អង់គ្លេស ៖ តាមប្រភពព័ត៌មាន Metro បានឱ្យដឹងថា សត្វឆ្កែមួយក្បាលមានសំណាងខ្លាំង ដោយសារតែមានម្ចាស់ហ៊ានសុខចិត្តចំណាយលុយ ៥១៣៤ដុល្លារអាមេរិក ដើម្បីធ្វើបុណ្យសពឱ្យក្រោយផុតជីវិត។
សត្វឆ្កែឈ្មោះ Captain ដែលជាពូជ Staffordshire Bull Terrier អាយុ១១ឆ្នាំ បានងាប់នៅថ្ងៃបុណ្យណូអែល ក្រោយពីគាំងបេះដូងនៅក្នុងសាលវះកាត់។ ម្ចាស់របស់វាឈ្មោះ Sasha Smajic អាយុ៣៧ឆ្នាំ ប្រាប់ថា នាងលេបបាយមិនចូលសោះអស់រយៈពេលមួយសប្តាហ៍ពេញ ក្រោយឆ្កែរបស់នាងងាប់។
នាងបានសម្រេចចិត្តធ្វើពិធីបុណ្យសពមួយសម្រាប់ឆ្កែរបស់នាង ដែលនាងចាត់ទុកថាជាសមាជិកគ្រួសារម្នាក់។ នាងបានចំណាយលុយ ៥១៣៤ដុល្លារទៅលើពិធីបុណ្យសពទាំងមូល ដែលអាចនិយាយបានថា ពិតជាកម្រមានណាស់ ចំពោះមនុស្សហ៊ានធ្វើបុណ្យសពឱ្យឆ្កែបែបនេះ។
សាកសពរបស់ Captain ត្រូវបានដឹកចេញពីពេទ្យទៅកាន់ទីបញ្ចុះសព (សួនច្បារដែលវាធ្លាប់ទៅលេង) ដោយរទេះសេះប្រណីតមួយ។ វាត្រូវបានដាក់នៅក្នុងមឈូសសស្អាត ដែលមិនចាញ់របស់មនុស្សទេ។
នាងជាម្ចាស់ឆ្កែបាននិយាយថា៖ «Captain សមនឹងទទួលការគោរពបែបនេះ។ សម្រាប់មនុស្សខ្លះ គេគិតថាវាគ្រាន់តែជាឆ្កែមួយក្បាល តែសម្រាប់ខ្ញុំវាគឺជាកូនរបស់ខ្ញុំ។ វាគឺជាអ្វីៗទាំងអស់សម្រាប់ខ្ញុំ ហើយនឹងនៅតែបន្តបែបនេះជារៀងរហូត»។
នេះមានតែអ្នកស្រឡាញ់ឆ្កែទេ បានយល់អារម្មណ៍មួយហ្នឹង៕
ចែករំលែកព័តមាននេះ