រាជធានីភ្នំពេញ ៖ ស្ត្រីម្នាក់បានពរក្មេងប្រុសម្នាក់អាយុមួយខួបដែលត្រូវជាកូនដើររ៉េរ៉នៅកណ្តាលផ្លូវ បណ្តាលឲ្យយានយន្តដែលធ្វើដំណើរតាមដងផ្លូវបើកគេចសឹងមិនទាន់ ក៏ត្រូវប្រជាពលរដ្ឋដែលនៅក្បែរនោះនាំគ្នាជួយចាប់យកមកដាក់លើចិញ្ចឹមផ្លូវវិញ ដែលហេតុការណ៍នេះបានបង្កឱ្យមានការភ្ញាក់ផ្អើលកាលពីវេលាម៉ោង៨យប់ថ្ងៃទី១៥ ខែមករា ឆ្នាំ២០១៩ ត្រង់ចំណុចក្បែរគល់ស្ពានអាកាស៧មករាផ្នែកខាងលិច តាមបណ្ដោយផ្លូវសហព័ន្ធរុស្ស៊ី ស្ថិតក្នុងសង្កាត់ទឹកថ្លា ខណ្ឌសែនសុខ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញស្ត្រីខាងលើបានពរកូនប្រុសម្នាក់នៅជាប់ចង្កេះដើរនៅកណ្តាលផ្លូវ តាមបណ្ដោយផ្លូវសហព័ន្ធរុស្ស៊ី ក្នុងទិសដៅពីលិចទៅកើត ដោយមិនខ្វល់ពីយានយន្តដែលបើកមកពីក្រោយនោះទេ បណ្តាលឲ្យអ្នកធ្វើដំណើរមកពីក្រោយនាំគ្នាបើកបរគេច និងខ្លះទៀតគេចសឹងតែមិនទាន់ផងដែរ។
លុះមកដល់ចំណុចកើតហេតុ ក៏មានប្រជាពលរដ្ឋដែលនៅក្បែរនោះ បានទៅសួរនាំស្ត្រីខាងលើ និងដេញស្ត្រីខាងលើឲ្យទៅដើរនៅលើចិញ្ចើមផ្លូវវិញ ព្រោះខ្លាចមានម៉ូតូ ឬរថយន្តបើកមកបុក បណ្តាលឱ្យមានគ្រោះថ្នាក់កើតឡើង។
ប្រភពដដែលបានបន្តថា ប៉ុន្តែស្ត្រីខាងលើហាក់ដូចជាមានសតិមិនប្រក្រតី ដោយនិយាយស្តីរវើរវាយ ស្តាប់គ្នាមិនបាន និងមិនព្រមទៅដើរលើចិញ្ចើមផ្លូវនោះទេ ថែមទាំងគំរាមបោកកូនរបស់នាងសម្លាប់ចោលទៀត ប្រសិនបើនាំគ្នាចាប់នាង។
ទោះបីយ៉ាងណា ប្រជាពលរដ្ឋខំប្រឹងនិយាយលួងលោមយ៉ាងណាក៏នាងមិនព្រមដែរ បន្ទាប់មកដោយខ្លាចមានគ្រោះថ្នាក់ដល់ក្មេងប្រុសខាងលើ ប្រជាពលរដ្ឋក៏សម្រេចចិត្តនាំគ្នាចាប់ស្ត្រីនោះយកមកដាក់លើចិញ្ចើមផ្លូវវិញ ហើយក៏បានរាយការណ៍ជូនសមត្ថកិច្ចមូលដ្ឋានឲ្យចុះមកជួយអន្តរាគមន៍។
ក្រោយពេលកើតហេតុ សមត្ថកិច្ចមូលដ្ឋានក៏បានចុះដល់កន្លែងកើតហេតុ រួចក៏បានទាក់ទងទៅមន្ទីរសង្គមកិច្ច អតីតយុទ្ធជន និងយុវនីតិសម្បទារាជធានីភ្នំពេញ ឲ្យចុះមកទទួលយកស្ត្រីខាងលើរួមទាំងកូនប្រុសដើម្បីធ្វើការព្យាបាល និងថែទាំផងដែរ៕
ចែករំលែកព័តមាននេះ