ខេត្តបន្ទាយមានជ័យ ៖ មនុស្សម្នាក់រងរបួសធ្ងន់ដោយរថយន្តដឹកដំឡូងមីរបស់ថៃបើកក្នុងល្បឿនលឿនដល់ចំណុចផ្លូវកោងបានក្រឡាប់ទ្រុងឡានសង្កត់លើ ក្រោយមកបានស្លាប់ ខណៈពេលដឹកដល់មន្ទីរពេទ្យ ដែលហេតុការណ៍បង្កឲ្យមានការភ្ញាក់ផ្អើលនេះបានកើតឡើង នៅវេលាម៉ោង៤ និង១៥នាទីរសៀលថ្ងៃទី១៦ ខែមករានេះ នៅលើផ្លូវជាតិលេខ៥៩…
ខេត្តបន្ទាយមានជ័យ ៖ មនុស្សម្នាក់រងរបួសធ្ងន់ដោយរថយន្តដឹកដំឡូងមីរបស់ថៃបើកក្នុងល្បឿនលឿនដល់ចំណុចផ្លូវកោងបានក្រឡាប់ទ្រុងឡានសង្កត់លើ ក្រោយមកបានស្លាប់ ខណៈពេលដឹកដល់មន្ទីរពេទ្យ ដែលហេតុការណ៍បង្កឲ្យមានការភ្ញាក់ផ្អើលនេះបានកើតឡើង នៅវេលាម៉ោង៤ និង១៥នាទីរសៀលថ្ងៃទី១៦ ខែមករានេះ នៅលើផ្លូវជាតិលេខ៥៩ ត្រង់ចំណុច ភូមិកណ្តាល ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ ។
លោកវរសេនីយ៍ឯក បេន សំអាត អធិការនគរបាលស្រុកម៉ាឡៃបានឲ្យដឹងថា ជនរងគ្រោះឈ្មោះ សុង លី ភេទប្រុស អាយុ៣០ឆ្នាំ រស់នៅភូមិជ្រោងស្តៅ ក្រាំងធ្នង់ ស្រុកបាទី ខេត្តតាកែវ រងរបួសធ្ងន់ បញ្ជូនទៅមន្ទីរពេទ្យបានស្លាប់ ។ ចំណែកអ្នកបើកបររថយន្តឈ្មោះ សិត ថាផនសុរៈ ភេទប្រុស អាយុ២៥ឆ្នាំ រស់នៅភូមិត្រាច ឃុំតាឃង់ ស្រុកសាំខៈ ខេត្តសុរិន្ទប្រទេសថៃ ។
លោកអធិការបានបន្តថា មុនពេលកើតហេតុជនរងគ្រោះមកចូលរួមរៀបអារពាហ៍ពិពាហ៍បងប្អូននៅភូមិខ្លាងាប់ អូរសំព័រ ស្រុកម៉ាឡៃ ហើយឆ្លៀតពេលទៅលេងបងប្អូននៅភូមិដូង ឃុំម៉ាឡៃ ដោយបើកបរម៉ូតូក្នុងទិសដៅពីកើតទៅលិចដល់ចំណុចកើតហេតុខាងលើរៀបបត់ម៉ូតូចូលផ្ទះបងប្អូនស្របពេលនោះមានរថយន្តធុនធំរបស់ថៃដឹកដំឡូងមី បើកក្នុងទិសដៅស្របគ្នាយ៉ាងលឿនដល់ចំណុចកើតហេតុជាកន្លែងផ្លូវកោង ក៏ក្រឡាប់បណ្តាលឲ្យទ្រុងរថយន្តសង្កត់ទៅលើជនរងគ្រោះរងរបួសធ្ងន់ ក្រោយមកបានស្លាប់ពេលដឹកទៅដលើមន្ទីរពេទ្យ ។
លោកអធិការបានបញ្ជាក់ថា ក្រោយពីកើតហេតុកម្លាំងនគរបាលជំនាញចរាចរណ៍ស្រុកបានចុះទៅដល់នឹងបានធ្វើការចាប់ឃាត់អ្នកបើកបររថយន្តមកអធិការដ្ឋាននគរបាលស្រុក ដើម្បីរៀបចំសំណុំ រឿងតាមនីតិវិធីច្បាប់ ។ ចំណែកម៉ូតូ និងរថយន្តយកមករក្សាទុកនៅអធិការដ្ឋាននគរបាលស្រុករង់ចាំធ្វើការដោះស្រាយជាមួយម្ចាស់រថយន្តនៅពេលក្រោយ ៕
ចែករំលែកព័តមាននេះ