរសេរលិខិតមួយច្បាប់បញ្ជាក់អំពីគោលជំហររបស់លោកថា កិច្ចការដែលលោកធ្វើកន្លងមក គឺដើម្បីប្រទេសជាតិ ហើយលោកនៅតែមានជំហររឹងមាំដដែល ។ ក្នុងលិខិតនោះ លោក គង់ ម៉ាស់ បានសុំឲ្យប្រជាពលរដ្ឋខ្មែរជួយផ្ដល់កម្លាំងចិត្ត និងសេដ្ឋកិច្ចដល់គ្រួសាររបស់លោកផង ព្រោះពេលនេះលោកមិនអាចធ្វើអ្វីបានទៀតនោះទេ ៕
ចែករំលែកព័តមាននេះ