រាជធានីភ្នំពេញ ៖ កាលពីវេលាម៉ោង៦និង៣០នាទីយប់ថ្ងៃទី១៥ ខែមករា ឆ្នាំ២០១៩នេះ បុរសមួយក្រុមចំនួន៧នាក់សុទ្ធសឹងតែប្រកបរបររត់ម៉ូតូឌុប និងរ៉ឺម៉កម៉ូតូកង់បីបានជុំគ្នាលេងបៀ ត្រង់ចំណុចតាមផ្លូវ ក្នុងភូមិក្បាលដំរី២ សង្កាត់កាកាប២…
រាជធានីភ្នំពេញ ៖ កាលពីវេលាម៉ោង៦និង៣០នាទីយប់ថ្ងៃទី១៥ ខែមករា ឆ្នាំ២០១៩នេះ បុរសមួយក្រុមចំនួន៧នាក់សុទ្ធសឹងតែប្រកបរបររត់ម៉ូតូឌុប និងរ៉ឺម៉កម៉ូតូកង់បីបានជុំគ្នាលេងបៀ ត្រង់ចំណុចតាមផ្លូវ ក្នុងភូមិក្បាលដំរី២ សង្កាត់កាកាប២ ខណ្ឌពោធិសែនជ័យ ត្រូវបានកម្លាំងនគរបាលប៉ុស្តិ៍ សង្កាត់ ចុះទៅឃាត់យកទៅធ្វើការអប់រំ ។
តាមប្រជាពលរដ្ឋបានឲ្យដឹងថា ក្រុមអ្នករត់ម៉ូតូឌុប និងរ៉ឺម៉កម៉ូតូកង់បីមួយចំនួនតូច ព្រឹកឡើងចេញឱ្យផុតតែពីផ្ទះ រួចបានជុំគ្នាហើយលេងតែល្បែងស៊ីសង ទោះជាទ្រង់ទ្រាយតូចក៏ពិតមែន តែប៉ះពាល់ដល់សង្គមគ្រួសារ ខាតបង់ពេលវេលា មិនចង់ចូលផ្ទះ បើឈ្នះល្បែងមិនមានបញ្ហាទេ តែបើចាញ់អស់លុយទៀត មានតែភូតកុហកប្រពន្ធថាដឹកម៉ូយមិនបាន ជារឿងមួយប៉ះពាល់ដល់សង្គមគ្រួសារ អាចឈានដល់ការឈ្លោះប្រកែកគ្នារវាងប្តីនិងប្រពន្ធទៀតផង ។
ពលរដ្ឋបន្តទៀតថា ដូចមនុស្សមួយក្រុមត្រង់ចំណុចភូមិក្បាលដំរី២ សង្កាត់កាកាប២ នេះអញ្ចឹង មកលេងជុំគ្នាតាំងពីព្រឹកទល់ព្រលប់ ញៀនវក់នឹងលេងតែបៀ មិនខំរកដឹកម៉ូយ ទិញរ៉ឺម៉កម៉ូតូកង់បី និងម៉ូតូ យកមកបញ្ឈរទុក នាំគ្នាលេងល្បែង មិនចេះនឹកអាណិតប្រពន្ធកូនដែលទន្ទឹងរង់ចាំមើលផ្លូវ ប្តី ឬឪពុក ចូលផ្ទះ ។
មនុស្សមួយក្រុមនេះត្រូវបានសមត្ថកិច្ចឃាត់ហៅនាំទៅដុសក្អែលឲ្យខ្មាស់គេម្តង និងអប់រំ ឲ្យរាងចាល ទើបអនុញាតឲ្យត្រឡប់ទៅផ្ទះវិញ ។ ក្នងការចុះប្រមូលក្រុមអ្នកញៀននឹងល្បែងខាងលើនេះ សមត្ថកិច្ចឃាត់បានមនុស្សចំនួន៧នាក់ ម៉ូតូចំនួន៣គ្រឿង ម៉ូតូកង់បីឥណ្ឌាចំនួន៥គ្រឿង និងម៉ូតូអូសរ៉ឺម៉ក១គ្រឿង ។
តាមការលើកឡើងរបស់ពលរដ្ឋ ទិដ្ឋភាពធ្លាប់ឃើញក្រុមអ្នករត់ម៉ូតូកង់បី និងម៉ូតូឌុបឈប់លេងល្បែង មិនមែនមាននៅក្នុងភូមិក្បាលដំរី២តែប៉ុណ្ណោះទេ បើទៅមើលនៅផ្លូវជាតិលេខ៣ ទល់មុខខ្លោងទ្វារវត្តជន្លង់ម្លូ កែងផ្លូវចូលភូមិព្រៃកំបុត សង្កាត់ចោមចៅ២ ខណ្ឌពោធិសែនជ័យ លេងច្រើនជាងនេះទៀត ។
សមត្ថកិច្ចអំពាវនាវផងដែរ «បើមានមុខរបររត់ម៉ូតូឌុប និងរ៉ឺម៉កម៉ូតូកង់បី ហើយត្រូវតស៊ូខិតខំរកម៉ូយដឹកទៅ គ្រាន់បានកម្រៃផ្គត់ផ្គង់ជីវភាពគ្រួសារ កុំចេញឲ្យតែផុតពីផ្ទះមកផ្តុំគ្នាលេងតែល្បែង ចុះបើប្រពន្ធ កូនដឹងពុតត្បុតរបស់ប្តី ឬឪពុក សួរថា ពួកគាត់មានអារម្មណ៍យ៉ាងណាដែរ ល្មមឈប់ទៅប្រសើរជាង» ៕
ចែករំលែកព័តមាននេះ