ការភ្ញាក់ផ្អើលពេញបណ្តាញសង្គមបានកើតមានឡើង បន្ទាប់ពីមានបង្ខាំងមនុស្សនៅមន្ទីរពេទ្យ«វិុចតូរៀ» នៅពេលថ្មីៗនេះ ។ មនុស្សជាច្រើនចោទសួរថា ហេតុអ្វីបានជាមន្ទីរពេទ្យចិនមួយនេះ ហ៊ានធ្វើខ្លាំងដៃដល់ដល់ម្លឹង ។ ចាក់សោ បង្ខាំងមនុស្ស…
ការភ្ញាក់ផ្អើលពេញបណ្តាញសង្គមបានកើតមានឡើង បន្ទាប់ពីមានបង្ខាំងមនុស្សនៅមន្ទីរពេទ្យ«វិុចតូរៀ» នៅពេលថ្មីៗនេះ ។
មនុស្សជាច្រើនចោទសួរថា ហេតុអ្វីបានជាមន្ទីរពេទ្យចិនមួយនេះ ហ៊ានធ្វើខ្លាំងដៃដល់ដល់ម្លឹង ។ ចាក់សោ បង្ខាំងមនុស្ស ព្រោះចង់បានលុយពីអ្នកជំងឺ វាមិនខុសពីការចាប់ជម្រិតនោះទេ ។ ជាមួយនឹងស្ថានភាពធ្ងន់ ធ្ងរបែបនេះ ក្រសួងសុខាភិបាលក៏បានសម្រេចចិត្តបិទមន្ទីរពេទ្យមួយនេះ ។ នេះជាការសម្រេចចិត្តមូយ ដែលត្រឹមត្រូវ ហើយក៏ធ្វើអោយមានការស្ងប់ចិត្តបន្តិច នៅក្នុងចំណោមសាធារណជនដែលផ្តល់ការអាណិតដល់គ្រួសារអ្នកជំងឺ ដែលត្រូវគេបង្ខាំង ។
បញ្ហានៅមន្ទីរពេទ្យចិនមួយនេះ គ្រាន់តែចំណែកតូចមួយនៃបញ្ហាដ៏ចាក់ស្រេះ នៅក្នុងវិស័យសុខាភិបាលកម្ពុជា ដែលតម្រូវអោយមានការយកចិត្តទុកដាក់ខ្ពស់ ដើម្បីពង្រឹងគុណភាពសេវាកម្មសុខាភិបាល កាត់បន្ថយ ការស្លាប់របស់មនុស្ស និងកាត់បន្ថយការចាកចេញរបស់ប្រជាជនកម្ពុជាទៅស្វែងរកសេវាសុខភាព នៅក្រៅប្រទេស។
វាមិនមែនជារឿងថ្មីឡើយ ដែលថាប្រជាជនជាច្រើនបានត្អូញត្អែរ និងសម្តែងការមិនសប្បាយចិត្តចំពោះសេវាកម្មនៅតាមមន្ទីរពេទ្យ និងគ្លីនិកមួយចំនួន ដែលធ្វើការរកស៊ីហួសជ្រុលចេញក្រមសីលធម៌ ។ បញ្ហាទាំងនោះ រួមមានការបកសម្បកថ្នាំចេញ ដោយធ្វើអោយអ្នកជំងឺមិនទាំងដឹងថា ពួកគេលេបថ្នាំអ្វីផង ការទាមទារចាក់ថ្នាំ ដោយមិនចាំបាច់ ការទារថ្លៃហួសហេតុ សម្តីគ្មានសីលធម៌ និងបញ្ហាគុណភាព សេវាកម្មព្រមទាំងប្រសិទ្ធិភាពនៃការព្យាបាលជំងឺ ។
អ្នកប្រកបរខាងសេវាកម្មសុខភាពទាំងអស់ ត្រូវទាមទារឱ្យមានយល់ច្បាស់ថា បញ្ហាសុខភាពវាមិនត្រូវចាត់ទុកជាការកស៊ីកេងចំណេញទៅលើសុខភាព និងជីវិតមនុស្សនោះឡើយ ។ វាចាំបាច់ណាស់ ដែលត្រូវមានការថ្លឹងថ្លែងដ៏ប្រយ័ត្នប្រយែង ដោយផ្តល់តម្លៃដល់ជីវិតមនុស្ស ជាជាងការចំណេញ លុយប៉ុន្មាន រយដុល្លារ ។
