ខេត្តកំពង់ឆ្នាំង ៖ កសិករប្រកបរបរដាំដើមទំពាំងបារាំងនៅភូមិត្រពាំស្បូវ ឃុំស្រែថ្មី ស្រុករលាប្អៀរ មានសេចក្តីរីករាយ ព្រោះចាប់ផ្ដើមប្រមូលផលជាបណ្ដើរៗហើយ ដោយខ្លះបានពី៤ទៅ៥គីឡូ និងខ្លះទៀតបានពី៦ ដល់៨គីឡូក្រាម ។ ចំណែកដើមទំពាំងបារាំងក៏មានតម្លៃថ្លៃណាស់ដែរ ។
ស្ត្រីឈ្មោះ ជា ដានី អាយុ៣៣ឆ្នាំ មានទីលំនៅភូមិឃុំខាងលើ បានបញ្ជាក់អោយដឹងថា គាត់បានរៀនដាំដើមទំពាំងបារាំងនេះ ពីម្ដាយរបស់គាត់ ហើយទើបតែយកមកអនុវត្តដាំបាន៤-៥ ខែប៉ុណ្ណោះ ប៉ុន្តែបច្ចុប្បន្នគាត់បានទទួលផលជាបណ្តើរៗហើយ ។ មកដល់ពេលនេះគាត់ប្រមូលទំពាំងបារាំងបានពី៧ ទៅ៨គីឡូក្រាម និងពេលខ្លះច្រើនជានេះ ហើយគាត់សង្ឃឹមថា ទំពាំងបារាំងគាត់នឹងអាចទទួលផលដល់ជាង១០គីឡូក្រាមក្នុង១ថ្ងៃ ក្នុងពេលដ៏ខ្លីខាងមុខនេះ ។
សព្វថ្ងៃគាត់លក់ទំពាំងបារាំងក្នុងមួយគីឡូក្រាមថ្លៃ១ម៉ឺនរៀល មានម៉ូយមកយកដល់ផ្ទះ ។ គាត់មានសេចក្តីរីករាយជាខ្លាំង ដោយសារតែដើមទំពាំងបារាំងគាត់បានប្រមូលផលយ៉ាងលឿនបែបនេះ ហើយបានតម្លៃថ្លៃទៀត គិតជាមធ្យមគាត់រកចំណូលបានពី៧ទៅ៨ម៉ឺនរៀល ឬច្រើនជាងនេះក្នុងមួយថ្ងៃ ។ ចំពោះបច្ចេកទេសនៃការដាំដើមទំពាំងបារាំងវិញ គាត់រៀនបានពីម្ដាយរបស់គាត់ដែរ ។
ដោយឡែកស្ត្រីជាម្ដាយខាងលើបានបញ្ជាក់ដែរថា កូនស្រីគាត់បានទទួលផលល្អជាងគាត់ ។ ចំណែកទំពាំងបារាំងគាត់ត្រូវដង្កូវស៊ីអស់ពេលគាត់មិននៅផ្ទះ ២-៣ថ្ងៃ ។ ស្ត្រីរូបនោះបានបន្តថា ដំបូងឡើងគាត់ចាប់ផ្តើម ប្រមូលផលបាន៤-៥ គីឡូក្រាមទៅហើយ ។ ប៉ុន្តែនៅពេលដែលគាត់ចាកចេញទៅប្រទេសថៃ៣ថ្ងៃ ពេលមកវិញ ស្រាប់ដើមទំពាំងបារាំងរបស់គាត់ត្រូវដង្កូវស៊ីស្ទើរអស់ទៅហើយ ទម្រាំតែដើមបារាំងដុះលូតលាស់សារថ្មីឡើងវិញត្រូវប្រើរយៈពេលយូរ ប៉ុន្តែយ៉ាងនេះក្តីគាត់កំពុងទទួលបានផល ជាបណ្តើរៗវិញហើយបាន៤ទៅ ៥គីឡូក្រាមដែរក្នុងមួយថ្ងៃ ។
គួររំលឹកដែរថា បច្ចុប្បន្ននៅក្នុងខេត្តកំពង់ឆ្នាំង អ្នកដែលដាំដើមទំពាំងបារាំងមានជាច្រើនកន្លែងដោយសារតែការចែករំលែកបទពិសោធន៍គ្នាទៅវិញទៅមក ។ ប៉ុន្តែខ្លះក៏ទទួលជោគជ័យ ឯខ្លះមិនទាន់ទទួលជោគជ័យនៅឡើយ ។ ចំណែកឯស្ត្រីជាកសិករខាងលើគាត់ជាអ្នកដាំមុនគេហើយបានចែករំលែកបទពិសោធន៍ទៅអ្នកដាំក្រោយទៀត រួមទាំងការចែកកូនដើមត្រពាំងបារាំង និងបច្ចេកទេស ។
ដើមទំពាំងបារាំងត្រូវបានគេយកពូជនាំចូលពីបរទេស ហើយយកមកចែកចាយដាំនៅស្រុកខ្មែរដែលជាបន្លែមានរសជាតិផ្អែមឆ្ងាញ់ និងជំនួយសុខភាពទៀតផង ៕
ចែករំលែកព័តមាននេះ