ខេត្តក្រចេះ ៖ ក្រុមអ្នកតវ៉ាក្នុងជម្លោះដីធ្លីដ៏រ៉ាំរ៉ៃជាមួយនឹងក្រុមហ៊ុនវិនិយោគនៅស្រុកស្នួលឈ្មោះ«ក្រុមហុ៊នចម្ការកៅស៊ូមេមត់» បានបញ្ជាក់ជំហរប្រាប់អាជ្ញាធរថា ពួកគាត់នឹងសហការជាមួយអាជ្ញាធរក្នុងដំណើរការវាស់វែងដីសម្បទានសង្គមកិច្ច ដែលអាជ្ញាធរផ្តល់ឱ្យពួកគាត់ដោយមិនបន្តការតវ៉ាអ្វីទៀតឡើយ ក្រោយពីពួកគាត់បានមើលឃើញដល់ទីតាំងជាក់ស្តែងថា ពិតជាបានរៀបចំ ក្នុងគម្រោងចែកជូនពួកគាត់ដូចទៅតាមការសន្យារបស់អាជ្ញាធរមែននោះ ។
ការបញ្ជាក់ពីជំហរបែបនេះរបស់ពលរដ្ឋជាក្រុមអ្នកតវ៉ា គឺបន្ទាប់ពីពួកគាត់ជាង៤០០នាក់ កាលពីថ្ងៃទី១៤ ខែមករា បានទៅពិនិត្យ ជាក់ស្តែងជាមួយនឹងមន្ត្រីអាជ្ញាធរ ដល់ទីតាំងដីចំនួន២កន្លែងធំៗនៅក្នុងឃុំ២ធ្នូ ស្រុកស្នួល គឺជាទីតាំងដីសម្បទានដែលអាជ្ញាធរខេត្តរៀបចំសម្រាប់បែងចែកជូនពួកគាត់ ។ ពលរដ្ឋដែលជាក្រុមអ្នកតវ៉ាទាំងនោះលើកឡើងថា កន្លងមកដោយសារតែពួកគាត់ខ្លាចការសន្យារបស់អាជ្ញាធរ ថាផ្តល់ដីសម្បទានសង្គមកិច្ចឲ្យទៅពួកគាត់ជាការសន្យាខ្យល់ ទើបពួកគាត់តែងតែនាំគ្នាធ្វើការតវ៉ាទាមទារជាច្រើនលើកច្រើនសា ហើយការទាមទារនោះគឺពួកគាត់តែងទៅដល់រាជធានីភ្នំពេញ ។
ការទាមទាររបស់ពួកគាត់លើកចុងក្រោយកាលពីថ្ងៃទី១១ ខែមករា នៅរាជធានីភ្នំពេញ គឺក្នុងគោលបំណងឲ្យអាជ្ញាធរចុះបង្ហាញដី ដែលអះអាងថា គ្រោងនឹងរៀបចំបែងចែកមកឲ្យពួកគាត់ ។ អភិបាលរងខេត្ត លោកខណ្ឌ ចំណាន បានឲ្យដឹងថា តំណាងមន្ទីរពាក់ព័ន្ធបានទៅបង្ហាញពួកគាត់ដល់ទីតាំងដីដែលអាជ្ញាធរគ្រោងវាស់វែងផ្តល់ជូន ។ ពលរដ្ឋចំនួន១.៥៤៨គ្រួសារបានមកដាក់ពាក្យស្នើសុំដីសម្បទាន តែយ៉ាងណាចំ
នួននេះ គឺអាជ្ញាធរនឹងធ្វើការវិនិច្ឆ័យលើពលរដ្ឋ ដែលគ្មានដី និងមានជីវភាពក្រីក្រពិតប្រាកដ ។ ពលរដ្ឋខាងលើដែលបានមកដាក់ពាក្យស្នើសុំនេះ មានមកពី១៥រាជធានី-ខេត្ត ។
លោកអភិបាលរងខេត្តបញ្ជាក់ថា អាជ្ញាធរគ្រោងរៀបចំដីទំហំជាង៤ពាន់ហិកតា សម្រាប់ផ្តល់ជូនទៅពួកគាត់ ដោយក្នុង១គ្រូសារៗទទួលបានដីសម្បទានចំនួនជាង២ហិកតា សម្រាប់ធ្វើកសិកម្មនិងលំនៅឋាន ។
គួររំឭកថា កាលពីខែមីនា ឆ្នាំ២០១៨កន្លងទៅ ពលរដ្ឋជាក្រុមអ្នកតវ៉ាទាំងនេះ បានចេញ មុខតវ៉ាបិទផ្លូវប្រឆាំងក្រុមហ៊ុនចម្ការកៅស៊ូមេមត់ នៅពេលដែលក្រុមហ៊ុនដឹកគ្រឿងចក្រចូលដើម្បីឈូសឆាយធ្វើក្រវាត់ព្រំដី ។ កាលណោះក្រុមអ្នកតវ៉ាបានធ្វើសកម្មភាពបិទផ្លូវជាតិ អស់រយៈពេលជាច្រើនម៉ោង នៅចំណុចភូមិជើងឃ្លេ ឃុំ២ធ្នូ ស្រុកស្នួល ដែលប្រដាប់ដោយដបសាំង កាំបិត ដំបង ចំពាមគ្រាប់ដែក និងបានប្រើហិង្សាមកលើក្រុមសមត្ថកិច្ចដែលចុះទៅអន្តរាគមន៍ផងដែរ ។
ក្នុងស្ថានភាពតានតឹងនៃការតវ៉ានោះ បានឈានដល់ការប៉ះទង្គិចជាមួយសមត្ថកិច្ចទើបមានការផ្ទុះអាវុធជាច្រើនគ្រាប់ ដើម្បីបំបែកក្រុមអ្នកតវ៉ា ហើយក៏មានមនុស្សប្រុសស្រីចំនួន៨នាក់ ដែលអាជ្ញាធរចោទថាជាមុខសញ្ញាញុះញង់ ត្រូវបានចាប់ខ្លួន ។
ចែករំលែកព័តមាននេះ