ខេត្តប៉ៃលិន ៖ បន្ទាប់ពីប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន នាយករដ្ឋមន្ត្រីបានដាក់បញ្ជាឲ្យដកស្ថាប័នមួយចំនួនចេញពីច្រកទ្វារព្រំដែននោះ ពេលនេះឈ្មួញក្នុងស្រុកកំពុងសប្បាយរីករាយក្នុងការដឹកជញ្ជូនទំនិញ ពិសេសកសិផលទៅលក់នៅប្រទេសថៃ ដោយមិនសូវមានការរំខានពីមន្ត្រីនានាឡើយ…
ខេត្តប៉ៃលិន ៖ បន្ទាប់ពីប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន នាយករដ្ឋមន្ត្រីបានដាក់បញ្ជាឲ្យដកស្ថាប័នមួយចំនួនចេញពីច្រកទ្វារព្រំដែននោះ ពេលនេះឈ្មួញក្នុងស្រុកកំពុងសប្បាយរីករាយក្នុងការដឹកជញ្ជូនទំនិញ ពិសេសកសិផលទៅលក់នៅប្រទេសថៃ ដោយមិនសូវមានការរំខានពីមន្ត្រីនានាឡើយ ជាពិសេសមន្ត្រីកាំកុងត្រូល ។
បើតាមឈ្មួញដែលដឹកកសិផលចេញពីទឹកដីខេត្តប៉ៃលិនទៅលក់នៅប្រទេសថៃតាមច្រកទ្វារអន្តរជាតិព្រំបានឲ្យដឹងកាលពីថ្ងៃទី១៤ មករា ថា ជារៀងរាល់លើក នៅពេលអ្នកស្រីដឹកកសិផលយកទៅលក់នៅប្រទេសថៃម្តងៗ គឺត្រូវបង់ឱ្យគ្រប់ស្ថាប័នពាក់ព័ន្ធទាំងអស់ដែលប្រចាំការនៅច្រកទ្វារអន្តរជាតិព្រំនេះ ដោយក្នុង១ជើងៗអស់ជាង១០ម៉ឺនរៀល, បង់ថ្លៃរថយន្ដបើប្រភេទទួរីស អស់២០ម៉ឺនរៀល ហើយបើរថយន្ដច្នៃធំត្រូវបង់៤០ម៉ឺនរៀល ។
អ្នកស្រីម៉ៅ ដែលជាឈ្មួញរូបនេះបានប្រាប់កោះសន្ដិភាពថា ៖« ពេលនេះទាំងគេទាំងខ្ញុំមានក្ដីសប្បាយរីករាយយ៉ាងខ្លាំង ពិសេសក្រោយពីសម្ដេចតេជោ បញ្ជាឲ្យដកស្ថាប័នមួយចំនួនដោយទុកតែ២ស្ថាប័ននោះ ហើយសង្ឃឹមថា ពេលក្រោយនឹងនៅសល់ត្រឹម២ស្ថាប័នប្រចាំការនៅច្រកទ្វារប៉ុណ្ណោះ ហើយការបង់ពន្ធក៏មិនសូវអស់ច្រើនដូចសព្វមួយដងដែរ »។
ទោះយ៉ាងណាក្ដី អ្នកស្រីថា ៖« រហូតមកដល់រសៀលថ្ងៃទី១៤ ខែមករាហើយ ស្ថានភាពច្រកទ្វារអន្តរជាតិព្រំ ហាក់ដូចជាអត់មានការប្រែប្រួលអ្វីនោះទេ ដោយសង្កេតឃើញ ខាងស្ថាប័នកាំកុងត្រូលនៅតែប្រចាំការដដែល ហើយពួកខ្ញុំសង្ឃឹមជឿជាក់ថា ស្ថាប័នមួយនេះ និងស្ថាប័នមួយចំនួនទៀតដែលសម្តេចប្រកាសនោះ នឹងរុះរើចេញឆាប់ៗ ហើយក៏អាចជួយកាត់បន្ថយការចំណាយក្នុងការបង់ជូនពួកគេទាំងនោះផងដែរ »។
