ខេត្តកំពង់ចាម ៖ បើតាមសេចក្តីរាយការណ៍បឋមបានឱ្យដឹងថា មុននេះបន្តិច បើគិតត្រឹមព្រឹកថ្ងៃទី១៧ ខែមករា ឆ្នាំ២០១៩ ក្រុមជើងខ្លាំងចំនួន៥នាក់ ដែលមានបំណងចង់រំដោះអ្នកទោសម្នាក់ដែលជាប់ចោទពីបទរំលោភសេពសន្ថវៈពីក្នុងអធិការដ្ឋាននគរបាលស្រុកព្រៃឈរកាលពីព្រឹកថ្ងៃទី១៥ មករានោះ ត្រូវបានកម្លាំងសមត្ថកិច្ចចាប់ខ្លួនបញ្ជូនមកកាន់តំណាងអយ្យការអមសាលាដំបូងខេត្ត ដើម្បីចាត់ការតាមនីតិវិធីច្បាប់ ។
ជនសង្ស័យទាំង៥នាក់ខាងលើនោះ ១-ឈ្មោះ ទឹម សុផល ភេទប្រុស អាយុ៣២ឆ្នាំ នៅភូមិព្រៃទទឹង ឃុំជ្រៃវៀន ស្រុកព្រៃឈរ ២-ឈ្មោះ ទឹម កុសល ភេទប្រុស អាយុ២៤ឆ្នាំ ភូមិជាមួយអ្នកទីមួយ ៣-ឈ្មោះ ឆេង លី ភេទប្រុស អាយុ១៨ឆ្នាំ ភូមិអូរស្វាយ ឃុំអូរស្វាយ ស្រុកកំពង់សៀម ៤-ឈ្មោះ ហ៊ុំ ហូរ៉ា ភេទប្រុស អាយុ២៥ឆ្នាំ ភូមិខែលជ័យ ឃុំអូរស្វាយ ស្រុកកំពង់សៀម និង៥-ឈ្មោះ រ៉េត ដាវុធ ភេទប្រុស អាយុ២០ឆ្នាំ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ចំណែកពិរុទ្ធជនម្នាក់ដែលជនសង្ស័យទាំងមានបំណងរំដោះនោះឈ្មោះ ទឹម សុភាព ហៅម៉ាប់ អាយុ២៧ឆ្នាំ រស់នៅឃុំជ្រៃវៀន ស្រុកព្រៃឈរ ។
សូមបញ្ជាក់ថា មុននឹងពេលដែលរថយន្តក្រុមជើងខ្លាំងមកសាលាដំបូងខេត្តនោះ គេឃើញមានមនុស្សប៉ុន្មាននាក់បានរង់ចាំរត់ការជាមួយនឹងតុលាការ ដើម្បីធ្វើយ៉ាងណាឱ្យក្រុមទាំង៥នាក់រួចផុតពីបទចោទប្រកាន់ ។ ហើយរហូតមកដល់ពេលនេះ គេមិនទាន់ដឹងថា វាសនាក្រុមជើងខ្លាំងទាំង៥នាក់នោះក្លាយជាយ៉ាងណានៅឡើយទេ។
គួររំលឹកថា ពិរុទ្ធជនម្នាក់រស់នៅឃុំជ្រៃវៀន ស្រុកព្រៃឈរ បានរត់គេចពីការតាមចាប់តាំងពីឆ្នាំ២០១១ម្ល៉េះ និងរៀបការនៅភូមិកំពង់ក្របី ឃុំគគរ ស្រុកកំពង់សៀមនៅថ្ងៃទី១៤ មករា ហើយត្រូវកម្លាំងសមត្ថកិច្ចទៅនាំខ្លួនតាមដីការបស់សាលាដំបូងខេត្តដោយចោទប្រកាន់បទរំលោភសេពសន្ថវៈលើក្មេងស្រីអាយុ១៣ឆ្នាំ។ ប្រតិបតិ្តការនេះធ្វើឡើងនៅព្រឹកថ្ងៃទី១៥ មករា ហើយមានសាច់ញាតិមួយក្រុមជិះរថយន្តម៉ាកហាយប្រ៊ីត១គ្រឿងមកដល់ក្នុងអធិការនគរបាលស្រុកព្រៃឈរ ប៉ងរំដោះជនរូបនេះ និងផ្ទុះហិង្សាជាមួយសមត្ថកិច្ច។
លោកវរសេនីយ៍ទោ សុខ រស់ អធិការរងនគរបាលស្រុកប្រាប់ងថា សមត្ថកិច្ចស្រាវជ្រាវដឹងថា ពិរុទ្ធជននោះបានទៅរៀបការនៅភូមិកំពង់ក្របីនៅថ្ងៃទី១៤ មករា ដោយមិនចង់ឲ្យមានការភ្ញាក់ផ្អើលពេញរោងការនោះទេ ក៏បានរៀបចំជើងព្រួលរួចជាស្រេចដោយទុកឱកាសឲ្យជននេះបានរៀបការរួច លុះមកដល់ព្រឹកថ្ងៃទី១៥ មករា ក៏នាំខ្លួនតាមដីកា។ ក្រោយពីបានដឹងស្ថានភាពមិនស្រួលនោះ សមត្ថកិច្ចក៏ប្រញាប់បញ្ជូនជននេះតាមរថយន្តមកកាន់អធិការដ្ឋាននគរបាលស្រុកព្រៃឈរ ស្រាប់តែសាច់ញាតិចំនួន៥នាក់ជិះរថយន្តដេញតាមពីក្រោយសមត្ថកិច្ច ។
លោកអធិការបន្តថា គ្រាន់តែរថយន្តបើកចូលក្នុងបរិវេណអធិការដ្ឋាននគរបាលស្រុកព្រៃឈរបានបន្តិច រថយន្តនោះបើកចូលតាមក្រោយ និងស្រែកឡូឡារករឿងដល់សមត្ថកិច្ច ហេតុអ្វីបានជាចាប់ប្អូនរបស់គេយ៉ាងដូច្នេះ? ហើយអុកឡុក និងបង្កហិង្សា បណ្តាលឲ្យមន្ត្រីនគរបាល២រូបរងរបួសផងដែរ។ ក្នុងពេលនោះលោកឧត្តមសេនីយ៍ត្រី ហេង វុទ្ធី ស្នងការរងនគរបាលខេត្ត បានឆ្លងយោបល់លោក ហួត វុទ្ធី ព្រះរាជអាជ្ញាអមសាលាដំបូងខេត្ត ក៏បញ្ជាឲ្យឃាត់ខ្លួនមនុស្សទាំង៥នាក់នោះតែម្តង។ ក្រោយមកជនសង្ស័យទាំង៥នាក់ត្រូវឃាត់ខ្លួនបញ្ជូនមកកាន់ស្នងការដ្ឋាននគរបាលខេត្តនៅល្ងាចថ្ងៃទី១៥ មករា ដើម្បីចាត់វិធានការតាមច្បាប់។
ចែករំលែកព័តមាននេះ