រាជធានីភ្នំពេញ ៖ ស្ត្រីអនាថាម្នាក់សង្ស័យមានសតិមិនប្រក្រតី បានពកូនប្រុសម្នាក់អាយុ១ឆ្នាំ ដើររេរានៅកណ្តាលផ្លូវ បណ្តាលឱ្យយានយន្តដែលធ្វើដំណើរតាមដងផ្លូវបើកគេចសឹងមិនទាន់ ស្រៀវសាច់ស្ទើរគ្រប់គ្នា ព្រោះទង្វើអគតិនេះ បង្កហានិភ័យដល់ជីវិតផុយស្រួយណាស់ ។
ដោយឃើញសភាពគួរឱ្យញាក់សាច់បែបនេះ ត្រូវបានអ្នករស់នៅដែលនៅក្បែរនោះ នាំគ្នាជួយចាប់នាំមកចិញ្ចើមផ្លូវវិញ ដោយសារខ្លាចមានគ្រោះថ្នាក់ជាយថាហេតុ ។ ហេតុការណ៍នេះ បានកើតឡើងកាលពីវេលាម៉ោង៨យប់ថ្ងៃទី១៥ មករា ត្រង់ចំណុចក្បែរគល់ស្ពានអាកាស៧មករា ផ្នែកខាងលិច តាមបណ្ដោយផ្លូវសហព័ន្ធរុស្ស៊ី ស្ថិតក្នុងសង្កាត់ទឹកថ្លា ខណ្ឌសែនសុខ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញស្ត្រីខាងលើបានពកូនប្រុសម្នាក់នៅជាប់ចង្កេះដើរនៅកណ្តាលដងផ្លូវធ្វើព្រងើយតាមបណ្ដោយផ្លូវសហព័ន្ធរុស្ស៊ី ដែលមានចរាចរណ៍មមាញឹកក្នុងទិសដៅពីលិចទៅកើត ដោយមិនខ្វល់ពីយានយន្តបើកចៀសក្បែរៗខ្លួននោះទេ បណ្តាលឲ្យអ្នកធ្វើដំណើរនាំគ្នាបើកគេច និងខ្លះទៀតគេចសឹងតែមិនទាន់ផង ។
លុះមកដល់ចំណុចកើតហេតុ ក៏មានអ្នករស់នៅក្បែរនោះ បានទៅសួរនាំស្ត្រីខាងលើ ហើយបង្ខំចិត្តដេញស្ត្រីខាងលើ ឲ្យទៅដើរនៅលើចិញ្ចើមផ្លូវវិញ ព្រោះខ្លាចមានម៉ូតូឬរថយន្តបើកមកបុកបង្កជាគ្រោះថ្នាក់កើតមានឡើង ។ ប៉ុន្តែស្ត្រីខាងលើហាក់ដូចជាមានសតិមិនប្រក្រតី ដោយនិយាយស្តីរវើរវាយ ស្តាប់គ្នាមិនបាន និងមិនព្រមទៅដើរលើចិញ្ចើមផ្លូវនោះទេ ថែមទាំងគំរាមបោកកូនរបស់នាងសម្លាប់ចោល ប្រសិនបើនាំគ្នាចាប់នាង ។
ទោះបីជាគេនាំគ្នាខំប្រឹងនិយាយលួងលោមយ៉ាងណា ក៏គាត់មិនព្រមដែរ គឺនៅតែចចេសដើរកណ្តាលផ្លូវដដែល ។ បន្ទាប់មកដោយខ្លាចមានគ្រោះថ្នាក់ដល់ក្មេងប្រុសខាងលើ ពួកគេដែលជាអ្នកឈឺឆ្អាលក៏សម្រេចចិត្តនាំគ្នាចាប់ទាញដៃស្ត្រីនោះ បង្ខំនាំយកទៅចិញ្ចើមផ្លូវ ហើយក៏បានរាយការណ៍ជូនសមត្ថកិច្ចមូលដ្ឋានឲ្យចុះមកជួយអន្តរាគមន៍ ។
ក្រោយពេលកើតហេតុ សមត្ថកិច្ចមូលដ្ឋានក៏បានចុះដល់កន្លែងកើតហេតុ រួចក៏បានទាក់ទងទៅមន្ទីរសង្គមកិច្ច អតីតយុទ្ធជន និងយុវនីតិសម្បទារាជធានីភ្នំពេញ ឲ្យចុះមកទទួលយកស្ត្រីខាងលើរួមទាំងកូនប្រុស ដើម្បីធ្វើការព្យាបាលនិងថែទាំ ។ គេមិនដឹងថាស្ត្រីខាងលើមានសាវតាបែបណានោះទេ ត្រូវបាន
មន្ទីរសង្គមកិច្ចនាំដាក់រថយន្តបើកចេញទៅដោយសុវត្ថិភាព ។
ចែករំលែកព័តមាននេះ