ខេត្តស្វាយរៀង ៖ កម្មករកម្មការិនីរោងចក្រផលិតស្បែកជើង KINGMAKERS ចំនួន២.១៨០នាក់បានផ្អាកធ្វើបាតុកម្ម និងបាននាំគ្នាចូលធ្វើការវិញហើយ នៅព្រឹកថ្ងៃទី១៧ មករា ២០១៩ នេះដោយមានការសម្របសម្រួលពីគណកម្មាធិការអាជ្ញាកណ្តាល និងក្រុមការងារដោះស្រាយវិវាទខេត្តស្វាយរៀង ។
បើតាមលោក អ៊ូ សាខឿន អនុប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តស្វាយរៀងនិងជាសមាជិកក្រុមការងារដោះស្រាយវិវាទប្រចាំតំបន់សេដ្ឋកិច្ចពិសេស មេនហាតធេនក្រុងបាវិត បានឲ្យដឹងថា កម្មករកម្មការិនីប្រមាណ២.១៨០នាក់ ដែលលើកគ្នាបាតុកម្មតវាទាមទារប្រាក់៥០ភាគរយ ។ លោកអ៊ូ សាខឿន បន្តទៀតថា ករណីផ្ទុះបាតុកម្មនេះ មានរយៈពេល២ថ្ងៃ គឺចាប់ផ្តើមពីថ្ងៃទី១៥ មករា ២០១៩ ដល់ថ្ងៃទី១៦ មករា ២០១៩ នៅខាងមុខរោងចក្រឃីងម៉េកឃើរ KINGMAKERS ក្នុងតំបន់សេដ្ឋកិច្ចពិសេសមេនហាតធេន ស្ថិតនៅភូមិតាបិប សង្កាត់បាវិត ក្រុងបាវិត ។
លោក អ៊ូ សាខឿន បានបន្តទៀតថា មូលហេតុកម្មករកម្មការិនីបាតុកម្ម គឺដោយសារថៅកែររោងចក្រផលិតស្បែកជើង KINGMAKERS ប្រកាសសុំព្យួរការងារកម្មកររយៈពេល១ខែ មូលហេតុគ្មានអ្នកបញ្ជាទិញ ។ ហើយការបាតុកម្មតវានេះកម្មករកម្មការិនីបានទាមទាសុំឲ្យថៅកែរបើកប្រាក់ឲ្យកម្មករកម្មការិនីចំនួន៥០ភាគរយឲ្យកម្មករ ក៏ប៉ុន្តែភាគីថៅកែងរោងចក្រមិនយល់ព្រមទើបផ្ទុះការតវាដោយនាំគ្នាធ្វើបាតុកម្មបែបនេះ។
ក្រោយពីក្រុមការងារដោះស្រាយវិវាទថ្នាក់ខេត្តបានធ្វើការសម្របសម្រួលមិនបានបញ្ចប់ ក៏បញ្ជូនសំណុំរឿនទៅគណកម្មាធិការអាជ្ញាកណ្តាល ដើម្បីជួយដោះស្រាយបន្ត ។ ក្រោយពីចុះស្រាវជ្រាវឃើញថា ក្រុមហ៊ុនរោងចក្រនេះមិនទាន់បញ្ចប់សកម្មភាពការងារផលិតស្បែកជើងនៅឡើយ គឺតាមគម្រោងត្រូវផ្អាកការងារផលិតនៅថ្ងៃទី២០ មករា ឆ្នាំ២០១៩ ខាងមុខ ។ ប៉ុន្តែមិនទាន់ដល់ថ្ងៃផង លោកថៅកែរក្រុមហ៊ុនបានបិទប្រកាសព្យួរការងារកម្មករកម្មការិនីរយៈពេលមួយខែ គឺចាប់ពីថ្ងៃទី២០ មករា ឆ្នាំ២០១៩ ដល់ថ្ងៃទី២០ កុម្ភៈ ឆ្នាំ២០១៩ ដោយលើកហេតុផលថា គ្មានអ្នកបញ្ជាទិញទើបមានការផ្ទុះបាតុកម្មឡើង ។
ហើយនៅព្រឹកថ្ងៃទី១៧ មករា ២០១៩នេះ គណកម្មាធិការអាជ្ញាកណ្តាល និងក្រុមការងារដោះស្រាយវិវាទខេត្តស្វាយរៀងបានដោះស្រាយ និងសុំឲ្យកម្មករទាំង២.១៨០នាក់ចូលធ្វើការវិញរហូតដល់ថ្ងៃទី២០ មករា ២០១៩ ដែលជាថ្ងៃព្យួរការងារបណ្តោះអាសន្ន ហើយទុកពេលឲ្យគណៈកម្មាធិការអាជ្ញាកណ្តាល និងកោះហៅភាគីថៅកែរក្រុមហ៊ុនរោងចក្រផលិតស្បែកជើងមកពិភាក្សាដោះស្រាយតាមសំណើររបស់ភាគីកម្មករកម្មការិនីទាមទារបើកប្រាក់៥០ភាគរយនេះទើបកម្មករកម្មការនីយល់ព្រមចូលធ្វើការវិញ ។
លោកអ៊ូ សាខឿន បានមានប្រសាសន៍ថា ក្នុងនាមអ្នកផ្សះផ្សារគ្មានអីសប្បាយចិត្តជាងពេលឃើញគូភាគី (កម្មករ និងថៅកែររោងចក្រ) ត្រូវរ៉ូវគ្នានោះទេ ។ ហើយក៏បានជូនពរដល់បងប្អូនកម្មករកម្មការិនីសូមឲ្យមានសំណាងល្អទាំងអស់គ្នា និងមានការងារធ្វើជារៀងរហូត ៕
ចែករំលែកព័តមាននេះ