រាជធានីភ្នំពេញ ៖ បុរសម្នាក់បានរងជើងស្តាំយ៉ាងធ្ងន់ធ្ងរ និងត្រូវបានក្រុមសង្គ្រោះអង្គភាព៧១២នាំទៅកាន់មន្ទីរពេទ្យដើម្បីសង្គ្រោះបន្ទាន់ភ្លាមៗ ខណៈដែលគាត់ជិះម៉ូតូម៉ាកហុងដាឌ្រីមសេ១២៥មួយគ្រឿងជ្រុលទៅបុកថយន្តម៉ាក CHEVEROLET ១គ្រឿងដែលកំពុងបើកបរបត់ឆ្លងផ្លូវត្រឡប់ក្រោយ គ្រោះថ្នាក់ចរាចរនោះបានកើតឡើងកាលពីវេលាម៉ោង១១ព្រឹក ថ្ងៃទី១៧ ខែមករា ឆ្នាំ២០១៩ នៅតាមផ្លូវជាតិលេខ៣ ស្ថិតនៅក្នុងភូមិព្រៃព្រីងត្បូង១ សង្កាត់ចោមចៅ២ ខណ្ឌពោធិ៍សែនជ័យ ។
ម៉ូតូហុងដាឌ្រីមសេ១២៥ ស៊េរីឆ្នាំ២០១៩ ពណ៌ខ្មៅ ពាក់ផ្លាកលេខ កណ្តាល 1AC-7821 បើកបរដោយបុរសម្នាក់ឈ្មោះ ពៅ សាវុធ អាយុ២៦ឆ្នាំ ធ្លាប់បួសជាសាមណេរទើបតែសឹកចាកសិក្ខាបទរយៈពេលជិត១អាទិត្យប៉ុណ្ណោះ ហើយបច្ចុប្បន្នមានទីលំនៅក្នុងភូមិ ព្រៃគុយ ឃុំគោកចក ស្រុកកំពង់ត្របែក ខេត្តព្រៃវែង ។ ចំណែករថយន្តបង្កម៉ាក CHEVEROLET ពណ៌ខ្មៅ ពាក់ផ្លាកលេខ ភ្នំពេញ 2R-2568 បើកបរដោយស្ត្រីម្នាក់មិនស្គាល់អត្តសញ្ញាណគ្រាន់តែដឹងថា ជាភរិយារបស់មន្ត្រីនគរបាលពន្ធនាគារម្នាក់ ។
តាមប្រភពព័ត៌មានបានឲ្យដឹងថា នៅមុនពេលកើតហេតុជនរងគ្រោះបានជិះម៉ូតូធ្វើដំណើរក្នុងទិសដៅពីជើងទៅត្បូងលុះពេលទៅដល់ត្រង់ចំណុចកើតហេតុបានវាក់ជាមួយរថយន្តម៉ាក CHEVEROLET ដែលកំពុងបើកបរក្នុងទិសដៅពីជើងទៅត្បូងហើយបត់ឆ្វេងត្រឡប់ក្រោយមិនមើលមុខមើលក្រោយ ។
ខណៈនោះបុរសរងគ្រោះបានខំគេចចេញដែរប៉ុន្តែមិនទាន់ក៏ជ្រុលទៅរថយន្តពេញទំហឹងបណ្តាលឲ្យដួលរងរបួសជើងស្តាំធ្ងន់ធ្ងរព្រមទាំងបណ្ដាលឲ្យម៉ូតូរងការខូចខាតយ៉ាងដំណំ ចំណែករថយន្តរងការខូចខាតដាច់ធ្លាក់កាងមុខផងដែរ ។
ប្រភពខាងលើបានបន្តថា ក្រោយពេលកើតហេតុភាគីទាំង២បានសម្របសម្រួលគ្នាហើយមុនដំបូងបុរសរងគ្រោះបានសុំត្រឹមតែរួចគ្នាប៉ុណ្ណោះមិនចង់បានសំណងអ្វីឡើយ ។ ប៉ុន្តែខាងស្ត្រីអ្នកបើករថយន្តមិនព្រម ទើបក្រោយមកជនរងគ្រោះទាមទារសំណង១០០ដុល្លារដើម្បីព្យាបាលរបួស និងជួសជុលម៉ូតូដែលេងការខូចខាត ។
ខណៈនោះស្ត្រីម្ចាស់រថយន្តវិញនៅតែមិនព្រមរហូតដល់ជនរងគ្រោះមានអាការឈឺកាន់តែខ្លាំងរហូតដល់ឃើញរថយន្តសង្គ្រោះទៅដល់ដឹងថា ធ្ងន់ធ្ងរក្រោកមិនរួចទើបប្តីអ្នកបើកបររថយន្តបង្កហុចលុយឲ្យ២០ម៉ឺនរៀលទៅជនរងគ្រោះ ក៏នាំគ្នារត់ឡើងឡានបើកចេញបាត់អស់តែម្ដង ។ បន្ទាប់មកជនរងគ្រោះត្រូវបានរថយន្តសង្គ្រោះអង្គភាព៧១១ដឹកយកទៅសង្គ្រោះបន្ទាន់ហើយម៉ូតូត្រូវនគរបាលនាំយកទៅរក្សាទុករង់ចាំប្រគល់ជូនក្រុមគ្រួសារជនរងគ្រោះ ៕
ចែករំលែកព័តមាននេះ