ខេត្តព្រះសីហនុ ៖ ពិតជាសំណាងល្អមួយ ក្នុងមួយពាន់គ្រោះសម្រាប់បុរសម្ចាស់ផ្ទះ និងកូនស្រីអាយុ១០ឆ្នាំ ដែលបានរួចផុតពីគ្រោះថ្នាក់ដល់អាយុជិវិត បើទោះបីជាត្រូវរងរបួសដោយចោរចាក់យ៉ាងណាក្តី ។ ក្រុមចោរ២នាក់ បានសម្រុកចូលក្នុងផ្ទះ…
ខេត្តព្រះសីហនុ ៖ ពិតជាសំណាងល្អមួយ ក្នុងមួយពាន់គ្រោះសម្រាប់បុរសម្ចាស់ផ្ទះ និងកូនស្រីអាយុ១០ឆ្នាំ ដែលបានរួចផុតពីគ្រោះថ្នាក់ដល់អាយុជិវិត បើទោះបីជាត្រូវរងរបួសដោយចោរចាក់យ៉ាងណាក្តី ។ ក្រុមចោរ២នាក់ បានសម្រុកចូលក្នុងផ្ទះ ហើយយកកាំភ្លើងភ្ជង់ និងយកកាំបិតចាក់បុរសម្ចាស់ផ្ទះ ក្នុងគោលបំណងប្លន់ តែត្រូវម្ចាស់ផ្ទះតដៃប្រវាយប្រតប់រហូតមានការផ្អើលឆោឡោដល់អ្នកជិតខាង ទើបក្រុមចោរភ័យស្លន់ស្លោរត់ចែកជើងគ្នាបាត់ស្រមោលទៅ ។
តាមប្រភពព័ត៌មានឱ្យដឹងថា ករណីនេះ កើតឡើងកាលពីវេលាម៉ោងប្រមាណ៦ និង៤៥នាទីល្ងាចថ្ងៃទី១៦ មករា នៅក្បែរ«ឱសថស្ថានកំពង់សោមថ្មី» ក្នុងភូមិ២ សង្កាត់លេខ៤ ក្រុងព្រះសីហនុ ។ ក្នុងអំពើប្លន់នេះ បណ្តាលឱ្យបុរសជាម្ចាស់ផ្ទះរងរបួសត្រង់ពោះ ហូរឈាមកក្លាក់ ហើយបន្ទាប់ពីមានការភ្ញាក់ផ្អើល សមត្ថកិច្ចក៏បានទៅដល់ និងធ្វើការស្រាវជ្រាវរកមុខសញ្ញាក្រុមចោរប្លន់ទាំង២នាក់នោះ ។
ជុំវិញករណីប្លន់នេះ បើយោងតាមជនរងគ្រោះ ឈ្មោះ លី កៅ ភេទប្រុស អាយុ៥២ឆ្នាំ ជាអាជីវករលក់ដូរនៅផ្សារលើក្រុងព្រះសីហនុបានឱ្យដឹងថា កាលពីល្ងាចថ្ងៃនោះ ខណៈរូបគាត់កំពុងចូលបន្ទប់ទឹក ស្រាប់តែមានចោរ២នាក់ស្ទុះចូលមក ក្នុងនោះម្នាក់យកកាំបិតប្រុងចាក់គាត់ និងម្នាក់ទៀត យកកាំភ្លើងភ្ជង់កូនស្រីគាត់ ។ ប្រឈមមុខនឹងគ្រោះអាសន្ននេះ គាត់បានប្រវាយប្រតប់វិញ ក៏បណ្តាលឲ្យរងរបួសដោយសារចោរម្នាក់នោះចាក់ត្រូវចំពោះ ។
ខណៈកំពុងមានការប្រវាយប្រតប់គ្នានោះដែរ គាត់ក៏ស្រែកខ្លាំងៗឱ្យអ្នកជិតខាងជួយ ហើយក៏មានអ្នកភូមិជាច្រើននាក់ រត់សំដៅមកផ្ទះគាត់ ធ្វើឲ្យក្រុមចោរភិតភ័យក៏រត់គេចខ្លួន ដោយពុំទាន់អាចយកអ្វីពីរូបគាត់បាននៅឡើយទេ ។ បើយោងតាមប្រភពសមត្ថកិច្ចបានបញ្ជាក់ជាជំហានដំបូងថា ក្រុមចោរអាចមានគ្នាពី២ ទៅ៣នាក់ ប៉ុន្តែពួកនេះអាចចូលធ្វើសកម្មភាពចំនួន២នាក់ ឯម្នាក់ទៀតអាចនៅចាំមើលផ្លូវ ។
សមត្ថកិច្ចបានដាក់ការសង្ស័យថា ក្រុមចោរសង្ស័យពុំអាចមានកាំភ្លើងពិតប្រាកដទេ គឺអាចជាកាំភ្លើងជ័រ ព្រោះបើយោងតាមសកម្មភាពប្រវាយប្រតប់ ប្រសិនបើក្រុមចោរមានកាំភ្លើងពិតប្រាកដ ម្ល៉េះជនរងគ្រោះពុំអាចមានជិវិតរស់បានទេ គឺចោរមិនអាចទុកឱកាសឱ្យជនរងគ្រោះតដៃបានឡើយ ។
ប៉ុន្តែទោះជាយ៉ាងណាក្តី ក្នុងសំណុំរឿងនេះ សមត្ថកិច្ចកំពុងឆែកមើលតាមកាមេរ៉ាសុវត្ថិភាពនៅផ្ទះប្រជាពលរដ្ឋក្បែរនោះ ដើម្បីកំណត់អត្តសញ្ញាណ ស្វែងរកចាប់ខ្លួនក្រុមចោរទាំងនោះ ។
ចែករំលែកព័តមាននេះ