អ្នកដែលមហាជនយល់ថាជាមនុស្សល្អនោះ ក៏ព្រោះតែគេបានគិតល្អ ប្រព្រឹត្តធ្វើល្អ និងនិយាយពាក្យពិតត្រង់ សម្តីផ្អែមពីរោះ ទាំងអស់នេះបានមកអំពីគេមានការគិតល្អជាគ្រឹះ ។
នេះក៏ជាការសបញ្ជាក់ថា សេចក្ដីល្អ ឬអាក្រក់ទាំងឡាយ ត្រូវចាប់ផ្ដើមពីចិត្តទៅមុន អាចនិយាយបានថា កាលបើគេតាំងចិត្តធ្វើជាមនុស្សល្អ ហើយក៏ប្រព្រឹត្តតាមការតាំងចិត្តនោះ ផលដែលត្រូវទទួលបានគឺសេចក្តីល្អត្រឡប់មកវិញ ។
ក្នុងលោកនេះ មិនមានអ្វីដែលសំខាន់សម្រាប់យើងជាងយើងខ្លួនឯងជាមនុស្សល្អនោះឡើយ ។ សេចក្តីនេះសំដៅន័យថា បើយើងចង់ឲ្យអ្នកដទៃធ្វើសេចក្ដីល្អដល់យើង គឺយើងត្រូវព្យាយាមធ្វើសេចក្ដីល្អឲ្យខ្លួនឯងជាមុនសិន ។
សេចក្ដីល្អដែលយើងធ្វើដោយខ្លួនឯង ឈ្មោះថាយើងជួយខ្លួនយើង ហើយសេចក្តីល្អនេះមានអានុភាពដល់ចិត្តយ៉ាងពិតប្រាកដ គឺធ្វើឲ្យចិត្តបានសុខស្ងប់ ។ កាលបើចិត្តបានសុខស្ងប់ហើយ អ្វីៗក៏រៀបរយទៅតាមហ្នឹងដែរ ។
ចែករំលែកព័តមាននេះ