ប្រទេសថៃ ៖ រាជធានីបាងកកនៃប្រទេសថៃ កំពុងប្រឈមមុខនឹងដំណាក់កាលដ៏អាក្រក់មួយនៃការបំពុលបរិយាកាស ដែលកើតមានចាប់តាំងពី១ឆ្នាំមកហើយ ដោយសារពុំមានខ្យល់បោកបក់ និងភ្លៀងធ្លាក់ឱ្យមានជាតិសំណើម ជួយទប់រលកកម្តៅដែលអាចរារាំងដល់ការបំពុលបរិយាកាសនេះ ។
ជាវិធានការ អាជ្ញាៃថបានត្រៀមបង្កើតភ្លៀងសិប្បនិម្មិត ដោយប្រើល្បាយអំបិលបង្កើតជាពពក ។ បច្ចេកទេសនោះ តម្រូវឲ្យរោយតាមយន្តហោះនូវបរិមាណអំបិលនិងកាបូនឌីអុកសីុតរឹងទៅក្នុងពពក ដើម្បីបង្កើតជាដុំទឹកកកហើយនឹងនាំឲ្យមានភ្លៀងធ្លាក់ ដែលបច្ចេកទេសបែបនោះ ធ្លាប់ត្រូវបានកងទ័ព សហរដ្ឋអាមេរិកប្រើប្រាស់ក្នុងសម័យសង្គ្រាមវៀតណាម ។
លោក Pralong Dumrongthai អគ្គនាយកនៃអគ្គនាយកដ្ឋានតស៊ូប្រឆាំងការបំពុល បរិយាកាស បានគូសបញ្ជាក់ថា តាមរយៈការប្រើប្រាស់បច្ចេកទេសបង្កើតភ្លៀងសិប្បនិម្មិតនេះ ភ្លៀងអាចធ្លាក់នៅថៃ្ង
ទី១៥ ខែមករា ប៉ុន្តែរឿងនោះពឹងផ្អែកលើខ្យល់និងសំណើមផងដែរ ។ ក្រុងបាងកកបានប្រើបច្ចេកទេសបង្កើតភ្លៀងសិប្បនិម្មិត ក៏ព្រោះតែទីក្រុងនេះប្រឈមមុខនឹងកម្រិតនៃការបំពុលខ្ពស់បំផុតមិនធ្លាប់មាន តែស្ថានភាពពុលក្នុងបរិយាកាសនេះធ្លាប់បានកើតឡើងនៅក្រុងប៉េកាំង ប្រទេសចិន ។ ដោយសារតែការបារម្ភពីការពុលដោយផ្សែងអ័ព្ទនេះ មនុស្សកាន់តែច្រើនឡើងបានប្រើម៉ាស់ពាក់ការពារ ។
ដោយសារតែស្ថានភាពពុលធ្វើឱ្យបារម្ភនោះអាជ្ញាធរបានសម្រេចបិទការដ្ឋានសាងសង់គម្រោងរថភ្លើងអេឡិចត្រូនិក នៅក្នុងទីក្រុងបាងកក រយៈពេល៧ថ្ងៃ ខណៈរដ្ឋាភិបាលថៃកំពុងប្រយុទ្ធប្រឆាំងនឹងផ្សែងអ័ព្ទពុលនៅក្នុងរាជធានី ។ នេះបើយោងតាមការផ្សាយរបស់សារព័ត៌មាន បាងកកប៉ុស្តិ៍ នៅថ្ងៃទី១៧ ខែមករា ។ ក្នុងសន្និសីទសារព័ត៌មានកាលពីថ្ងៃទ១៦ ខែមករា រដ្ឋមន្ត្រីក្រសួងដឹកជញ្ជូនលោក អាខុម តឺមភីតាយ៉ាផៃសិដ្ឋ (Arkhom Termpittayapaisith) បានឱ្យដឹងថា អាជ្ញាធរបានសម្រេចចេញសេចក្ដីណែនាំមួយដល់ម្ចាស់ការដ្ឋានទាំងអស់ក្នុងទីក្រុងបាងកក ផ្អាកសកម្មភាពសាងសង់របស់ខ្លួន រហូតដល់ថ្ងៃអង្គារទី២២ ខែមករា ។ លោកបន្ថែមថា ម្ចាស់ការដ្ឋានទាំងអស់ចាំបាច់ត្រូវតែសម្អាតការដ្ឋានសាងសង់របស់ខ្លួន និងផ្លូវស្ថិតនៅក្បែរ មិនតែប៉ុណ្ណោះ សូម្បីតែរថយន្ដចេញចូលការដ្ឋានក៏ត្រូវសម្អាតកង់ឱ្យបានស្អាតដែរ ។
ក្រៅពីវិធានការលើការដ្ឋានសាងសង់ អាជ្ញាធរថៃថែមទាំងបានបង្គាប់ឱ្យរថយន្ដក្រុងប្រើប្រាស់ប្រេងម៉ាស៊ូតចំនួន២.០៧៥គ្រឿងក្នុងទីក្រុងបាងកក ប្ដូរមកប្រើប្រាស់ប្រេងសាំងវិញ ដើម្បីការពារ ក៏ដូចជាទប់ស្កាត់ការបញ្ចេញផ្សែងខ្មៅទៅក្នុងបរិយាកាសបន្តឲ្យមានភាពអាប់អួ ។ ការបំពុលបរិយាកាសនេះ ត្រូវបានអ្នកជំនាញចង្អុលបង្ហាញថា ដោយសារតែកំណើនប្រជាជន អគារខ្ពស់ៗ និងយានជំនិះបានកើនឡើងយ៉ាងគំហុក ឯលទ្ធផលនៃការបង្កើតភ្លៀងសិប្បនិម្មិតមិនទាន់ទទួលបានលទ្ធផលបែបណានៅឡើយទេ ៕
ចែករំលែកព័តមាននេះ