រាជធានីភ្នំពេញ ៖ រាជរដ្ឋាភិបាលកម្ពុជាបានចេញសេចក្តីថ្កោលទោសដល់ក្រុមហ៊ុនផលិតបង្គន់ ដែលបានប្រើរូបភាពប្រាសាទខ្មែរបិទនៅលើគម្រប់បង្គន់ និងទ្រាជាន់ជើង ហើយទាមទារឲ្យក្រុមហ៊ុន Amazon បញ្ឈប់សកម្មភាពប្រើប្រាស់ជាបន្ទាន់ ព្រោះប៉ះពាល់កិត្តិយសនិងសេចក្តីថ្លៃថ្នូររបស់កម្ពុជា ។
ឯកឧត្តម ជុំ សុន្ទរី អគ្គរាជទូតកម្ពុជាប្រចាំនៅអាមេរិកបានឲ្យដឹងថា រាជរដ្ឋាភិបាលកម្ពុជាបានថ្កោលទោសនឹងស្នើឱ្យក្រុមហ៊ុន Amazon ដែលជាក្រុមហ៊ុនបង្កើតទីផ្សារអនឡានអន្តរជាតិឲ្យបញ្ឈប់ជាបន្ទាន់នូវការលក់ផលិតផលប្រភេទនេះ នៅលើគេហទំព័របស់ខ្លួន ។ យោងតាមសេចក្តីប្រកាសរបស់ឯកឧត្តមឯកអគ្គរាជទូតបានថ្លែងថា ស្ថានទូតនៃព្រះរាជាណាចក្រកម្ពុជាប្រចាំសហរដ្ឋអាមេរិកមានភាពតក់ស្លុត និងស្រងាកចិត្តថា រូបភាពនៃប្រាសាទអង្គរដោយរួមមានអង្គរវត្ត តាព្រហ្ម បាយ័ន ឬបឹងមាលា ដែលត្រូវបានចុះបញ្ជីជាបេតិកភណ្ឌពិភពលោកតាំងពីឆ្នាំ១៩៩២ និងទទួលបានអត្ថប្រយោជន៍ពីអង្គការអភិរក្សអន្តរជាតិ (UNESCO) ចាប់តាំងពីឆ្នាំ២០១៧ ត្រូវបានប្រើប្រាស់ដោយក្រុមហ៊ុនផលិតទំនិញមួយចំនួនធ្វើជារូបភាពនៃផលិតផលដែលបង្កភាពអាម៉ាស់ ក្នុងនោះមានគម្របបង្គន់ កំរាលបន្ទប់ទឹក កំរាលជើងមុខបង្គន់ វាំងននងូតទឹក និងកំរាលផ្ទះបាយ ។
លើសពីនេះទៅទៀត ក្រុមហ៊ុនផលិតទាំងនេះបានប្រើប្រាស់ទង់ជាតិនៃព្រះរាជាណាចក្រកម្ពុជា សម្រាប់ជាការរចនានៃកម្រាលបន្ទប់ទឹកកម្រាលព្រំ និងបង្គន់ដែលជាទង្វើគួរអោយស្អប់ខ្ពើម ។ ទំនិញទាំងអស់ដែលបានរៀបរាប់ខាងលើត្រូវបានដាក់លក់ដោយក្រុមហ៊ុន Amazon នៅលើគេហទំព័រ amazon.com និង amazon.fr ។
សេចក្ដីជូនដំណឹងដដែលបានបញ្ជាក់យ៉ាងដូច្នេះថា ព្រះរាជាណាចក្រកម្ពុជាថ្កោលទោសបណ្តាក្រុមហ៊ុនផលិតនៃផលិតផលទាំងអស់នេះ និងទាមទារឲ្យក្រុមហ៊ុន Amazon បញ្ឈប់ជាបន្ទាន់នូវការលក់របស់ខ្លួន ដោយដកចេញពីគេហទំព័រនូវផលិតផលទាំងនេះដែលប៉ះពាល់យ៉ាងធ្ងន់ធ្ងរដល់កិត្តិយសជាតិ និងកិត្យានុភាពនៃព្រះរាជាណាចក្រកម្ពុជា ។
ស្ថានទូតបានធ្វើការតវ៉ា និងការទាមទារខាងលើជាមួយសេវាកម្មអតិថិជនរបស់ក្រុមហ៊ុន Amazon កាលពីថ្ងៃទី១៦ ខែមករា ឆ្នាំ២០១៩ ។
សូមបញ្ជាក់ថា ពាក់ព័ន្ធនឹងករណីនេះអគ្គនាយកនៃអាជ្ញាធរជាតិអប្សរាក៏បានផ្ញើលិខិតទៅកាន់ក្រុមហ៊ុន Amazon តវ៉ាចំពោះការលក់ផលិតផលទាំងនេះនៅលើគេហទំព័ររបស់ក្រុមហ៊ុន ហើយបានសង្កត់ធ្ងន់ថា វាមិនមែនជាការចាំបាច់ទេ ក្នុងការទទូចលើចរិតលក្ខណៈថោកទាប នៃការប្រើប្រាស់នេះ ហើយការផ្សព្វផ្សាយផលិតផលដែលបង្កភាពអាម៉ាស់ទាំងនេះត្រូវតែបញ្ឈប់ជាបន្ទាន់ ៕
ចែករំលែកព័តមាននេះ