រាជធានីភ្នំពេញ ៖ សំណុំរឿងក្តីឃាតកម្មលើឧកញ៉ា អ៊ឹង ម៉េងជឺ កាលពីថ្ងៃទី១៦ មករា ត្រូវបានប្រធានក្រុមប្រឹក្សាជំនុំជម្រះលើកពេលសវនាការទៅថ្ងៃទី១២ – ១៣ ខែកុម្ភៈ បន្តទៀតបន្ទាប់ពីបើកសវនាការបាន២ថ្ងៃរួចមក ។
អ្វីដែលអ្នកចូលរួមស្តាប់សវនាការជាសាធារណៈនោះ មានចម្ងល់ត្រង់ថា ហេតុអីសវនាការ២ថ្ងៃ បានជាមិននាំខ្លួនឧកញ៉ា ថោង សារ៉ាត់ មកសាកសួរនៅចំពោះមុខផង ព្រោះ ថោង សារ៉ាត់ ជាមេក្លោងពាក់ពន្ធក្នុងអំពើឃាតកម្មមួយនោះ ។ ចម្ងល់បែបនេះត្រូវបានគេទម្លាយជាសាធារណថា មានលិខិតចេញពីពន្ធគារជំរាបមកប្រធានក្រុមប្រឹក្សាជំនុំជម្រះបញ្ជាក់ពីមូលហេតុជនត្រូវចោទ ថោង សារ៉ាត់ មានសុខភាពមិនល្អ និងកំពុងសម្រាកព្យាបាលនៅមន្ទីរពេទ្យព្រះកុសមៈ ហៅពេទ្យលោកសង្ឃ មិនបានចូលរួមសវនាការទេ ។ ហើយនេះក៏មិនមែនជាលើកទី១ដែរ ដែលជនជាប់ចោទ ថោង សារ៉ាត់ មិនបានចូលមកឈរមុខក្រចកសេះ ដើម្បីឲ្យអង្គសវនាការសាកសួរដេញដោលលើសំណុំរឿងឃាតកម្ម ឧកញ៉ា អ៊ឹង ម៉េងជឺ នោះ ។
ការលើកពេលសវនាការសំណុំរឿងឃាតកម្មនេះទៅថ្ងៃទី១២-១៣ កុម្ភៈ គឺមូលហេតុមេធាវីការពារក្តីឲ្យជនជាប់ចោទជាប់រវល់ ដោយបានដាក់ពាក្យស្នើសុំមិនបានចូលរួមទើបដំណើរសវនាការរឿងក្តីឃាតកម្មមិនអាចធ្វើទៅបាននោះ ។
សូមជម្រាបថា កាលពីព្រឹកថ្ងៃទី១៥ កមរា សាលាដំបូងរាជធានីភ្នំពេញលើកយកសំណុំរឿងក្តីឃាតកម្មលើឧកញ៉ា អ៊ឹង ម៉េងជឺ មកបើកសវនាការតាមការកំណត់ គឺធ្វើឡើង៣ថ្ងៃ ។ សំណុំរឿងនេះមានជនជាប់ចោទ៦នាក់ តែម្នាក់ស្លាប់ក្នុងពន្ធនាគារ ដូច្នេះ៥នាក់ត្រូវឈរមុខក្រចកសេះ ប៉ុន្តែជាក់ស្តែងឧកញ៉ាជាមេក្លោងមិនដែលមានវត្តមានក្នុងសវនាការទេ ។ សំណុំរឿងឃាតកម្មមួយនេះមាន ថោង សារ៉ាត់ និងអង្គរក្ស៥នាក់ពាក់ព័ន្ធទៅនឹងអំពើឃាតកម្មបាញ់ប្រហារសម្លាប់ លោក ឧកញ៉ា អ៊ឹង ដែលសាលាដំបូងរាជធានីភ្នំពេញបានកប់ទុកអស់រយៈជិត ៥ឆ្នាំកន្លងមកហើយនោះ ពេលនេះត្រូវបានគេដឹងថា ក្រុមប្រឹក្សាជំនុំជម្រះសាលាដំបូង នឹងលើកយកមកបើកសវនាការជំនុំជម្រះទោសនៅថ្ងៃទី១៥-១៦-១៧ មករា ២០១៩ ខាងមុខនេះ ។
