សហរដ្ឋអាមេរិក-កូរ៉េខាងជើង ៖ អ្នកកាសែតម្នាក់របស់ទូរទស្សន៍CNN ថ្លែងកាលពីថ្ងៃទី១៦មករាថា អនុប្រធានគណៈកម្មាធិការកណ្ដាលបក្សពលករកូរ៉េខាងជើង លោកKIM YONG CHOL នឹងពាំនាំលិខិតថ្មីមួយច្បាប់របស់លោកគីមជុងអ៊ុន ទៅប្រគល់ជូនប្រធានាធិបតីអាមេរិកលោកដូណាល់ត្រាំ ពេលលោកទៅដល់ក្រុងវ៉ាសិុនតោននាសប្ដាហ៍នេះ។
លោកKIM YONG CHOL ត្រូវទៅដល់រដ្ឋធានីអាមេរិកនាព្រឹកថ្ងៃទី១៧មករា តាមជើងយន្តហោះមួយមកពីក្រុងប៉េកាំង។ ពុំមានភាគីណាមួយប្រកាសឬអះអាងពីទស្សនកិច្ចនេះនៅឡើយ ប៉ុន្តែប្រមុខអ្នកចរចាកូរ៉េខាងជើងរូបនេះនឹងជួបដាច់ដោយឡែក ជាមួយរដ្ឋមន្ត្រីការបរទេសអាមេរិក លោកMIKE POMPEO ដើម្បីបង្ហើយភាពលម្អិតនៃការជួបគ្នាកំពូលលើកទី២ រវាងលោកត្រាំនិងមេដឹកនាំកូរ៉េខាងជើង។
តាមTWITTERអ្នកកាសែតរូបនេះលោកWILL RIPLEYនិយាយថា ប្រភពជិតដិតនឹងការចរចាពីការរំសាយនុយក្លេអ៊ែរ អាមេរិក-កូរ៉េខាងជើងនិយាយប្រាប់គាត់ថា លោកKIM YONG CHOLនឹងពាំនាំលិខិតថ្មីមួយរបស់លោកគីមជុងអ៊ុន ជូនដល់លោកដូណាល់ត្រាំ ពេលលោកមកដល់ក្រុងវ៉ាសិុនតោននាថ្ងៃទី១៧មករា។
លោកគីមនិងលោកត្រាំបានផ្លាស់ប្ដូរលិខិតគ្នាជាច្រើនចាប់តាំងពីឆ្នាំមុនមក។ លោកត្រាំមុននេះនិយាយថា លោកបានទទួលលិខិតអស្ចារ្យមួយច្បាប់ពីមេដឹកនាំកូរ៉េខាងជើង ប៉ុន្តែលោកពុំលាតត្រដាងពីខ្លឹមសារឡើយ។
បន្ទាប់ពីជួបលោកត្រាំប្រមាណជា២សប្ដាហ៍ក្រោយកិច្ចប្រជុំកំពូលនៅសិង្ហបុរី លោកKIM YONG CHOLត្រូវជួបលោកត្រាំជាថ្មី ប៉ុន្តែសេតវិមានពុំបានឆ្លើយតបភ្លាមៗតាមសំណើនោះនៅឡើយ៕
ចែករំលែកព័តមាននេះ