វៀតណាម ៖ តាមប្រភពព័ត៌មាន Oddity Central បានឱ្យដឹងថា ស្ត្រីចំណាស់វ័យ៦៣ឆ្នាំម្នាក់ ដែលគ្រូពេទ្យគិតថា មានដុំសាច់នៅបំពង់ក ត្រូវបានរកឃើញសត្វឈ្លើងមួយក្បាលប្រវែង៦អ៊ីញ នៅក្នុងបំពង់ករបស់គាត់ ដែលរស់នៅទីនោះអស់រយៈពេលជាង៣ខែទៅហើយ។
លោកយាយមិនត្រូវបានគេបញ្ចេញឈ្មោះឱ្យដឹងនោះទេ។ គាត់រស់នៅក្នុងខេត្តតំបន់ភ្នំ Ha Giang ជាមួយនឹងអាការៈឈឺក្បាលខ្លាំង ឧស្សាហ៍តឹងច្រមុះ និងតែងមានអារម្មណ៍ថា មានអ្វីហូរចុះចូលក្នុងបំពង់កអស់រយៈពេលច្រើនសប្តាហ៍។ ដោយសារតែទ្រាំមិនបាន លោកយាយក៏ទៅជួបគ្រូពេទ្យឯកទេសខាងត្រចៀកច្រមុះបំពង់ ទើបដឹងថា មានដុំសាច់មួយដុំនៅក្នុងបំពង់ក។
ស្រាប់តែពេលវះកាត់ គ្រូពេទ្យបានរកឃើញថា តាមការពិតវាមិនមែនជាដុំសាច់នោះទេ។ តែវាជាសត្វឈ្លើងមួយក្បាល ដែលទាមជាប់ជាមួយនឹងសាច់បំពង់ករបស់លោកយាយ។ វាមានប្រវែងដល់ជិត៦អ៊ីញ បើតាមវីដេអូដែលបង្ហោះដោយ លោកវេជ្ជបណ្ឌិត Nguyen Thanh Nam ដែលជានាយករងមន្ទីរពេទ្យនៅខេត្ត Ha Giang ។
គេនៅមិនទាន់ដឹងពីមូលហេតុនៅឡើយទេថា សត្វឈ្លើងមួយក្បាលនោះអាចចូលតាមរបៀបណា។ តែលោកវេជ្ជបណ្ឌិតថា វាអាចមកពីការផឹកទឹកមិនស្អាត ដែលមានសត្វឈ្លើងនៅក្នុងនោះ។ បើតាមរោគសញ្ញារបស់លោកយាយ គេអាចស្មានដឹងថា សត្វឈ្លើងមួយក្បាលនោះអាចចូលតាំងពី៣ខែមុនមកម្ល៉េះ។ បើមិនយកចេញទេ វានឹងអាចឡើងទៅដល់ប្រហោងឆ្អឹងមុខ ហើយបង្កឱ្យមានគ្រោះថ្នាក់ដល់ជីវិតបើចូលក្នុងបំពង់ខ្យល់៕ ប្រភពវីដេអូពី ៖ Most Recent
ចែករំលែកព័តមាននេះ