ខេត្តរតនគិរី ៖ បុរសម្នាក់បានស្លាប់ភ្លាមៗក្រោយពីហូបស្រាបៀ និងហូបដំឡូងមីស្ងោរ ដែលហេតុការណ៍នេះបានកើតឡើងកាលពីវេលាម៉ោងប្រហែល៦និង៣០នាទីព្រឹកថ្ងៃទី២០ មករា ២០១៩ ស្ថិតនៅភូមិតាណង ឃុំតាឡាវ ស្រុកអណ្តូងមាស។
ជនរងគ្រោះដែលស្លាប់ឈ្មោះ សំ ពូលី ភេទប្រុស អាយុ៣៩ឆ្នាំ មុខរបរកម្មករស៊ីឈ្នួលលើកដំឡូងអោយអ្នកភូមិ និងមានស្រុកកំណើតភូមិដើមដូង ឃុំកំពុងឈូក ស្រុកកអណ្តែត ខេត្តតាកែវ ចំណែកប្រពន្ធរបស់ជនរងគ្រោះឈ្មោះ វ៉ន វី អាយុ៣៧ឆ្នាំ និងមានកូន២នាក់។
បើតាមប្រភពព័ត៌មានពីសមត្ថកិច្ចប៉ូលិសមូលដ្ឋានបានអោយដឹងថា តាមការរៀបរាប់ពីប្រពន្ធនិងសាច់ញាតិជនរងគ្រោះបានឱ្យដឹងថា នៅមុនពេលកើតហេតុ ជនរងគ្រោះបានស្ងោរដំឡូងមី១ឆ្នាំង រួចជនរងគ្រោះនិងមិត្តភក្តិ២-៣នាក់ជាកម្មករដូចគ្នាបានអង្គុយហូបស្រាបៀអស់២-៣កំប៉ុងទាំងព្រឹក បន្ទាប់មកជនរងគ្រោះបានយកដំឡូងមីដែលស្ងោរឆ្អិនមកហូបអស់២ដុំម្នាក់ឯង លុះបានរយៈពេលប្រហែល២០នាទីក្រោយមក ជនរងគ្រោះបានដួលប្រកាច់ហៀរទឹកមាត់ ឃើញដូច្នេះបងប្អូនសាច់ញាតិបានដឹកជនរងគ្រោះទៅមណ្ឌលសុខភាពស្រុកអណ្តូងមាសដែលមានចំងាយ៥-៦គីឡូម៉ែត្រ ហើយជនរងគ្រោះក៏បានស្លាប់នាពាក់កណ្តាលផ្លូវ ហើយបងប្អូនសាច់ញាតិរបស់ជនរងគ្រោះបានរាយការណ៍ទៅសមត្ថកិច្ចដើម្បីឱ្យចុះមកពិនិត្យ ។
សមត្ថកិច្ចបានបន្តទៀតថា បើតាមការត្រួតពិនិត្យ ជាលទ្ធផលរកឃើញថា ជនរងគ្រោះពិតជាពុលដំឡូងមីបណ្តាលឱ្យស្លាប់ពិតប្រាកដមែនគ្មានរឿងឃាតកម្មកើតឡើងនោះទេ។ បច្ចុប្បន្នសពត្រូវបានប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណី៕
ចែករំលែកព័តមាននេះ