រាជធានីភ្នំពេញ ៖ បុរសជាជនសង្ស័យជួញដូរគ្រឿងញៀនចំនួន២នាក់ ត្រូវបានកម្លាំងនគរបាលខណ្ឌដូនពេញចាប់ឃាត់ខ្លួន និងដកហូតថ្នាំញៀនបានចំនួន១២៦កញ្ចប់ រួមទាំងវត្ថុតាងមួយចំនួនទៀតផងដែរ។
ការបង្ក្រាបនេះដែរបានធ្វើឡើងកាលពីវេលាម៉ោង១២និង៣០នាទីថ្ងៃត្រង់ថ្ងៃទី ១៥ ខែ មករា ឆ្នាំ ២០១៩ នៅចំណុចផ្លូវរថភ្លើងR6 ក្នុងសង្កាត់ស្រះចក ខណ្ឌដូនពេញ។
តាមប្រភពព័ត៌មានពីនគរបាលបានប្រាប់ឱ្យដឹងថា បុរសជាជនសង្ស័យទាំង២នាក់ ដែលបានចាប់ឃាត់ខ្លួន ម្នាក់ឈ្មោះ ទុន ប៊ុនរិទ្ធ ភេទប្រុស អាយុ៣២ឆ្នាំ មុខរបរមិនពិតប្រាកដ (ជាអ្នកជួញដូរ) និងម្នាក់ទៀតឈ្មោះ ស៊ីន សុខវាសនា ភេទប្រុស អាយុ២១ឆ្នាំ (ជាអ្នកប្រើប្រាស់) ។ ជនសង្ស័យទាំង២នាក់នេះស្នាក់នៅក្នុងតំបន់មិនរៀបរយក្បែរផ្លូវរថភ្លើងR6ខាងលើ ។
ដោយអនុវត្តន៍តាមគោលការដឹកនាំរបស់លោក សុខ ពេញវុធ អភិបាលនៃគណៈអភិបាលខណ្ឌដូនពេញនោះ អធិការដ្ឋានប៉ុស្តិ៍បានបើកការស្រាវជ្រាវបង្ក្រាបករណីជួញដូរគ្រឿងញៀននៅចំណុចខាងលើនេះ។
តាមប្រភពដដែលបានឱ្យដឹងបន្តទៀតថា ក្នុងប្រតិបត្តិការបង្ក្រាបគ្រឿងញៀននៅចំណុចផ្លូវរថភ្លើង R6ខាងលើនេះដែរ ក្រៅពីបានធ្វើការឃាត់ខ្លួនបុរសជាជនសង្ស័យទាំង២នាក់ កម្លាំងសមត្ថកិច្ចក៏បានដកហូតថ្នាំញៀនចំនួន ១២៦កញ្ចប់ (ក្នុងនោះធំ១កញ្ចប់) ថង់ប្លាស្ទិកប្រើសំរាប់ច្រកគ្រឿងញៀនមួយចំនួន រួមទាំងឧបករណ៍ប្រើប្រាស់ជាវត្ថុតាងមួយចំនួនទៀតផងដែរ។
ក្រោយពីកម្លាំងមានសមត្ថកិច្ចធ្វើការចាប់ឃាត់ខ្លួនជនសង្ស័យទាំង២នាក់ខាងលើរួមនឹងជាវត្ថុតាងមួយចំនួនទៀត ក៏បាននាំមកកាន់នគរបាលប៉ុស្តិ៍ស្រះចក ដើម្បីធ្វើការសាកសួរ និងធ្វើកំណត់ហេតុបញ្ជូនទៅកាន់អធិការដ្ឋាននគរបាលខណ្ឌដូនពេញចាត់ការទៅតាមនីតិវិធីជាបន្តទៅទៀត ៕
ចែករំលែកព័តមាននេះ