ទីក្រុង Riyadh ៖ រដ្ឋមន្ត្រីប្រេង Khalid al-Falih បាននិយាយកាលពីថ្ងៃអាទិត្យមកថា ទីផ្សារប្រេងកំពុងតែឆ្ពោះទៅទិសដៅត្រឹមត្រូវ ហើយនឹងមានលំនឹងភាពឡើងវិញ ប៉ុន្តែក្រុមហ៊ុនប្រេងនឹងកាន់តែសកម្មជាងនេះទៀតបើចាំបាច់។ នេះបើតាមទីភ្នាក់ងារសារព័ត៌មាន Reuters ចេញផ្សាយកាលពីថ្ងៃ១៣ មករា កន្លងមក ។
លោកបាននិយាយថា ៖« ប្រសិនបើយើងមើលរំលងការជជែកពីទិន្នន័យប្រចាំសប្តាហ៍ និងអាកប្បកិរិយារបស់អ្នកតាមដាន ខ្ញុំនៅតែជឿជាក់ថាពួកយើងកំពុងឆ្ពោះទៅទិសដៅត្រឹមត្រូវ ហើយទីផ្សារនឹងមានលំនឹងវិញក្នុងពេលឆាប់ៗ »។
លោកបានបន្ថែមថា ៖« ប្រសិនបើពួកយើងត្រូវធ្វើបន្ថែម ពួកយើងនឹងសកម្មជាងមុនដោយមានការសហការជាមួយនឹងដៃគូនៅ OPEC និងដៃគូផ្សេងៗ »។ អង្គការនៃប្រទេសនាំចេញប្រេង (OPEC) និងប្រទេសផលិតប្រេងដទៃដូចជារុស្ស៊ីបានព្រមព្រៀងគ្នាកាលពីខែធ្នូមកថា នឹងកាត់បន្ថយទិន្នផលប្រេងប្រមាណ ១,២លានធុងក្នុងមួយថ្ងៃចាប់ពីខែមករានេះទៅដើម្បីជៀសវាងការផ្គត់ផ្គង់លើសលប់ និងបង្កើនតម្លៃប្រេង។
លោក Falih បាននិយាយទៀតថា ប្រភពមួយចំនួនបានបង្ហាញឲ្យដឹងថា ផលិតកម្មក្នុង OPEC នាខែធ្នូកន្លងមកនេះមានកម្រិតទាបជាងខែវិច្ឆិកាប្រមាណ៦០ម៉ឺនធុងក្នុងមួយថ្ងៃទៅហើយ ។ លោកបានបន្ថែមថា ៖« ពួកយើងនៅអារ៉ាប៊ីសាអូឌីតបានខិតខំលើសពីការសន្យាទៀត និងបានកាត់បន្ថយទាំងផលិតកម្មនិងការនាំចេញ »។
លោក Falih បានប្រាប់ដល់សារព័ត៌មានដែរថា លោកមិនគិតថាមិនចាំបាច់មានកិច្ចប្រជុំពិសេសរបស់ OPEC មុនខែមេសាទេ ដែលជាពេលក្រុមអ្នកផលិតនេះសម្រេចលើគោលការណ៍ទិន្នផលសម្រាប់ឆ្នាំ២០១៩ ៕
ចែករំលែកព័តមាននេះ