ខេត្តស្វាយរៀង ៖ ក្រុមគ្រូពេទ្យមន្ទីរសុខាភិបាលខេត្តស្វាយរៀងដឹកនាំដោយលោកវេជ្ជបណ្ឌិតកែរ រដ្ឋា ប្រធានមន្ទីរសុខាភិបាលខេត្តបានចុះទៅពិនិត្យព្យាបាលជម្ងឺដោយមិនគិតថ្លៃនៅបរិវេណមណ្ឌលសុខភាពគគីរដែលទើបតែកសាងថ្មីនៅក្នុងភូមិគគីរ ឃុំគគីរ ស្រុករមាសហែក ខេត្តស្វាយរៀង ។
លោកវេជ្ជបណ្ឌិត កែរ រដ្ឋា ប្រធានមន្ទីរសុខាភិបាលខេត្តបានឲ្យដឹងថា ការពិនិត្យ និងព្យាបាលជម្ងឺនេះធ្វើឡើងនៅថ្ងៃទី១៥ ខែមករា ឆ្នាំ២០១៩ ដោយមានការចូលរួមពីក្រុមគ្រូពេទ្យចំនួន៣៥នាក់ស្ម័គ្រចិត្តទៅពិនិត្យព្យាបាលជម្ងឺជូនប្រជាពលរដ្ឋបានចំនួន៣៩៥នាក់ស្រី២៨៥នាក់ ។ អ្នកជម្ងឺភាគច្រើនមានជម្ងឺក្រពះ ពោះវៀន លើសឈាម ជម្ងឺបេះដូង រលាកសួត រមាស់សើស្បែក និងជំងឺភ្នែក ។ល។
លោកបន្តថា ចំពោះឱសថមួយចំនួនបានទទួលពីក្រសួងសុខាភិបាល និងមួយចំនួនទៀតទទួលបានពីការឧបត្ថម្ភរបស់លោកស្រីកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រីរដ្ឋមន្ត្រីក្រសួងទំនាក់ទំនងរដ្ឋសភាព្រឹទ្ធសភា និងអធិការកិច្ច ។ នេះជាលើកទី៦ហើយដែលក្រុមគ្រូពេទ្យស្ម័គ្រចិត្តមន្ទីរសុខាភិបាលខេត្តស្វាយរៀងបានចុះពិនិត្យព្យាបាលជម្ងឺជូនប្រជាពលរដ្ឋនៅក្នុងឃុំគគីរ ស្រុករមាសហែកនេះ ។
សូមជម្រាបជូនថា មណ្ឌលសុខភាពគគីរ ស្ថិតនៅក្នុងភូមិគគីរឃុំគគីរ ស្រុករមាសហែកដែលជាតំបន់រងគ្រោះដោយសារគ្រាប់បែកគីមីរបស់សហរដ្ឋអាមេរិក ។ មណ្ឌលសុខភាពគគីរនេះគ្រោងនឹងសម្ពោធឱ្យដំណើរការនៅថ្ងៃទី២៧ ខែមករា ឆ្នាំ២០១៩ ខាងមុខនេះក្រោមអធិបតីភាពលោកស្រីកិត្តិសង្គហបណ្ឌិត ម៉ែន សំអន ៕
ចែករំលែកព័តមាននេះ