ខេត្តស្ទឹងត្រែង ៖ យោងតាមស្ថិតិនៃការតាមដានលទ្ធផលនេសាទត្រីឆ្នាំ២០១៨កន្លងមកនេះ បានបង្ហាញថា ផលនេសាទមានការកើនឡើងប្រមាណ២ភាគរយ ឬស្មើនឹង៦.៤៦៧តោន បើធៀបទៅនឹងឆ្នាំ២០១៧ ។
ទោះបីយ៉ាងណា ស្ថិតិនេះបានអះអាងថា ពូជត្រីសំខាន់ៗមួយចំនួនកំពុងថមថយដែលស្ទើរឈានទៅជិតផុតពូជទៅហើយដោយសារតែការនេសាទហួសកម្រិត និងការប្រព្រឹត្តបទល្មើនេសាទ ។ នាយខណ្ឌរដ្ឋបាលជលផលនៃមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង បានឲ្យដឹងថា អ្នកនេសាទមានការកើនឡើងពីមួយឆ្នាំទៅមួយឆ្នាំ ហើយពូជត្រីសំខាន់ៗមួយចំនួនកំពុងប្រឈមនឹងជិតផុតពូជ ដោយសារតែអ្នកនេសាទខ្លះលួចនេសាទនៅតាមអន្លង់អភិរក្សបង្កផលប៉ះពាល់ដល់ពូជត្រី ពិសេសការប្រើប្រាស់ឧបករណ៍ល្មើសច្បាប់ ។
លោក ទុំ នីរ៉ូ នាយខណ្ឌរដ្ឋបាលជលផលរូបនេះ បានបញ្ជាក់ថា ៖« ទន្លេលើជាជម្រកត្រីបន្តពូជ ដូចជា ត្រីរាជ ត្រីគល់រាំង ត្រីត្រសក់ ត្រីនាគ ត្រីផ្ទក់ ពិសេសត្រីប៉ាវ៉ា និងត្រីប៉ាសេអីុ ដែលមានឈ្មោះល្បីនៅខេត្តស្ទឹងត្រែងភាគឦសាន ក៏ប៉ុន្តែធនធានជលផលទាំងនេះវាកំពុងថមថយពីមួយឆ្នាំទៅមួយឆ្នាំ ដូច្នេះទើបតម្រូវឱ្យយើងទាំងអស់គ្នាក្នុងនាមជាប្រជាពលរដ្ឋ និងជំនាញ ព្រមទាំងអ្នកពាក់ពន្ធ័ផ្សេងៗទៀតរួមគ្នាដើម្បីដោះស្រាយរាល់បញ្ហាធ្វើម៉េចកុំឱ្យធនធានទាំងអស់នេះថមថយ ឬក៏ឈានទៅដាច់ពូជ »។
មន្ត្រីអង្គការសេប៉ាប្រចាំខេត្តស្ទឹងត្រែងលោក ផល លុយ បានលើកឡើងផងដែរថា ករណីនេះអង្គការជាដៃគូបាននិងកំពុងធ្វើយ៉ាងសកម្មភាពដើម្បីពង្រឹងសមត្ថភាពដល់ប្រជាសហគមន៍ និងប្រជាកសិករឲ្យបង្កើតមុខរបរប្រចាំគ្រួសារ ។ លោកបន្ដថា ៖« ដើម្បីឲ្យពួកគាត់ងាកចេញពីការនេសាទ យើងកំពុងបណ្ដុះបណ្ដាលជំនាញឲ្យគាត់មានមុខរបរដូចជា ការចិញ្ចឹមត្រី បង្កើតសួនបន្លែប្រចាំគ្រួសារជាដើមសម្រាប់ជួួយគាត់ឲ្យងាកមកប្រកបរបរនេះវិញ ទើបយើងអាចការពារធនធានមច្ឆជាតិនេះបាន »។
លោក ឆែម ប៊ុនធឿន ប្រធានសហគមន៍នេសាទភូមិថ្មីសង្កាត់សាមគ្គី បានលើកឡើងថា បច្ចុប្បន្នការនេសាទជាលក្ខណៈគ្រួសារកម្របានជួបប្រទះត្រីសំខាន់ៗណាស់ ដែលជាសញ្ញាមួយបង្ហាញពីភាពបាត់បង់ទៅៗពូជត្រីទាំងនោះជាបន្ដបន្ទាប់ ។
លោកក៏បានអំពាវនាវដល់ប្រជានេសាទទាំងអស់ គួរចូលរួមគោរពច្បាប់ជលផលទាំងអស់គ្នាឱ្យបានគ្រប់រដូវ ជៀសវាងប្រើប្រាស់ឧបករណ៍ល្មើសច្បាប់ ហើយងាកត្រឡប់មកប្រើប្រាស់មង ឬដាក់សន្ទូច លប ទ្រូ ដែលឧបករណ៍លក្ខណៈគ្រួសារ និងត្រូវបញ្ឈប់ប្រព្រឹត្តបទល្មើសឬទៅនេសាទនៅកន្លែងអន្លង់អភិរក្សជាដើម ។ លោកមានប្រសាសន៍ថា ៖« ប្រសិនបើយើងមានឆន្ទៈចូលរួមថែរក្សាទាំងអស់គ្នា នោះត្រីមេពូជដូចជា ត្រីប៉ាសេអីុ ត្រីគល់រាំង នឹងសម្បូរឡើងវិញ ហើយសូមឈប់ប្រើប្រាស់ឧបកណ៍នេសាទខុសច្បាប់ ដូចជាឆក់បំពុល គប់គ្រាប់ និងរួមចំណែកទប់ស្កាត់ និងកាត់បន្ថយការនេសាទត្រីមេពូជ នៅក្នុងទន្លេនិងជួយអភិរក្សទាំងអស់គ្នា »។
លោក គង់ ធា ប្រជានេសាទនៅភូមិអូរស្វាយ ឃុំអន្លង់ជ្រៃ ស្រុកថាឡាបរិវ៉ាត់ បាននិយាយថា ៖« បើសិនជាយើងធ្វើនេសាទជាលក្ខណៈគ្រួសារ ផលត្រីនឹងសម្បូរបែបឡើងវិញតែបច្ចុប្បន្នបងប្អូនភាគច្រើនធ្វើអាជីវកម្មនេសាទដែលបង្ករអោយធនធានមួយនេះធ្លាក់ចុះ »។ លោកបន្តថា ៖« ក្រៅពីនោះទៀតបទល្មើសនេសាទក៏ចេះតែកើតមាន ហើយការបង្ក្រាបរបស់មន្ត្រីជំនាញមិនទាន់មានប្រសិទ្ធភាពនៅឡើយ » ៕
ចែករំលែកព័តមាននេះ