ខេត្តត្បូងឃ្មុំ ៖ បើតាមសេចក្តីរាយការណ៍បឋមបានឱ្យដឹងថា តាមលោកឧត្តមសេនីយ៍ទោ បែន រ័ត្ន ស្នងការនគរបាលខេត្តត្បូងឃ្មុំបានប្រាប់ថា មុននេះ មានគ្រោះថ្នាក់ចរាចរណ៍មួយបានកើតឡើង ដោយសាររថយន្តតារាកំប្លែងនាយកុយ…
ខេត្តត្បូងឃ្មុំ ៖ បើតាមសេចក្តីរាយការណ៍បឋមបានឱ្យដឹងថា តាមលោកឧត្តមសេនីយ៍ទោ បែន រ័ត្ន ស្នងការនគរបាលខេត្តត្បូងឃ្មុំបានប្រាប់ថា មុននេះ មានគ្រោះថ្នាក់ចរាចរណ៍មួយបានកើតឡើង ដោយសាររថយន្តតារាកំប្លែងនាយកុយ និងនាយក្រិន បែកកង់
រួចរ៉េចង្កូតទៅបុកដើមឈើ បង្កឱ្យមានការភ្ញាក់ផ្អើលកាលពីវេលាម៉ោង៥និង៥០នាទីព្រឹក ថ្ងៃទី២០ ខែមករា ឆ្នាំ២០១៩ នៅលើផ្លូវជាតិលេខ៧៣ ស្ថិតក្នុងភូមិថ្នល់ ឃុំតំបែរ ស្រុកតំបែរ ខេត្តត្បូងឃ្មុំ។
សេចក្តីរាយការណ៍បានបន្តទៀតថា តារាកំប្លែងរងគ្រោះខាងលើ ១-ឈ្មោះ ជួង ជី (ហៅនាយកុយ) ជាតារាកំប្លែង អាយុ៦៤ឆ្នាំ ជាអ្នកបើកបររថយន្តម៉ាកឡង់គ្រីស្ស័រ ពណ៌ស ពាក់ស្លាកលេខ ភ្នំពេញ 2AR-9968 រស់នៅរាជធានីភ្នំពេញ បានរបួសកែងដៃខាងស្តាំស្រាល និងអ្នករួមដំណើរឈ្មោះ ទេស សុជន ហៅនាយក្រិន អាយុ៣៩ឆ្នាំ រស់នៅសង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ជាតារាកំប្លែង (គ្មានរបួស)។
សេចក្តីរាយការណ៍បន្តទៀតថា មុនពេលកើតហេតុ រថយន្តម៉ាកឡង់គ្រីស្ស័រ ដែលបើកបរដោយតារាកំប្លែងជួង ជី (ហៅនាយកុយ) និងអ្នករួមដំណើរលោក ទេស សុជន ហៅនាយក្រិន ដោយបានធ្វើដំណើរខេត្តរតនគិរីឆ្ពោះទៅរាជធានីភ្នំពេញ លុះមកដល់ចំណុចកើតហេតុ
ស្រាប់តែបែកកង់រ៉េចង្កូតទៅបុកដើមឈើដោយខ្លួនឯង បណ្តាលឱ្យតារាកំប្លែងនាយកុយរងរបួសស្រាលនៅកែងដៃខាងស្តាំ ចំណែកនាយក្រិនពុំមានរងរបួសអ្វីឡើយ រីឯរថយន្តរងការខូចខាតយ៉ាងដំណំ ។
សេចក្តីរាយការណ៍ឱ្យដឹងទៀតថា ខណៈពេលនេះសមត្ថកិច្ចបានកំពុងអន្តរាគមន៍ និងត្រួតពិនិត្យនៅកន្លែងកើតហេតុ។
ចែករំលែកព័តមាននេះ