រាជធានីភ្នំពេញ ៖ សម្តេចក្រឡាហោម ស ខេង ឧបកនាយករដ្ឋមន្ត្រីរដ្ឋមន្ត្រីក្រសួងមហាផ្ទៃបានអះអាងថា អ្នកដែលហៅរបបក្រុងភ្នំពេញ ឬរបបហ៊ុន សែន នោះមានចេតនាថា…
រាជធានីភ្នំពេញ ៖ សម្តេចក្រឡាហោម ស ខេង ឧបកនាយករដ្ឋមន្ត្រីរដ្ឋមន្ត្រីក្រសួងមហាផ្ទៃបានអះអាងថា អ្នកដែលហៅរបបក្រុងភ្នំពេញ ឬរបបហ៊ុន សែន នោះមានចេតនាថា រាជរដ្ឋាភិបាលបច្ចុប្បន្ននេះមិនស្របច្បាប់ ។
ការលើកឡើងនេះ បន្ទាប់ពីលោក សម រង្ស៊ី ហៅរាជរដ្ឋាភិបាលថា របបក្រុងភ្នំពេញ ខណៈវិទ្យុបរទេស គឺអាស៊ីសេរីដែលមាននិន្នាការគាំទ្រអតីតគណបក្សសង្គ្រោះជាតិតែងតែសរសេរដោយវាយប្រហារមកលើរាជរដ្ឋាភិបាលភ្ជាប់ពាក្យថា «របបក្រុងភ្នំពេញ ឬរបបលោក ហ៊ុន សែន» ។ ថ្លែងក្នុងវេទិកាស្តីពីភាពជាដៃគូរវាងរាជរដ្ឋាភិបាល និងអង្គការសង្គមស៊ីវិល (លើកទី២) ថ្ងៃទី១៧ ខែមករា ឆ្នាំ២០១៩ នៅទីស្តីការក្រសួងមហាផ្ទៃថា អ្នកមួយចំនួនហៅការដឹកនាំរបស់រាជរដ្ឋាភិបាលជា របបភ្នំពេញរបបហ៊ុនសែននោះជាមានចេតនាចង់ថា របបគ្រប់គ្រងរបស់រាជរដ្ឋាភិបាលនេះមិនស្របច្បាប់ ។
សម្តេចបញ្ជាក់យ៉ាងដូច្នេះថា « អ្នកដែលរបបក្រុងភ្នំពេញរបបហ៊ុន សែននោះ ខ្ញុំគិតថា «…»តាមគំនិតខ្ញុំដ៏ស្តួចស្ទើងនោះ គេចង់ថា របបគ្រប់គ្រងនេះមិនស្របច្បាប់ និងរដ្ឋាភិបាលខុសច្បាប់ » ។ សម្តេចក៏បានស្នើដល់អ្នកដែលលើកឡើងនេះពិចារណាថា ការបោះឆ្នោត កាលពីថ្ងៃទី២៩ កក្កដា ឆ្នាំ២០១៨ កន្លងមក ដោយមានប្រជាពលរដ្ឋទៅបោះឆ្នោះជាង៨០ភាគរយ ។
សម្តេចថា សុំអ្នកនិយាយនោះគិតដល់តម្លៃឆន្ទៈរបស់ប្រជាពលរដ្ឋទៅបោះឆ្នោតផងដែរ ។ សម្តេចបញ្ជាក់ថា «អីចឹងទេ ការប្រើពាក្យរបបនេះវាធ្ងន់ដែរ កន្លងមកយើងនិយាយអ្នកប្រជាធិបតេយ្យអ្នកសេរីនិយម អីចឹងទេ ការនិយាយពាក្យរបបនេះវាមិនគោរពតម្លៃប្រជាពលរដ្ឋ ។ ខ្ញុំនិយាយបែបនេះ ខ្ញុំមិនឲ្យអ្នកនិយាយឲ្យឈប់ទេ » ។ សម្តេចក៏បានគូសបញ្ជាក់ចំពោះប្រើប្រាស់ពាក្យរបបក្រុងភ្នំពេញរបប ហ៊ុន សែន នោះ អាចប្រែថា ការលាបពណ៌រាជរដ្ឋាភិបាលពីរាជរដ្ឋាភិបាលស្របច្បាប់ទៅជារដ្ឋាភិបាលមិនស្របច្បាប់ដែលកើតជាបញ្ហា ។
ជាមួយគ្នានោះដែរ សម្តេចបានក៏បានប្រកាសគាំទ្រចំពោះអង្គការណាដែលធ្វើការងារ ដើម្បីសកម្មភាពសង្គម ដើម្បីជាតិទោះបីជាធ្វើស្ថិតនៅក្នុងវិស័យណាក៏ដោយ តស៊ូមតិវិស័យច្បាប់ ឲ្យតែធ្វើតាមច្បាប់ផងដែរ ។ សម្តេចក៏បានលើកឡើងថា រាជរដ្ឋាភិបាលបានកំណត់យករយៈពេល៦ខែម្តង ដើម្បីជួបជាមួយអង្គការសង្គមស៊ីវិលដែលបានចុះបញ្ជីនៅក្រសួងមហាផ្ទៃ ។ សម្តេចក៏បានឆ្លើយតបនឹងមតិមួយចំនួនថា រាជរដ្ឋាភិបាលពុំមានភាពស្មោះត្រង់ជាមួយភាពជាដៃគូរជាមួយអង្គការសង្គមស៊ីវិលយ៉ាងដូច្នេះថា «ចំណុចនេះ ខ្ញុំគិតថា ប្រហែលជាធ្ងន់បន្តិច «…» ការប្រើពាក្យបែបជាធ្ងន់បន្តិច ពីព្រោះអត់មានឆន្ទៈ ហើយបូក និងមិនស្មោះត្រង់ទៀត ចប់បណ្តោយ ។
អីញ្ចឹងខ្ញុំសុំស្នើលើកឡើងឲ្យចំថា ពុំមានឆន្ទៈយ៉ាងម៉េច ? ហើយមិនមានភាពស្មោះត្រង់នឹងយ៉ាងម៉េច ? សុំនិយាយគ្នាឲ្យច្បាស់មិនអីចឹងទេ ការដាក់បន្ទុកបែបនេះវាធ្ងន់ណាស់ ពេលនេះ សឹងថា អត់ ឬសេរ៉ូ» ។ សម្តេចបានលើកឡើងទៀតថា ការលើកឡើងរបស់មតិទាំងនោះមិនស្របតាមស្ថានការណ៍ជាក់ស្តែងនោះទេ ទោះបីជារាជរដ្ឋាភិបាលមានចន្លោះប្រហោងនូវចំណុចខ្វះខាតខ្លះក្នុងការធ្វើកិច្ចសហប្រតិបត្តិការ ដោយអន្លើតាមតំបន់ ឬទីកន្លែង ។ សម្តេចក៏បានដាក់សំណួរនឹងថា រាជរដ្ឋាភិបាលគ្មានឆន្ទៈ និងភាពស្មោះត្រង់ជាមួយសង្គមស៊ីវិលផងដែរ ៕
ចែករំលែកព័តមាននេះ