រាជធានីភ្នំពេញ ៖ មន្ត្រីក្រសួងការពារជាតិបានឲ្យដឹងនៅថ្ងៃទី២០ ខែមករា ឆ្នាំ២០១៩នេះថាកាលពីចុងសប្តាហ៍មុន នៅរសៀលថ្ងៃទី១៨ ខែមករា ឆ្នាំ២០១៩ នៅបញ្ជាការដ្ឋានតំបន់ប្រតិបត្តិការសឹករងកំពង់ធំបានចុះហត្ថលេខាផ្ទេរប្រគល់អដ្ឋិធាតុកងទ័ពស្ម័គ្រចិត្តវៀតណាម ចំនួន១៨អដ្ឋិធាតុដែលបានជីករុករកឃើញ នៅក្នុងភូមិសាស្ត្រខេត្តកំពង់ធំ ក្នុងជំហានទី១ ដំណាក់កាលទី១៨ រដូវប្រាំង ឆ្នាំ២០១៨-២០១៩ ។
ដែលមានសមាសភាពភាគីថ្នាក់ដឹកនាំបញ្ជាការដ្ឋានតំបន់ប្រតិបត្តិការសឹករងកំពង់ធំ ដើម្បីធ្វើមាតុភូមិនិវត្តន៍ទៅកាន់មាតុប្រទេសនៃសាធារណរដ្ឋសង្គមនិយមវៀតណាមវិញ ។
សូមបញ្ជាក់ថា អដ្ឋិធាតុកងទ័ពស្ម័គ្រចិត្តវៀតណាមដែលកងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំសហការជាមួយក្រុមបច្ចេកទេស (K70+K72) រួមជាមួយអាជ្ញាធរដែនដី ប្រជាពលរដ្ឋ នៅទូទាំងខេត្តកំពង់ធំបានជីករុករកឃើញតាំងពីឆ្នាំ២០០៣ រហូតមកដល់២០១៩ ពេលនេះមានចំនួន១,១០០អដ្ឋិធាតុរួចហើយ (ក្នុងនោះសហការជីកយកបាននៅក្រៅខេត្តកំពង់ធំ បានចំនួន០៨អដ្ឋិធាតុ) ដែលបានធ្វើមាតុភូមិនិវត្តន៍ ។
យោងតាមក្រសួងការពារជាតិកម្ពុជាបានអះអាងថា ប្រតិបត្តិការស្វែងរកអដ្ឋិធាតុនេះដឹកនាំដោយឧត្តមសេនីយ៍ទោ សោម ស៊ុន មេបញ្ជាការរងយោធភូមិភាគទី៤ និងជាមេបញ្ជាការតំបន់ប្រតិបត្តិការសឹករងកំពង់ធំ ព្រមទាំងថ្នាក់ដឹកនាំ គណៈកម្មការជីករុករកអដ្ឋិធាតុនៃបញ្ជាការដ្ឋានតំបន់ប្រតិបត្តិការសឹករងកំពង់ធំចំនួន២៥នាក់ និងភាគីថ្នាក់ដឹកនាំបញ្ជាការដ្ឋានយោធាខេត្តប៊ិញភឿកនៃសាធារណរដ្ឋសង្គមនិយមវៀតណាមដឹកនាំដោយវរសេនីយ៍ឯក ទ្រិញ ថាញ់ តាមមេបញ្ជាការរងបញ្ជាការដ្ឋានយោធាខេត្តប៊ិញភឿក រួមជាមួយក្រុមបច្ចេកទេសជីករុករកអដ្ឋិធាតុ (K72) ចំនួន២២នាក់ ។ លោកបានថ្លែងបញ្ជាក់ទៀតថា «យើងនឹងបន្តសហការជីករុករកបន្តអដ្ឋិធាតុដែលនៅសេសសល់ប្រមាណ៣៥ទៅ៤០អដ្ឋិធាតុទៀតនៅជំហានទី២ ដំណាក់កាលទី១៨ រដូវប្រាំងឆ្នាំ២០១៨-២០១៩ នៅពេលខាងមុខទៀត» ៕
ចែករំលែកព័តមាននេះ