យោងតាមសេចក្ដីជូនដំណឹងរបស់ក្រុមប្រឹក្សាជំនុំជម្រះលើសំណុំរឿងព្រហ្មទណ្ឌមួយនេះ គឺដឹកនាំដោយលោក តុប ឈុនហេង អនុប្រធានសាលាដំបូងរាជធានីភ្នំពេញជាប្រធានក្រុមប្រឹក្សា ។ តាមសេចក្តីជូនដំណឹងរបស់ប្រធានក្រុមប្រឹក្សាបានតម្រូវឲ្យអនុរក្សពន្ធនាគារព្រៃស នាំជនត្រូវចោទទាំង៥នាក់មកឈរមុខរង្វង់ក្រចកសេះ ដើម្បីឱ្យអង្គសវនាការធ្វើការសាកសួរដេញដោលតាមនីតិវិធី និងសម្រេចលើអង្គសេចក្តី ដើម្បីវិនិច្ឆ័យទោសទៅតាមអំពើដែលពួកគេបានប្រព្រឹត្ត ។
ជនត្រូវចោទ ១- ឧកញ៉ា ថោង សារ៉ាត់ អាយុ៣៨ឆ្នាំ ថៅកែក្រុមហ៊ុន ៩៩៩ ជាប់ចោទពីបទផ្តើមគំនិតក្នុងអំពើឃាតកម្មគិតទុកជាមុន ។ ២- ឈ្មោះ សៀង វាសនា អាយុ៤៤ឆ្នាំ (ជនដៃដល់) ៣-ឈ្មោះ លី សៅ ហៅវី អាយុ៤២ឆ្នាំ (ជនដៃដល់ស្លាប់ក្នុងពន្ធនាគារ) ជាប់ចោទពីបទឃាតកម្មគិតទុកជាមុន ។ ៤-ឈ្មោះ កូយ ចាន់ថុល អាយុ២៩ឆ្នាំ ៥-ឈ្មោះ មាស សម្បត្តិ អាយុ ២៧ឆ្នាំ និង៦-ឈ្មោះ ឈុន ចិត្រា ជាប់ចោទពីបទ សមគំនិតក្នុងអំពើឃាតកម្មគិតទុកជាមុន ។
ក្នុងសំណុំរឿងនេះមានជនរងគ្រោះគឺ ឧកញ៉ា ម៉េងជឺ ថៅកែក្រុមហ៊ុនស៊ីម៉ងត៍ពេជ្រ ត្រូវឃាតករបាញ់សម្លាប់ កាលពីវេលាម៉ោងជាង៧យប់ ថ្ងៃទី២២ វិច្ឆិកា ឆ្នាំ២០១៤ នៅមុខតូបលក់ផ្លែឈើស្រស់យីហោ ឡោតិចសេង ក្បែរអាងទឹកអូឡាំពិក ខណៈជនរងគ្រោះបាន និងកំពុងចុះពីលើរថយន្តទំនើបមួយគ្រឿង ។
គួរបញ្ជាក់ថា សំណុំរឿងឃាតកម្មបាញ់សម្លាប់ឧកញ៉ា អ៊ឹង ម៉េងជឺ កន្លងមកក្រុមប្រឹក្សាជំនុំជម្រះធ្លាប់បានលើកយកមកបើកសវនាការជំនុំជម្រះទោសច្រើនលើកហើយ ហើយក៏បានប្រកាសសាលក្រមម្តងរួចហើយដែរ តែសាលក្រមនោះបានប្រកាសចាត់របៀប ពោល គឺបង្វិលសំណុំរឿងឲ្យចៅក្រមស៊ើបសួរបើកការស៊ើបអង្កេតឡើងវិញ ដោយមានចំណុចមួយចំនួនស្ថិតនៅមានការសង្ស័យ និងនៅសេសសល់មិនទាន់សួរគ្រប់ជ្រុងជ្រោយ ៕
ចែករំលែកព័តមាននេះ