រាជធានីភ្នំពេញ ៖ ប្រតិបត្តិការដ៏ក្តៅគគុក អស់រយៈពេលស្ទើរពេញមួយថ្ងៃ ក្រុមឧក្រិដ្ឋជនដែលនគរបាលចិន មកពីក្រុងសៀងហៃ សហការជាមួយនគរបាលកម្ពុជា តាមប្រមាញ់កាលពីរសៀលថ្ងៃទី១៥ មករា ពាក់ព័ន្ធបទល្មើសសេដ្ឋកិច្ចមួយចំនួននៅប្រទេសចិននេះ ពេលនេះចាប់បានហើយចំនួន១០នាក់ ។ ប្រតិបត្តិការតាមប្រមាញ់ក្រុមឧក្រិដ្ឋជនខាងលើ បាននៅផ្ទះសំណាក់៣កន្លែង គឺ១-ផ្ទះសំណាក់មនោរម្យ ២-ផ្ទះសំណាក់ទិត្យហួរ ដែលស្ថិតនៅភូមិតាខ្មៅ សង្កាត់តាខ្មៅ ក្រុងតាខ្មៅ និង៣-ផ្ទះសំណាក់ជាសំណាង ស្ថិតនៅសង្កាត់កំពង់សំណាញ់ ក្រុងតាខ្មៅ ។
ក្រុមឧក្រិដ្ឋជនទាំង១០នាក់ ត្រូវបញ្ជូនទៅ អគ្គនាយកដ្ឋានអន្តោប្រវេសន៍ក្រសួងមហាផ្ទៃដើម្បីបន្តនីតិវិធីទៅតាមច្បាប់ ។ សូមរំលឹកថា នគរបាលប្រទេសចិន មកពីទីក្រុងសៀងហៃ បានសហការជាមួយកម្លាំងនាយកដ្ឋានសើុបអង្កេត និងអនុវត្តនីតិវិធីនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ និងមានការសម្របសម្រួលនីតិវិធីពីសំណាក់លោក ឯក ស៊ុនរស្មី ព្រះរាជអាជ្ញារងអមសាលាដំបូងខេត្ត បានចុះប្រតិបត្តិការចាប់ខ្លួនក្រុមឧក្រិដ្ឋជនចិន តែយឺតពេលប្រមាណតែ១០នាទីប៉ុណ្ណោះ ក្រុមឧក្រិដ្ឋជនបានគេចខ្លួនបាត់ស្រមោលដូចចេះបំបាំងខ្លួន ចេញពីទីតាំងដែលជាកន្លែងក្រុមនេះស្នាក់នៅ ។ ទោះបីក្រុមឧក្រិដ្ឋជនចិនទាំងនោះគេចខ្លួនបាត់ក្តី តែកន្លែងពួកគេលាក់ខ្លួនគឺជាទីតាំងលួចផលិតបារីខុសច្បាប់ដ៏ធំ មានចំនួនបីកន្លែងនៅកណ្តាលក្រុងតាខ្មៅ ។
ប្រតិបត្តិការនោះបានធ្វើឡើងនៅរសៀលថ្ងៃទី១៥ មករា នៅចំណុចភូមិព្រែកសំរោង និងភូមិតាខ្មៅ សង្កាត់តាខ្មៅ ក្រុងតាខ្មៅ ។ មន្ត្រីនគរបាលអន្តោប្រវេសន៍ បានអោយដឹងថា មុនពេលឈានដល់ការបើកប្រតិបត្តិការដើម្បីចាប់ខ្លួនក្រុមឧក្រិដ្ឋជនចិននេះ កម្លាំងជំនាញបានធ្វើការស្រាវជ្រាវ និងសើុបអង្កេតរហូតកំណត់បានពីគោលដៅ ចំនួនបីទីតាំងខាងលើអស់រយៈពេលជិតមួយខែមកហើយ ដែលជនសង្ស័យជាក្រុុមឧក្រិដ្ឋជនកំពុងលាក់ខ្លួននៅក្នុងប្រទេសកម្ពុជា ។ ក្រុមនេះពាក់ព័ន្ធនឹងបទល្មើសសេដ្ឋកិច្ចមួយចំនួននៅប្រទេសចិន ទើបកម្លាំងជំនាញសហការគ្នា ឈានដល់ការបង្ក្រាបជាមួយភាគីចិនមកពីទីក្រុងសៀងហៃ ។
បន្ទាប់ពីឆែកឆេររួច សមត្ថកិច្ចបានរកឃើញម៉ាសុីនផលិតបារី សារធាតុលាយផ្សំជាច្រើនមុខ និងសំបកកេសបារី ដែលកំពុងរៀបវេចខ្ចប់មួយចំនួនធំ និងវត្ថុតាងមួយចំនួនទៀត ដែលជាបទល្មើសសេដ្ឋកិច្ច ៕
ចែករំលែកព័តមាននេះ