ប្រទេសអង់គ្លេស ៖ ខណៈសល់ពេលមិនដល់៣ខែទៀតផង ដល់ថ្ងៃកំណត់ចាប់ផ្ដើមអនុវត្តការចាកចេញរបស់អង់គ្លេស ពីសហភាពអឺរ៉ុបហៅ BREXIT កាលពីថ្ងៃទី១៥មករាបណ្ដាសមាជិកសភាអង់គ្លេស បានបោះឆ្នោតដោយសំឡេងភាគច្រើនបំផុត បដិសេធកិច្ចព្រមព្រៀងBREXIT នេះ…
ប្រទេសអង់គ្លេស ៖ ខណៈសល់ពេលមិនដល់៣ខែទៀតផង ដល់ថ្ងៃកំណត់ចាប់ផ្ដើមអនុវត្តការចាកចេញរបស់អង់គ្លេស ពីសហភាពអឺរ៉ុបហៅ BREXIT កាលពីថ្ងៃទី១៥មករាបណ្ដាសមាជិកសភាអង់គ្លេស បានបោះឆ្នោតដោយសំឡេងភាគច្រើនបំផុត បដិសេធកិច្ចព្រមព្រៀងBREXIT នេះ ដែលនោះជាបរាជ័យធំជាប្រវត្តិសាស្ត្រ សម្រាប់នាយករដ្ឋមន្ត្រីលោកស្រី THERESA MAY។ បែបនោះញ៉ាំងឲ្យគណបក្សប្រឆាំង ដាក់ញត្តិសម្ដែងការមិនទុកចិត្ត។
សភាអង់គ្លេសបានបោះឆ្នោតបដិសេធកិច្ចព្រមព្រៀងនេះដោយ៤៣២សំឡេង ហើយមាន២០២សំឡេងប៉ុណ្ណោះគាំទ្រ។ នោះជាបរាជ័យធ្ងន់ធ្ងរបំផុត របស់មេដឹកនាំអង់គ្លេស១រូបពុំធ្លាប់មានចាប់តាំងពីឆ្នាំ១៩២០មក ដែលធ្វើឲ្យប្រទេសធ្លាក់ក្នុងភាពមិនច្បាស់លាស់ថែមទៀត។
មានប្រតិកម្មភ្លាមៗចំពោះសភាពការណ៍នោះ ប្រធានគណៈកម្មាធិការអឺរ៉ុប លោកJEAN CLAUDE JUNCKERវាយតម្លៃថា គ្រោះថ្នាក់BREXITមួយ ដោយគ្មានកិច្ចព្រមព្រៀងមានការកើនឡើង។ ខ្ញុំអំពាវនាវដល់ចក្រភពអង់គ្លេសឲ្យបំភ្លឺ ពីបណ្ដាចេតនារបស់ខ្លួនតាមដែលអាចធ្វើទៅបាន។ ពេលវេលាហាក់កាន់តែរសាត់ផុតទៅហើយ។
ក្រោយពីដឹងលទ្ធផលភ្លាមប្រមុខគណបក្សការងារជាគណបក្សប្រឆាំង លោកJEREMY CORBYN ដែលទាមទារចាប់តាំងពីច្រើនសប្ដាហ៍មកហើយ ឲ្យមានការបោះឆ្នោតសភាមុនកាលកំណត់ បានដាក់ភ្លាមញត្តិសម្ដែងការមិនទុកចិត្តមួយប្រឆាំងរដ្ឋាភិបាលអភិរក្សនិយម ដោយចាត់ទុកលទ្ធផលនៃការបោះឆ្នោតនោះថា ជាគ្រោះមហន្តរាយមួយ។
ការបោះឆ្នោតបដិសេធកិច្ចព្រៀងនេះនាំឲ្យមានការភ្ញាក់ផ្អើល ទាំងសម្រាប់ពួកអ្នកគាំទ្រBREXITទាំងពួកអ្នកដែលចង់ស្ថិតក្នុងសហភាពអឺរ៉ុប។ លោកស្រីMAYពេលនេះត្រូវពិនិត្យលើផែនការB។ មានការជ្រើសរើសច្រើនសម្រាប់លោកស្រី ឬមួយវិលទៅចរចាជាមួយក្រុងព្រុចសែល ឬស្នើសុំពន្យារពេល BREXITដែលកំណត់ត្រឹមថ្ងៃទី២៩មីនា។ ម្យ៉ាងទៀតការបោះឆ្នោតថ្ងៃទី១៥មករា ក៏បើកលទ្ធភាពផងដែរការចែកផ្លូវគ្នាជាមួយសហភាពអឺរ៉ុប ដោយពុំចាំបាច់មានកិច្ចព្រៀងព្រម ដូចការលើកឡើងរបស់លោកJUNCKER ជាសេណារីយ៉ូមួយមានការសង្ស័យខ្លាំងពីសំណាក់មជ្ឈដ្ឋានសេដ្ឋកិច្ច។
ក្រោយការបោះឆ្នោតលោកស្រីMAYនិយាយថា សភាបានបញ្ចេញសំឡេង ហើយរដ្ឋាភិបាលនេះនឹងត្រូវស្ដាប់ ដោយលោកស្រីស្នើឲ្យមានការពិភាក្សាគ្នារវាងគណបក្សនានា ដើម្បីកំណត់ពីផ្លូវដែលត្រូវដើរ។
ទោះបីនោះជាបរាជ័យធំមួយ តែអ្នកនាំពាក្យម្នាក់របស់ប្រធានក្រុមប្រឹក្សាអឺរ៉ុប លោកDONALD TUSKថ្លែងថា ប្រទេសទាំង២៧នៃសហភាពអឹរ៉ុបនឹងនៅតែរួបរួមគ្នា។ ប្រធានាធិបតីបារាំង លោកEMMANUEL MACRONយល់ថា ការគាបសង្កត់ដើម្បីស្វែងរកដំណោះស្រាយមួយស្ថិតលើពួកអង់គ្លេស៕
ចែករំលែកព័តមាននេះ