រាជធានីភ្នំពេញ ៖ ប្តីប្រពន្ធមួយគូ ដែលយកឈ្មោះថ្នាក់ដឹកនាំបិទបាំងអំពើទុច្ចរិតរបស់ខ្លួនដើម្បីឆបោកអ្នកដទៃ បានត្រូវនគរបាលនាយកដ្ឋានព្រហ្មទណ្ឌ ក្រសួងមហាផ្ទៃ ចាប់ខ្លួននិងបញ្ជូនទៅសាលាដំបូងរាជធានីភ្នំពេញកាលពីរសៀលថ្ងៃទី១៦ ខែមករា ពាក់ព័ន្ធពីបទក្លែងឯកសារសាធារណៈ ប្រើប្រាស់បានលិខិតសាធារណៈក្លែង និងឆបោកប្រាក់ជិត១លានដុល្លារអាមេរិកក្នុងអំពើលក់ដីខ្យល់រាប់ពាន់ហិកតា ។
ជនជាប់ចោទជាប្តីឈ្មោះ អ៊ូច សៀកវ៉ាន់ អាយុ៥៦ឆ្នាំ និងប្រពន្ធឈ្មោះ ជៀម ចាន់បូរី អាយុ៤៩ឆ្នាំ មានទីលំនៅភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ ។ ទាក់ទិននឹងការចាប់ខ្លួនប្តីប្រពន្ធ២នាក់ខាងលើនេះបញ្ជូនទៅកាន់សាលាដំបូងរាជធានីភ្នំពេញ ត្រូវបានសមត្ថកិច្ចបង្ហើបឲ្យដឹងថា សំណុំរឿងនេះមានពាក្យបណ្តឹងពីជនរងគ្រោះចំនួន១២នាក់ ក្នុងនោះមានព្រះសង្ឃ១អង្គផងដែរ ។
ដើមចមនៃពាក្យបណ្តឹងបានឲ្យដឹងថា កាលពីអំឡុងឆ្នាំ២០១៥ ស្ត្រីឈ្មោះ ជៀម ចាន់បូរី និងប្តីឈ្មោះ អ៊ូច សៀកវ៉ាន់ បានយកឯកសារលិខិតផ្ទេរសិទ្ធិកាន់កាប់ដីធ្លីទៅបង្ហាញជនរងគ្រោះទាំងអស់ដោយអះអាងថា ពួកគេទាំង២នាក់ប្តីប្រពន្ធ មានដីរាប់ពាន់ហិកតាស្ថិតនៅភូមិក្រួស ឃុំថ្លាត ស្រុកអន្លង់វែង ខេត្តឧត្តរមានជ័យ ហើយត្រូវការលក់ឲ្យទៅក្រុមហ៊ុនចិន និងម៉ាឡេស៊ី ហើយគេបានតម្រូវឲ្យជនរងគ្រោះដាក់ប្រាក់ចូលហ៊ុនដើម្បីរៀបចំដីនោះ និងបានផលចំណេញចែកគ្នា ។
ជនរងគ្រោះទាំង១២នាក់មាន
១-ឈ្មោះអ៊ូចប៉ោ ភេទស្រី អាយុ៥៦ឆ្នាំ
២-ឈ្មោះ ដាម សុផុនភេទស្រី អាយុ៤៩ឆ្នាំ
៣-ឈ្មោះ ទួន ស្រង ភេទស្រី អាយុ៥២ឆ្នាំ
៤-ឈ្មោះ ទួន ស្រីពៅ ភេទស្រី អាយុ៥៦ឆ្នាំ
៥-ឈ្មោះ លី ពុទ្ធី ភេទប្រុស អាយុ៣៨ឆ្នាំ
៦-ឈ្មោះ សុខ ស៊ីវអេង ភេទស្រី អាយុ៥៦ឆ្នាំ
៧-ឈ្មោះ ប៉ាវ ឡន ភេទប្រុស អាយុ៦៦ឆ្នាំ
៨-ឈ្មោះ គិន ណោ ភេទស្រី អាយុ៥៥ឆ្នាំ
៩-ឈ្មោះ ឃុន ខេង ភេទស្រី អាយុ៦៣ឆ្នាំ
១០-ឈ្មោះ ប៉េង ម៉េងហ៊ាង ភេទប្រុស អាយុ៥២ឆ្នាំ
១១-ឈ្មោះ លឹម សុវណ្ណចំប៉ា ភេទស្រី អាយុ៥៤ឆ្នាំ
និង១២-ព្រះតេជគុណ ពុំ សុឃឿន ព្រះជន្ម៦៤ឆ្នាំ ។
មន្ត្រីនគរបាលនិយាយថា ក្នុងអំពើឆបោកនេះគឺម្នាក់ៗបានចំណាយប្រាក់មិនតិចជាង៥ម៉ឺនដុល្លារទេ ឲ្យទៅ២នាក់ប្តីប្រពន្ធនេះដើម្បីចង់បានប្រាក់ចំណេញមកវិញ ដែលបើតាមសរុបទឹកប្រាក់ចូលហ៊ុនប្រមូលបានជិត១លានដុល្លារអាមេរិក ។ បានជាជនរងគ្រោះនាំគ្នាសម្រុកដាក់លុយចូលហ៊ុននោះ ដោយសារពួកគេបានមើលឃើញពីទង្វើ២នាក់ប្តីប្រពន្ធ ដែលម៉ាត់ណាក៏ប្រើឈ្មោះថ្នាក់ដឹកនាំដែរ ។ មិនតែប៉ុណ្ណោះ ប្តីប្រពន្ធ២នាក់នេះ បានប្រើល្បិចនាំជនរងគ្រោះចេញទៅក្រៅប្រទេសដូចជាម៉ាឡេស៊ីជាដើម ដោយប្រាប់គេថា ទៅទូទាត់ប្រាក់ដើម្បីយកមកចែកគ្នា ប៉ុន្តែទីបំផុតដូចនាំទៅមើលមេឃមើលផ្កាយនៅស្រុកគេ បានត្រឹមអស់លុយហោប៉ៅរៀងៗខ្លួន ។
រឿងរ៉ាវបានបែកធ្លាយនិងដឹងច្បាស់ថា ប្តីប្រពន្ធ២នាក់នេះជាជនឆបោកនោះ គឺតាមរយៈនៃការស៊ើបសួរអាជ្ញាធរមូលដ្ឋាន គ្មានដីរាប់ពាន់ហិកតាណាជាកម្មសិទ្ធិរបស់ឈ្មោះ ជៀម ចាន់បូរី និងឈ្មោះ អ៊ូច សៀកវ៉ាន់ នោះទេ មានតែដីខ្យល់ ។ ដូច្នេះហើយបានជាជនរងគ្រោះនាំគ្នាដាក់ពាក្យបណ្តឹងទៅសមត្ថកិច្ច ដើម្បីសុំឲ្យជួយចាត់ការចំពោះប្តីប្រពន្ធ២នាក់នេះ ។
កាន់តែច្បាស់ទៀតនោះ នៅពេលសមត្ថកិច្ចបញ្ជូនទាំង២នាក់ប្តីប្រពន្ធនេះទៅតុលាការ គឺពួកគេបានកាន់បដាតូចមួយនៅដៃ មានសរសេរឈ្មោះថ្នាក់ដឹកនាំបង្ហាញពីឧត្តមភាព នៅចំពោះមុខដើមបណ្តឹងទាំងអស់ ដែលតាមទៅឃ្លាំមើលដល់សាលាដំបូងនោះផងដែរ ៕
ចែករំលែកព័តមាននេះ