រាជធានីភ្នំពេញ ៖ តារាមនុស្សធម៌ អឹុម ជីវ៉ា នៅតែប្រកាន់គោលការណ៍ចែករំលែកក្តីស្រឡាញ់ដល់តារាសិល្បៈចាស់ថ្មី មិនប្រកាន់រាល់ពេលមានការជួបនូវរឿងរ៉ាវណាមួយ។ ម្ល៉ោះហើយលោកអឹុម ជីវ៉ា គេឃើញចូលរួមក្នុងពិធីបុណ្យសពអ្នកគ្រូ…
រាជធានីភ្នំពេញ ៖ តារាមនុស្សធម៌ អឹុម ជីវ៉ា នៅតែប្រកាន់គោលការណ៍ចែករំលែកក្តីស្រឡាញ់ដល់តារាសិល្បៈចាស់ថ្មី មិនប្រកាន់រាល់ពេលមានការជួបនូវរឿងរ៉ាវណាមួយ។ ម្ល៉ោះហើយលោកអឹុម ជីវ៉ា គេឃើញចូលរួមក្នុងពិធីបុណ្យសពអ្នកគ្រូ គង់ ណារី អង្គុយមុខស្រពោននៅនឹងមុខមឈូស ហើយរូបភាពនេះលោកតែងតែធ្វើជាដរាបរាល់ពេលអ្នកសិល្បៈបានចែកឋាន។
ការសម្តែងនូវសណ្តានចិត្តចូលរួមក្នុងពិធីបុណ្យសពដែលកម្របាត់មុខជាចលករមួយជម្រុញឲ្យលោកអឹុម ជីវ៉ា ដូចតារាគម្រូក្នុងសិល្បៈ ហើយក៏បានប្រែក្លាយចិត្តតារាជាច្រើនផ្សេងទៀតងាកមករួបរួមគ្នាជាមួយលោកជីវ៉ា កាន់តែច្រើន និងរឹតតែបង្ហាញថា សិល្បៈពិតជាមានការរាប់អានស្រឡាញ់គ្នានៅពេលគេមើលមក។
ក្នុងពិធីបុណ្យសពអ្នកគ្រូ គង់ ណារី លោកអឹុម ជីវ៉ា បានចូលរួម ហើយក៏ឃើញមានវត្តមានតារាជាច្រើនទៀតដែលនេះក៏ជាកម្លាំងចិត្តមួយដ៏សំខាន់សម្រាប់ក្រុមគ្រួសារសពដែលកំពុងតែមានរឿងសោកសៅ។
លោកអឹុម ជីវ៉ា បានឲ្យដឹងថា អ្នកចូលរួមបុណ្យសព គឺបានបុណ្យច្រើន និងជាការលើកទឹកចិត្តមួយដ៏ធំសម្រាប់គ្រួសារនៃសព លោកមិនដែលប្រកាន់តមមិនទៅនោះទេ។ មិនមែនតែសពនៅភ្នំពេញនោះទេ សពតារានៅតាមខេត្តក៏លោកឆ្លៀតទៅចូលរួម។ លោកជីវ៉ាបន្តថា មកពីលោកធ្លាប់បួសរៀន ទើបដឹង ទើបប្រកាន់ជំហរមិនចោលបុណ្យសព។ លោកមិនគិតរឿងឆុង ឬធ្លាក់យីអ៊ុនឡើយ ដោយសារមូលហេតុនេះហើយ ទើបធ្វើឲ្យបណ្តាបុណ្យសពអ្នកសិល្បៈខ្លះខ្សត់ញាតិមិត្តកាន់តែស្រងេះស្រងោច បើអាចយើងគួរឆ្លៀតបង្ហាញសញ្ញានេះទាំងអស់គ្នា។
ជាថ្មីម្តងទៀតសពអ្នកគ្រូ គង់ ណារី តម្កល់នៅវត្តស្រះចក ហើយនឹងធ្វើពិធីបូជានៅយប់ថ្ងៃពុធ ទី២៣ មករា ឆ្នាំ២០១៩ នាវេលាម៉ោង៩យប់។ ដូចនេះសូមជូនដំណឹងម្តងទៀត សម្រាប់សិល្បករទាំងអស់គ្រប់ជំនាន់ មេត្តាចូលរួម ប្រសិនបើមិនរវល់ភារកិច្ចចាំបាច់។
ចែករំលែកព័តមាននេះ