រាជធានីភ្នំពេញ៖ ពិធីការិនី និងជាតារាសម្តែងសុខ សោម៉ាវត្តី បានលែងលះជាមួយស្វាមីច្រើនឆ្នាំមកហើយ ។ ក្នុងស្ថានភាពជីវិតបែបនេះ វត្តី តែងតែបង្ហាញឲ្យឃើញពីភាពផ្អែមល្ហែមរបស់នាងជាមួយកីឡាករបាល់ទាល់លី វ៉ាហេទ ។ បែបនេះហើយចុះម៉េចបានជាកាលពីពេល ថ្មីៗកន្លងមក អតីតស្វាមីស្កាត់ទៅជួបវត្តី ដល់កន្លែងថត ។ មានរឿងអ្វីកើតឡើងនៅពេលនោះ ?
សុខ សោម៉ាវត្តី ជាតារាសម្តែងប្រជាប្រិយមួយរូប ដោយរាល់ភាពយន្តដែលនាងចូលរួមសម្តែងតែងតែស្រូបទាញបានទស្សនិកជនច្រើនកុះករចូលទស្សនា ។ ចុងក្រោយនេះនាងមានកម្មវិធីសម្តែងមួយ ហើយអំឡុងពេលនោះលេចមុខអតីតស្វាមីរបស់នាងទៅដល់ ។ អតីតស្វាមីដែលជាកូនមន្ត្រីថ្នាក់ខ្ពស់មួយរូបនោះបានស្កាត់ទៅជួបសុខ សុម៉ាវត្តី ជាមួយកូនស្រីដែលជាតំណក់ឈាមរួមគ្នា ។
រូបថតមួយសន្លឹកត្រូវសុខ សោម៉ាវត្តី បង្ហោះតាមហ្វេសប៊ុករបស់ខ្លួន គឺជារូបថតបង្ហាញពីជំនួបរបស់នាង និងអតីតស្វាមីនោះ។ ដោយមិនបានអធិប្បាយអ្វីច្រើន សុខ សុម៉ាវត្តី គ្រាន់តែភ្ជាប់សារមួយខ្លីជាមួយរូប ថតនោះថា «ភ្ញៀវកិត្តិយសពិសេសមកលេងដល់កន្លែងថតថ្ងៃនេះ »ដែលទិដ្ឋភាពនេះនាងហាក់មិនមានចេតនាអ្វីមួយឡើយ ម្យ៉ាងរឿងបែបនេះធ្លាប់កើតឡើងពីមុនមកដែរ ។
យ៉ាងណាក៏ដោយរូបភាពមួយសន្លឹកនេះបានធ្វើឲ្យមានមហាជន ជាពិសេសបណ្តាអ្នកលេងហ្វេសប៊ុកសម្តែងការភ្ញាក់ផ្អើល ក្នុងពេលដែលកន្លងមកក៏មានព័ត៌មានលេចលឺផងដែរថា សុខ សោម៉ាវត្តី ទំនងជាអាចត្រូវគ្នាវិញជាមួយនឹងអតីតស្វាមី ។ ជាការកត់សម្គាល់តារាសម្តែងកូនមួយ និងកំពុងមានទីផ្សារសម្តែង ខ្ពស់សុខ សុម៉ាវត្តី ហាក់មិនសូវជាខ្វាយខ្វល់ចំពោះព័ត៌មាន និងការប្រាស្រ័យទាក់ទងរវាងនាង និងអតីតស្វាមីនោះឡើយ ។
កន្លងមកតារារូបនេះធ្លាប់បានលើកឡើងថា បើទោះបីជានាង និងអតីតស្វាមីបានសម្រេចលែងលះគ្នាក៏ដោយ ប៉ុន្តែនៅរាប់អានគ្នាជាធម្មតា ។ រឿងនេះគឺដោយសារតែអ្នកទាំងពីរចង់ផ្តល់ភាពកក់ក្តៅដល់កូន ស្រីដែលជាតំណក់ឈាមរួមគ្នា បើទោះបីជាពេលនេះអ្នកទាំងពីរបានសម្រេចដើរផ្លូវរៀងខ្លួនក៏ដោយ ប៉ុន្តែភារកិច្ចចំពោះកូនស្រីគឺនៅតែមាន។
ទោះជាយ៉ាងណាក្តីមានការលើកឡើងក្រៅផ្លូវការថា រវាងសុខ សុម៉ាវត្តី និងអតីតស្វាមីគឺមិនអាចវិលទៅរកជួបជុំគ្នាវិញឡើយ ព្រោះអតីតស្វាមីរបស់នាងមានភរិយាថ្មីរួចហើយ ខណៈពេលដែលនាងក៏កំពុងតែសាងស្នេហ៍ជាមួយកីឡាករបាល់ទាត់លី វ៉ាហេទ ដែរ ៕
ចែករំលែកព័តមាននេះ