ខេត្តស្ទឹងត្រែង ៖ ជនសង្ស័យក្នុងអំពើលួចចំនួនពីរនាក់រួមអ្នកសមគំនិតទទួលផលចោរកម្មម្នាក់ ត្រូវកម្លាំងកងរាជអាវុធហត្ថបញ្ជូនទៅអយ្យការអមសាលាដំបូងខេត្ត ក្រោយមានពាក្យបណ្តឹង និងរកឃើញវត្ថុតាងជាក់ស្តែងនៅតាមបណ្តាទៅតាំងកែច្នៃមួយចំនួននៅក្រុងស្ទឹងត្រែង ។
លោក ភុយ ខ្វៃ ប្រធានមន្ទីរយុត្តិធម៌កងរាជអាវុធហត្ថខេត្តស្ទឹងត្រែងអោយដឹងថា ជនសង្ស័យរួមអ្នកសមគំនិតទទួលផលចោរកម្មត្រូវបញ្ជូនទៅអយ្យការអមសាលាដំបូងនៅព្រឹកថ្ងៃទី១៦មករា ២០១៩ ក្រោយចាប់ខ្លួន កាលពីរសៀលថ្ងៃទី១៤ មករា ក្រោមការដឹកនាំដោយលោកវរៈសេនីយ៍ឯក ដួង វិចិត្រមេបញ្ជាការរងកងរាជអាវុធហត្ថខេត្តរួមសហការកម្លាំងកងរាជអាវុធមូលដ្ឋានក្រុង ។
លោកប្រធានមន្ទីរយុត្តិធម៌បន្តថា ជនសង្ស័យខាងលើមានបទល្មើសបីករណីក្នុងនោះបទល្មើសទី១- ករណីលួច បទល្មើសទី២- ករណីទទួលផលចោរកម្ម និងទបល្មើសទី៣ – ពាក់ព័ន្ធករណីរក្សាទុក និងប្រើប្រាស់ដោយខុសច្បាប់នូវសារធាតុញៀន ។
លោកបញ្ជាក់ថា ជនសង្ស័យពាក់ព័ន្ធក្នុងករណីខាងលើបន្ទាប់ចាប់ខ្លួន និងឆែកឆេឃើញវត្ថុតាងអំពើលួច និងថ្នាំញៀនជាប់នឹងខ្លួនគ្រាមានពាក្យបណ្តឹងពីជនរងគ្រោះច្រើននាក់ស្តីពីការបាត់ទ្រព្យសម្បត្តិក្នុងលំនៅឋានបន្តបន្ទាប់ ។
លោកវរៈសេនីយ៍ឯក ដួង វិចិត្រ មេបញ្ជា ការរងកងរាជអាវុធហត្ថបានរៀបរាប់ថា ក្រោយ ទទួលបណ្តឹងពីជនរងគ្រោះនៅរសៀលថ្ងៃទី ១៤ មករា កម្លាំងកងរាជអាវុធហត្ថខេត្តសហការកងរាជអាវុធហត្ថមូលដ្ឋានក្រុងព្រមទាំងអភិបាលក្រុងចុះដល់ចំណុចទីតាំងកែច្នៃ និងទទួលផលចោរកម្មព្រមទាំងបានចាប់ខ្លួនជនសង្ស័យពាក់ព័ន្ធចំនួនបីនាក់ មានពីរនាក់ជាជនសង្ស័យក្នុងអំពើលួច និងម្នាក់ទៀតជាអ្នកសមគំនិតទទួលផលចោរកម្ម ។
លោកបន្តថា ជនសង្ស័យទី១- ឈ្មោះ ប៊ុន ឌីណា ភេទប្រុស អាយុ៣៦ឆ្នាំ មុខរបរជាងសិប្បកម្មឈើមានទី លំនៅភូមិព្រែក សង្កាត់ស្ទឹងត្រែង ក្រុងស្ទឹងត្រែង ទី២- ឈ្មោះ ប៊ុន ដា ភេទប្រុសអាយុ៣១ឆ្នាំ មុនរបរជាងសិប្បកម្មឈើត្រូវជាប្អូនបង្កើត ជនសង្ស័យខាងលើរស់នៅភូមិបាចុង សង្កាត់ព្រះបាទ ក្រុងស្ទឹងត្រែង និងម្នាក់ទៀតឈ្មោះ រិន ហុង ហៅម៉ៅ ភេទប្រុស អាយុ៣១ ឆ្នាំ រស់នៅភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ជាអ្នកសមគំនិតទទួលផល ចោរកម្មពីជនសង្ស័យទាំងពីរខាងលើ ។
លោកបន្តថា វត្ថុតាងដកហូតមកវិញមានគ្រឿងសង្ហារឹមធ្វើពីឈើប្រណីតប្រភេទធ្នង់ បេង នាងនួន ត្រូវបញ្ជូនទៅតុលាការជាមួយក្រុមជនសង្ស័យ និងប្រគល់ជូនម្ចាស់ដើមវិញ ។ ក្រៅពីនោះឈើប្រណីតមិនទាន់កែច្នៃត្រូវប្រគល់ជូនរដ្ឋបាលព្រៃឈើធ្វើកំណត់ហេតុរក្សាទុកនៅខណ្ឌរដ្ឋបាលព្រៃ ៕
ចែករំលែកព័តមាននេះ