ស្រដៀងគ្នានេះដែរ កសិករម្នាក់ដែលសុំរៀបរាប់ក្នុងលក្ខខណ្ឌមិនបញ្ចេញឈ្មោះ បានឲ្យដឹងដែរថា លោកតែងដឹកស្វាយកែវរមៀតពីខេត្តកំពតឆ្លងកាត់ច្រកទ្វារអន្តរជាតិព្រំនេះរាល់ដង ។
លោកបន្ដថា ការរកស៊ីរបស់គាត់មិនសូវចំណេញទេ ដោយសារតែត្រូវបង់តាមប៉ុស្ដិ៍គ្រប់កន្លែងទាំងខាងភាគីខ្មែរ និងថៃ ហើយតម្លៃទីផ្សារប្រែប្រួលចុះឡើងទៀត ។ លោកនិយាយថា ៖« នៅច្រកទ្វារអន្តរជាតិព្រំនេះ ខ្ញុំត្រូវបង់គិតទាំងខាងខ្មែរ និងថៃ ក្នុង១រថយន្តច្នៃធំ មានទម្ងន់ជាង២០តោន អស់ទឹកប្រាក់៤០ម៉ឺនរៀល ហើយបើឈ្មួញថៃឲ្យថ្លៃខ្ពស់ ខ្ញុំអាចចំណេញបានខ្លះ ប៉ុន្តែមានពេលខ្លះ ក៏ខាតដើមខាតចុងដែរ ព្រោះទិញចូលថ្លៃ បូករួមទាំងការចំណាយលលដើរទិញតាមចម្ការរបស់ប្រជាពលរដ្ឋ »។
ទោះបីយ៉ាងណា ក្រោយពេលសម្ដេចតេជោ ហ៊ុន សែន បានដាក់បទបញ្ជាកន្លងមកនោះ លោកដែលជាឈ្មួញតូចតាចមានក្ដីសប្បាយរីករាយយ៉ាងខ្លាំង ហើយសង្ឃឹមថាស្ថាប័នទាំងនោះនឹងរុះរើឆាប់ៗតាមបទបញ្ជា ដោយទុកតែស្ថាប័នគយ និងប៉ូលិសអន្តរប្រវេសន៍ ដើម្បីធ្វើកិច្ចការតាមព្រំដែន ។
សូមរំឭថា ក្នុងពិធីជួបជុំអ្នកសារព័ត៌មានប្រចាំឆ្នាំកាលពីថ្ងៃទី១១ មករា កន្លងមក សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានដាក់បញ្ជាថា ចាប់ពីពេលនេះតទៅ មន្ដ្រីដែលត្រូវដាក់ប្រចាំការស្របច្បាប់នៅតាមច្រកទ្វារព្រំដែនអន្ដរជាតិទូទាំងប្រទេស គឺមានតែមន្ដ្រីគយ និងមន្ដ្រីនគរបាលអន្ដោប្រវេសន៍ប៉ុណ្ណោះ ក្រៅពីនេះត្រូវបញ្ជាឲ្យដកចេញ ។
សម្ដេចតេជោបានថ្លែងយ៉ាងដូច្នេះថា ៖«ខ្ញុំបានសម្រេចអម្បាញ់មិញ មាត់ច្រកនៅតាមតាមព្រំដែនក្នុងការនាំចេញនាំចូល អត់មានតម្រូវស្ថាប័នណាក្រៅតែពីអន្ដោប្រវេសន៍ និងគយ មានតែ២នេះ ក្រៅពីនោះដកចេញឲ្យអស់ ទាំងអាកាំកុងត្រូល ទាំងស្អីដកចេញឲ្យអស់។ អាហ្នឹងវាកើតទៅជាឧបសគ្គ នៃការរារាំងការធ្វើពាណិជ្ជកម្មទៅវិញទេ ។ អីចឹង បើទុកវានាំតែខាតដដែល ទុកតែប៉ូលិសអន្ដោប្រវេសន៍ អាហ្នឹងវាត្រូវវៃត្រា និងគយបានហើយ »៕
ចែករំលែកព័តមាននេះ