ឧបមាថា មានអ្នកជំងឺម្នាក់ចូលមកមន្ទីរពេទ្យមួយ មន្ទីរពេទ្យនោះមិនមានលទ្ធភាពព្យាបាល គេចាំបាច់ ត្រូវរួសរាន់បញ្ជូនអ្នកជំងឺ ទៅកាន់មន្ទីរពេទ្យផ្សេង ដែលមានសមត្ថភាព និងបច្ចេកវិទ្យាខ្ពស់ជាង ដោយមិនត្រួវព្យាយាមរកវិធី ដូចជាដាក់សេរ៉ូម ឬក៏ប្រើថ្នាំមិនចាំបាច់ ដើម្បីបានលុយពីអ្នកជំងឺឡើយ ពីព្រោះពេលវេលាមានសារសំខាន់ខ្លាំងណាស់ សម្រាប់ការសង្គ្រោះជីវិតមនុស្ស ។
ការធ្វើដូច្នេះបានន័យថា មន្ទីរពេទ្យនោះ បានប្រតិបត្តិប្រកប ដោយសីលធម៌ដោយអោយតម្លៃដល់ជីវិតមនុស្សជាងការរកលុយប្រកបដោយអសីលធម៌ម ដោយធ្វើការព្យាបាលដែលមិនចាំបាច់ និងគ្មានប្រសិទ្ធភាព ដើម្បីចំណេញលុយ ។
វាមានសារសំខាន់ជាងអាយុជីវិត ដែលត្រូវមានការអប់រំអ្នកប្រករបរបើកមន្ទីរពេទ្យទាំងអស់ ឱ្យមាន ផ្នត់គំនិតប្រកបដោយសីលធម៌ ដោយតម្កល់ជីវិតមនុស្ស និងសុខភាពរបស់មនុស្សជាធំជាងការចំណេញលុយកាក់ ។
វាគួរអោយខ្មាសអៀន និងវិប្បដិសារីធ្ងន់ធ្ងរណាស់ កាលបើសិិនជាមនុស្សម្នាក់ ត្រូវស្លាប់ ឬត្រូវឈឺរឹតតែធ្ងន់ ដោយសារតែមន្ទីរពេទ្យ ឬគ្លីនិកចង់បានលុយប៉ុន្មានរយដុល្លារពីអ្នកជំងឺ ។ ផ្ទុយមកវិញ មន្ទីរពេទ្យឬគ្លីនិក ដែលអាចជួយសង្គ្រោះជីវិតមនុស្ស និងជួយព្យាបាលសុខភាពអ្នកជំងឺបានជាសះស្បើុយនឹងទទួលបានការគោរពនិងទុកចិត្តខ្លាំងពីសាធារណជន ។ ដូច្នេះ គេនឹងអាចធ្វើអោយ មន្ទីរពេទ្យឬគ្លីនិកដំណើរការបានល្អសម្រាប់រយ:ពេលវែង ។
សារគន្លឹះមួយ សម្រាប់មន្ទីរពេទ្យឬគ្លីនិក គឺ «គេត្រូវតែលូតលាស់លើផ្លូវសេដ្ឋកិច្ច ជាមួយនឹងការសង្គ្រោះ ជីវិតមនុស្ស និងព្យាបាលជំងឺយ៉ាងមានប្រសិទ្ធភាព» ។ គេត្រូវតែចៀសវាងអោយបានការលូតលាស់ ផ្នែកសេដ្ឋកិច្ច ជាមួយនឹងការលះបង់ជីវិតមនុស្ស ឬសុខភាពប្រជាជន។
ចំណែកអាជ្ញាធរមានសមត្ថកិច្ច ពិសេសក្រសួងសុខាភិបាល ត្រូវតែមានវិធានការគ្រប់គ្រាន់ ដើម្បីធានាថាគ្មានមនុស្សណាស្លាប់ ដោយសារមិនបានទទួលការព្យាបាល ឬក៏ទទួលការព្យាបាលដែលខុសឆ្គងឡើយ។
ផ្ទុយទៅវិញ ត្រូវតែធានាអោយបានច្រើនបំផុតថា មន្ទីរពេទ្យ និងគ្លីនិកជាកន្លែង ដែលអាចសង្គ្រោះជីវិតមនុស្សបានច្រើនបំផុត ៕ (ដោយ៖ ប្រេវីន)
ចែករំលែកព័តមាននេះ