រាជធានីភ្នំពេញ ៖ ស្ត្រីម្នាក់ស្រែកយំរត់ចេញពីផ្ទះទាំងមានរបួស បន្ទាប់ពីផឹកស៊ីស្រវឹងជាមួយប្តីទាស់សម្តីគ្នាបន្តិចបន្តួចរឿងប្តូរផ្ទះជួល រហូតឈានទៅដល់ការប្រវាយប្រតប់គ្នា បង្កឲ្យមានការភ្ញាក់ផ្អើលឡើងកាលពីម៉ោង១១និង១០នាទីយប់ ថ្ងៃទី១៥ ខែមករា ឆ្នាំ២០១៩ ត្រង់ចំណុចតាមបណ្ដោយផ្លូវ២៥៧កែងនិងផ្លូវ២៣០…
រាជធានីភ្នំពេញ ៖ ស្ត្រីម្នាក់ស្រែកយំរត់ចេញពីផ្ទះទាំងមានរបួស បន្ទាប់ពីផឹកស៊ីស្រវឹងជាមួយប្តីទាស់សម្តីគ្នាបន្តិចបន្តួចរឿងប្តូរផ្ទះជួល រហូតឈានទៅដល់ការប្រវាយប្រតប់គ្នា បង្កឲ្យមានការភ្ញាក់ផ្អើលឡើងកាលពីម៉ោង១១និង១០នាទីយប់ ថ្ងៃទី១៥ ខែមករា ឆ្នាំ២០១៩ ត្រង់ចំណុចតាមបណ្ដោយផ្លូវ២៥៧កែងនិងផ្លូវ២៣០ ស្ថិតក្នុងសង្កាត់ទឹកល្អក់ទី៣ ខណ្ឌទួលគោក។
ស្ត្រីជាប្រពន្ធឈ្មោះសឿន ចន្ថា អាយុ៣០ឆ្នាំ ជាកម្មការិនីរោងចក្រ ស្នាក់នៅផ្ទះជួលក្នុងសង្កាត់បឹងសាឡាង ខណ្ឌទួលគោក ចំណែកឯបុរសជាប្តីឈ្មោះ សុំ សិរី អាយុ៣៧ឆ្នាំ ជាអ្នកយាមឃ្លាំងម៉ូតូនៅក្បែរកន្លែងកើតហេតុ ស្នាក់នៅជាមួយគ្នា។
បើតាមសម្តីស្ត្រីជាប្រពន្ធរៀបរាប់ទាំងទឹកភ្នែកប្រាប់ឱ្យដឹងថា នៅគាត់ និងប្តីរបស់គាត់បានរួមរស់នៅជាប្តីប្រពន្ធជាងមួយឆ្នាំមកហើយ ប៉ុន្តែមិនបានរៀបការតាមប្រពៃណីនោះទេ។ នៅមុនពេលកើតហេតុ គាត់និងប្តីរបស់គាត់ទៅលេងផ្ទះបងស្រីរបស់ប្តីនៅម្តុំវត្តពោធិ៍ញាណ ដើម្បីសួររកមើលផ្ទះជួលសម្រាប់ស្នាក់នៅ ។ លុះត្រលប់មកដល់ផ្ទះវិញ ប្តីគាត់ក៏ស្តីបន្ទោសរឿងដែលត្រូវដូរផ្ទះជួលពីមួយកន្លែងទៅមួយកន្លែង ដោយសារតែការរករឿងឈ្លោះប្រកែកគ្នារបស់ធ្វើឱ្យប៉ះពាល់ដល់អ្នកជិតខាង ទើបបានជាត្រូវដូរផ្ទះជួល។
ប្រភពដដែលបញ្ជាក់ថា ពេលនោះគាត់ក៏និយាយតបទៅប្តីវិញ រហូតកើតមានជាជម្លោះ ហើយប្តីគាត់ក៏ប្រើហិង្សាដាក់លើរូបគាត់ បណ្តាលឱ្យគាត់រងរបួសបែកមាត់ និងពកក្បាល គាត់ក៏រត់គេចចេញពីផ្ទះយករួចខ្លួនដើម្បីឲ្យគេជួយ។ កន្លងមក ប្តីរបស់គាត់តែងតែប្រើអំពើហិង្សាដាក់មកលើរូបគាត់ជាច្រើនលើកច្រើនសា ប៉ុន្តែគាត់មិនបានប្តឹងផ្ដល់នោះទេ ព្រោះតែគាត់ស្រលាញ់ប្តី។
បើតាមសម្តីពីបុរសជាប្តីបានឱ្យដឹងថា មុនពេលកើតហេតុ គាត់និងប្រពន្ធទៅលេងផ្ទះបងស្រីគាត់ ថែមទាំងមានការផឹកស៊ីបន្តិចបន្តួចផងដែរ។ បន្ទាប់មកពួកគាត់ក៏ត្រលប់មកផ្ទះវិញ រួចគាត់ក៏និយាយរឿងដែលត្រូវដូរផ្ទះ ហើយប្រពន្ធរបស់គាត់ក៏អន់ចិត្តរួចក៏ចេញពីផ្ទះទៅផឹកស្រាថែមទៀត។ រហូតដល់កើតហេតុប្រពន្ធរបស់គាត់មកដល់ផ្ទះវិញទាំងស្រវឹងជោកជាំ មករករឿងឈ្លោះជាមួយគាត់ បណ្តាលឱ្យមានការប្រវាយប្រតប់គាត់បែបនេះ ។ កន្លងមក ប្រពន្ធគាត់តែងតែទៅផឹកស្រាសស្រវឹង ហើយរករឿងឈ្លោះជាមួយគាត់ ពេលដែលអន់ចិត្តនឹងគាត់ស្តីបន្ទោសម្តងៗ។
ក្រោយពេលកើតហេតុសមត្ថកិច្ចមូលដ្ឋានក៏ចុះមកដល់កន្លែងកើតហេតុ ប៉ុន្តែស្ត្រីជាប្រពន្ធមិនបានប្តឹងផ្តល់ទៅសមត្ថកិច្ចនោះទេ គឺគ្រាន់តែសុំឲ្យប្តីឈប់ប្រើអំពើហិង្សាដាក់នាងទៀត ហើយសមត្ថកិច្ចក៏ធ្វើការអប់រំណែនាំបុរសជាប្តីនៅនឹងកន្លែងកើតហេតុ ហើយបុរសជាប្តីក៏សន្យាថាឈប់ប្រើអំពើហិង្សាដាក់ប្រពន្ធនៅចំពោះមុខសមត្ថកិច្ចផងដែរ រួចប្តីប្រពន្ធមួយគូនោះក៏ដឹកដៃគ្នាឡើងជិះម៉ូតូចេញទៅបាត់ទៅ៕
ចែករំលែកព័តមាននេះ