ប្រទេសចិន ៖ បុរសជនជាតិកាណាដាម្នាក់កាលពីថ្ងៃទី១៤មករា ទទួលការកាត់ទោសប្រហារជិវិតនៅចិន ក្រោយសវនាការកាត់ទោសថ្មី ពីបទរត់ពន្ធគ្រឿងញៀន។ នោះជាការសម្រេចមួយដែលកាណាដាចាត់ទុកថា គួរឲ្យព្រួយបារម្ភខ្លាំង ហើយអាចធ្វើឲ្យធ្ងន់ធ្ងរថែមទៀតដល់ទំនាក់ទំនង ដែលតានតឹងស្រាប់រវាងប្រទេសទាំង២។
លោកROBERT LLOYD SCHELLENBERG អាយុ៣៦ឆ្នាំកាលពីឆ្នាំ២០១៨ ត្រូវបានតុលាការសាលាដំបូង កាត់ទោសលោកដាក់គុក១៥ឆ្នាំ ជាសាលក្រមដែលតុលាការចិនថាស្រាលខ្លាំងពេក។ ក្នុងការកាត់ទោសថ្មីមុខតុលាការក្រុងដាលៀនភាគឦសានចិន ជននោះអះអាងពីភាពស្លូតត្រង់របស់ខ្លួន។ តុលាការបដិសេធទាំងស្រុងការពន្យល់នានារបស់ជនជាប់ចោទនិងរបស់មេធាវី។ ចៅក្រមប្រកាសសាលក្រមកាត់ទោស ក្នុងបន្ទប់សវនាការដែលមានវត្តមានរបស់អ្នកសង្កេតការណ៍ប្រមាណជា៧០នាក់។ ក្នុងចំណោមអ្នកទាំងនោះមានបណ្ដាអ្នកការទូតកាណាដា និងអ្នកកាសែតបរទេស៣នាក់។
នាយករដ្ឋមន្ត្រីកាណាដាលោកJUSTIN TRUDEAUបានបញ្ចេញប្រតិកម្មថា វាជារឿងគួរឲ្យព្រួយបារម្ភបំផុត ដែលចិនចាប់ផ្ដើមសកម្មភាពចាប់បង្ខំ ដើម្បីអនុវត្តទោសប្រហារជិវិត ពិសេសលើជនជាតិកាណាដាម្នាក់។ លោកសន្យាថានឹងជួយធ្វើអន្តរាគមន៍។
សាលក្រមកាត់ទោសនោះកើតមានពេលដែលទំនាក់ទំនងការទូតចិន-កាណាដា មានភាពតានតឹង ចាប់តាំងពីកាណាដាចាប់ខ្លួនកាលពីដើមខែធ្នូ តាមសំណើអាមេរិកលោកស្រីMENG WANZHOUនាយិកាហិរញ្ញវត្ថុរបស់ក្រុមហ៊ុនតេឡេកូមយក្សចិនHUAWEI។
ទាក់ទិនរឿងចាប់ខ្លួននោះ ចិនបានតបតវិញតាមរយៈការចាប់ខ្លួនជនជាតិកាណាដា២នាក់ គឹអតីតអ្នកការទូតលោកMICHAEL KOVRIG និងអ្នកពិគ្រោះយោបល់លោកMICHAEL SPAVOR។ អាជ្ញាធរចិនចោទប្រកាន់ពួកគេថា គំរាមកំហែងដល់សន្តិសុខជាតិ។ ការចាប់ខ្លួនអ្នកទាំង២នាក់នេះ នៅលោកខាងលិចគេគិតថាជាវិធានការសងសឹកវិញ។
កាត់ទោសនៅសាលាដំបូងកាលពីខែវិច្ឆិកាដាក់គុក១៥ឆ្នាំនិងពិន័យប្រាក់១៥០.០០០យន់ប្រមាណជា១៩.០០០អឺរ៉ូ លោកSCHELLENBERGបានតវ៉ាទៅសាលាឧទ្ធរណ៍។ ប៉ុន្តែការតវ៉ានោះរូបគេបែរជាធ្ងន់ករ ព្រោះតុលាការជាន់ខ្ពស់ខេត្តលីអាវនីញ យល់ថាទោសនោះស្រាលពេកហើយ រួចបញ្ជាឲ្យមានការកាត់ទោសជាថ្មី។
ជននោះក្នុងសវនាកាត់ទោសនាថ្ងៃទី១៤មករាអះអាងថា ខ្លួនពុំមែនជាអ្នករត់ពន្ធគ្រឿងញៀនឡើយ។ រូបគេមកប្រទេសចិនដើម្បីធ្វើទេសចរណ៍ប៉ុណ្ណោះ។ ប៉ុន្តែតុលាការវិនិច្ឆ័យថាបុរសកាណាដានោះ ដែលចាប់ខ្លួនកាលពីខែធ្នូឆ្នាំ២០១៤ បានដើរតួនាទីគន្លឹះមួយក្នុងផ្ទៃក្រុមជនខិលខូចមួយក្រុម ដែលធ្វើសកម្មភាពរត់ពន្ធគ្រឿងញៀន៕
ចែករំលែកព័តមាននេះ